អ្នកទោសនយោបាយខកចិត្តជាថ្មី
សកម្មជននយោបាយ និងសកម្មជនបក្សប្រឆាំង មិនលាក់បាំងការខកចិត្តរបស់ខ្លួនឡើយនៅថ្ងៃអង្គារនេះ បន្ទាប់ពីបានឃើញបញ្ជីដោះលែងអ្នកទោស ជាផ្លូវការ ចុះហត្ថលេខាដោយប្រធានាធិបតី ថេន សេន កាលពីម្សិលមិញ។ គ្មានអ្នកទោសមនសិការណាម្នាក់ នឹងត្រូវបានដោះលែងឱ្យមានសេរីភាព នាឱកាសថ្ងៃបុណ្យឯករាជ្យជាតិភូមា ថ្ងៃទី ៤មករា ២០១២ នេះទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៦
នាឱកាសបុណ្យឯករាជ្យជាតិលើកទី៦៤ ថ្ងៃស្អែក អ្នកទោស ប្រមាណ៩៣០នាក់ នឹងទទួលបានការអនុគ្រោះទោសពីប្រធានាធិបតី សេន ថេន ! ប៉ុន្តែគ្មានអ្នកទោសនយោបាយ អ្នកកាសែត មេធាវី ឬព្រះសង្ឃ ក៏ដូចជាសកម្មជនបក្សនយោបាយណាម្នាក់ ត្រូវបានទទួលសេរីភាព នាពេលនេះទេ ! អ្នកនាំពាក្យរបស់គណបក្សសម្ព័ន្ធជាតិដើម្បីលទ្ធិប្រជាធិបតេយ្យ មិនបានដឹង ឬទទួលព័ត៌មានអ្វីទាក់ទងនឹងជោគវាសនារបស់សកម្មជនបក្សទេ។
សូមបញ្ជាក់ថា កាលពីចុងសប្តាហ៍មុន អ្នកទទួលខុសត្រូវមា្នក់នៃរដ្ឋសភាភូមា បានបង្ហើបព័ត៌មានគួរឲ្យទុកចិត្ត ថាអាចនឹងមានអ្នកទោសនយោបាយថ្មីៗថែមទៀត ត្រូវដោះលែងនៅថ្ងៃទី៤មករា និងទី១២កុម្ភៈ។ ប៉ុន្តែពេលនេះ ក្តីសង្ឃឹមហាក់កំពុងតែរលត់ទៅវិញហើយ។
ម្យ៉ាងវិញទៀត ក្រៅពីបានចុះហត្ថលេខាលើបញ្ជីដោះលែងអ្នកទោស ម្សិលមិញប្រធានាធិបតី ថេន សេន ក៏បានចេញបញ្ជា ឱ្យមានការសម្រាលទោស អ្នកជាប់ពន្ធនាគារផងដែរ។ អ្នកជាប់ទោសប្រហារជីវិត នឹងត្រូវអនុគ្រោះទៅជាទោសអស់មួយជីវិត។ ទោសលើសពីជាង៣០ឆ្នាំ នឹងបន្ថយមកត្រឹមតែ៣០ឆ្នាំ។ លើសពីជាង២០ ដល់៣០ឆ្នាំ នឹងធ្លាក់មកត្រឹម២០ឆ្នាំគត់។ ចំណែកទោសក្រោម២០ឆ្នាំ នឹងបន្ថយមួយភាគបួន។
ប៉ុន្តែសកម្មជនបះបោរប្រឆាំងរដ្ឋាភិបាល ដែលត្រូវកាត់ទោសឱ្យជាប់ពន្ធនាគារជាង១០ឆ្នាំ (ខ្លះតាំងពីឆ្នាំ១៩៨៨ និង២០០៧) នៅតែមិនទាន់អាចទទួលសេរីភាពបាន។ នេះបើតាមការកត់សម្គាល់របស់សមាគមការពារអ្នកទោសនយោបាយ ដែលបានសម្តែងការសោកស្តាយចំពោះទង្វើរបស់រដ្ឋាភិបាលភូមា និងសម្តែងការខកចិត្តយ៉ាងខ្លាំងចំពោះទិវាដោះលែងអ្នកទោស លើកនេះ។
ក្រោយការដោះលែងអ្នកទោសនយោបាយចំនួនប្រមាណ២០០នាក់ កាលពីថ្ងៃ១២តុលា ២០១១ គេប៉ាន់ប្រមាណថា ភូមានៅបន្តឃុំឃាំងអ្នកទោសមនសិការប្រមាណពី ៥០០ ទៅ១៦០០នាក់ទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ