Omrane អាយុ៤ឆ្នាំ ជានិមិត្តរូបនៃហិង្សាសង្គ្រាមស៊ីរី
ចុះផ្សាយនៅថ្ងៃ៖
ស្តាប់ - ០៤:៤៥
ប្រេសិតពិសេសអង្គការសហប្រជាជាតិ លោកស្តាហ្វាន់ ដឺ មីស្ទូរ៉ា បានប្រកាសព្យូរកិច្ចប្រជុំ ការងារមនុស្សធម៌សម្រាប់វិបត្តិស៊ីរី ដើម្បីដាក់គំនាបគ្រប់ភាគីជម្លោះ អោយសម្រេចកិច្ចព្រមព្រៀងឈប់បាញ់មួយ។ រុស្ស៊ីវិញបានស្នើអោយមានបទឈប់បាញ់៤៨ម៉ោង ដើម្បីអាចអោយគេបញ្ជូនជំនួយមនុស្សធម៌ទៅជួយប្រជាជននៅអាឡិប។
តាំងពីយប់ថ្ងៃពុធមក រូបភាពកុមារស៊ីរី អូមរ៉ាន អាយុ៤ឆ្នាំ រងរបួសដោយការទំលាក់គ្រាប់បែកនៅអាឡិបប្រទេសស៊ីរី បានទាក់ចំណាប់អារម្មណ៍ពិភពលោកយ៉ាងខ្លាំង។ បណ្តាញសង្គមបាននាំគ្នាបរិហារវិបត្តិសង្គ្រាមស៊ីរី ដោយបានចុះផ្សាយរូបភាពក្មេងតូច អង្គុយក្នុងឡានសង្គ្រោះ មានដងខ្លួន ប្រលាក់ដោយដី និងឈាមនៅលើក្បាល។
រូបភាពអូមរ៉ានធ្វើអោយគេនឹកឃើញដល់ក្មេងប្រុសស៊ីរី អាយឡាន កៀឌីដែលសាកសពអណ្តែតមកទើនៅឆ្នេរតួកគីកាលពីខែកញ្ញាឆ្នាំ២០១៥
នេះជារូបភាពដែលធ្វើអោយគ្រប់គ្នារំជួលចិត្ត ពិតជាអណោចអធម៌ណាស់។ ទាំងអូមរ៉ាន ទាំងអាយឡាន សុទ្ធតែជាកុមាររងគ្រោះដោយសង្គ្រាមស៊ីរីដូចគ្នា។
ក្មេងប្រុសអូមរ៉ាន រងគ្រោះដោយការទំលាក់គ្រាប់បែកនៅអាឡិប ប្រទេសស៊ីរី។ អូមរ៉ាន ទាក់ចំណាប់អារម្មណ៍ពិភពលោក ត្រង់ថា នៅពីមុខកាមេរ៉ាថតរូប អូមរ៉ានមានដងខ្លួនប្រលាក់ដោយធូលី និងឈាមនៅក្បាល។ អូមរ៉ាននៅស្ងៀមដូចតុក្កតា។ ក្មេងតូចមិននិយាយអ្វីទាំងអស់ ប្រហែលដោយសារហ៊ឹងត្រចៀក ដោយសម្លេងគ្រាប់បែកហើយ។
អូមរ៉ានយកដៃជូតឈាមលើថ្ងាសខាងឆ្វេង ហើយយកដៃប្រលាក់ឈាមនេះមកមើល រួចជូតបន្តលើកៅអីឡានសង្គ្រោះដែលគេអង្គុយទៅទៀត។ អូមរ៉ានប្រហែលពិបាកនឹងជឿអ្វីដែលបានកើតឡើងចំពោះគេហើយ មើលទៅ។
អ្នកថតរូបប្រាប់ថា គាត់ធ្លាប់ថតរូបក្មេងៗរងគ្រោះច្រើនហើយ។ ជាទូទៅ ក្មេងៗច្រើនតែយំ រឺសន្លប់បាត់ស្មារតី។ អូមរ៉ានរងរបួស តែបែរជានៅស្ងៀមទៅវិញ។ អូមរ៉ានប្រហែលរងការប៉ះទង្គិចចិត្តហើយ។ ផ្ទះអូមរ៉ាន ស្ថិតនៅភាគខាងកើតក្រុងអាឡិប បានរងការវាយប្រហារ។ ជញ្ជាំងផ្ទះបានបាក់ធ្លាក់ទៅលើអូមរ៉ាន និងគ្រួសារ ដែលមានឱពុក ម្តាយ និងបងប្អូនប្រុសស្រី៣នាក់ទៀត ដែលសុទ្ធតែជាក្មេងតូចៗដូចគ្នា។
អាមេរិកប្រតិកម្មថា រូបភាពអូមរ៉ានបង្ហាញពីអ្វីដេលកើតឡើងនៅស៊ីរី បង្ហាញថាសម្រាប់ក្មេងតូចៗនៅស៊ីរី ថ្ងៃណា ក៏ជាថ្ងៃដែលមានការបាញ់គ្នា ថ្ងៃណាក៏ជាថ្ងៃដែលមានមនុស្សស្លាប់ ថ្ងៃណាក៏ជាថ្ងៃដែលមានតែភាពក្រីក្រ គ្រោះអត់ឃ្លានដែរ។ នេះនៅមិនគិតពីក្មេងតូចៗផ្សេងទៀត ដែលត្រូវរបួសធ្ងន់ រហូតពិកា រឺបាត់បង់ជីវិត ដោយមិនទាន់បានធំដឹងក្តីអ្វីផង។
ថ្ងៃ២ ខែកញ្ញាឆ្នាំ២០១៥ ពិភពលោកបានចាប់អារម្មណ៍ រូបភាពក្មេងប្រុសស៊ីរី ម្នាក់ដែរ ឈ្មោះអាយឡាន កៀឌី។ ក្មេងតូច អាយឡាន អាយុ៣ឆ្នាំ ជានិមិត្តរូបនៃភាពលំបាក នៃវិបត្តិជនភៀសខ្លួន។ អាយឡាន បានគេចហិង្សានៅស៊ីរី ដោយបានភៀសខ្លួនតាមទូក ជាមួយគ្រួសារ តែទីបំផុតបែរជាលង់ទឹកស្លាប់ សល់តែសាកសពលើឆ្នេរតួកគីទៅវិញ។ មនុស្សស្លាប់របួសច្រើនយ៉ាងណាក៏ដោយ ទាំងកងទ័ព ទាំងក្រុមឧទ្ទាមស៊ីរី ហាក់មិនខ្វល់អ្វីទាំងអស់ គឺគិតតែពិបន្តប្រយុទ្ធគ្នា ដើម្បីអំណាច។
ស្ថានការណ៍សមរភូមិអាឡិប
ក្រុមស៊ីរី និងក្រុមជីហាតហ្វាតេ អាល់ ឆាំ ដែលជាអតីតក្រុមអាល់ ណូស្រា កំពុងប្រយុទ្ធជាមួយកងទ័ពលោកអាសាដ ដើម្បីដណ្តើមយកអាឡិប។ សូមរំលឹកថា អាឡិបជាក្រុងសំខាន់ទី២ ហើយបានចែកដាច់ជា២តំបន់ តាំងពីឆ្នាំ២០១២។ កងទ័ពស៊ីរី កាន់កាប់តាមសង្កាត់នៅតំបន់ភាគខាងលិច រី៝ឯក្រុមឧទ្ទាមកាន់កាប់ ភាគខាងកើត។
តាំងពីថ្ងៃ៣១កក្កដា ក្រុមឧទ្ទាមនិងក្រុមជីហាតបានវាយបក ទៅលើការឡោមព័ទ្ធរបស់កងទ័ពវិញ ហើយបានមានប្រៀបឡើងវិញបន្តិច ដោយយកបានទីតាំងខ្លះៗ។ កងទ័ពមិនទាន់វាយយកទីតាំងទាំងនេះមកវិញបាននៅឡើយ។ គ្មានខាងណាឈ្នះខាងណាទេ តែកងទ័ពស៊ីរី ហាក់ពិបាកតតាំងក្រុមឧទ្ទាមបន្តិច ទោះបីមានជំនួយពីរុស្ស៊ីក៏ដោយ។ យន្តហោះ ស៊ីរី និងរុស្ស៊ីកំពុងព្យាយាមទប់កុំអោយមានកម្លាំងជំនួយ អាចទៅជួយទីតាំងក្រុមឧទ្ទាមនៅខាងត្បូងអាឡិប។
ផលវិបាកគឺ ប្រជាជនរាប់សែននាក់កំពុងជាប់ខ្លួននៅអាឡិប គ្មានស្បៀងហូបចុក និងទឹកប្រើប្រាស់។ អង្គការសហប្រជាជាតិបរិហារថា ១ខែមកនេះ គ្មានរថយន្តដឹកស្បៀងណាមួយ អាចចូលទៅដល់កន្លែងដែលរងការឡោមព័ទ្ធទេ។
អង្គការសហប្រជាជាតិទាមទារច្រើនលើកមកហើយ អោយផ្អាកប្រយុទ្ធគ្នា ៤៨ម៉ោង តែក្រុមប្រយុទ្ធហាក់មិនខ្ចីធ្វើលឺ។ ដោយសារតែអញ្ចឹងហើយ ទើបម្សិលមិញ ប្រេសិតអង្គការសហប្រជាជាតិ លោកស្តាហ្វាន ដឺ មីស្ទូរ៉ា សម្រេចព្យួរកិច្ចប្រជុំមនុស្សធម៌ទាក់ទងស៊ីរីតែម្តងទៅ។
ការផ្អាកការប្រយុទ្ធគ្នា ជាដំណោះស្រាយចំពោះមុខនៅស៊ីរី
ស៊ីរីកាន់តែផុងជ្រៅក្នុងហិង្សាសង្គ្រាម។ តាំងពីឆ្នាំ២០១១ សង្គ្រាមបានសម្លាប់មនុស្ស២សែន៩ម៉ឺននាក់។ ទន្ទឹមនេះដែរ ក្រុមជីហាតរដ្ឋអ៊ីស្លាមក៏កំពុងមានវត្តមាននៅស៊ីរី។
រុស្ស៊ីបានស្នើអោយផ្អាកការប្រយុទ្ធនៅអាឡិប ៤៨ម៉ោង។ ក្រសួងការពារជាតិរុស្ស៊ីបានប្រកាសថា រុស្ស៊ីត្រៀមដាក់អោយមានការផ្អាកការប្រយុទ្ធ នៅសប្តាហ៍ក្រោយ ដើម្បីអោយគេអាចដឹកស្បៀងជំនួយទៅជួយប្រជាជននៅអាឡិប។ រុស្ស៊ីត្រូវសុំរដ្ឋាភិបាលលោកអាសាដ អោយធានាសុវត្ថិភាពរថយន្តស្បៀងមនុស្សធម៌ ហើយរុស្ស៊ីក៏សង្ឃឹមថា ខាងអាមេរិកនឹងធានាសុវត្ថិភាពរថយន្តដឹកស្បឿង នៅតំបន់កាន់កាប់ដោយក្រុមឧទ្ទាមដែរ។
ច្រើនខែមកនេះ រុស្ស៊ីនិងអាមេរិកបានខិតខំរកដំណោះស្រាយតាមបែបការទូតសម្រាប់ស៊ីរី។ អាមេរិកចង់ឃើញសហគមន៍អន្តរជាតិចូលរួមដោះស្រាយបញ្ហាទាំងអស់គ្នា។ អាមេរិកចង់អោយមានបទឈប់បាញ់ទូទាំងប្រទេស ជាលក្ខណៈជាតិ ហើយចង់ឃើញគ្រប់ភាគីជម្លោះជួបពិភាក្សាគ្នា ឡើងវិញ នៅទីក្រុងហ្សឺណែវ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ