ទីក្រុងប៉េកាំងត្រៀមបញ្ជូនសហគ្រាសរបស់ខ្លួនត្រលប់ទៅលីប៊ីវិញ
ក្រុមមន្រ្តីរដ្ឋាភិបាល រួមទាំងថៅកែក្រុមហ៊ុនចិនមួយក្រុមបានទៅដល់ទីក្រុងទ្រីប៉ូលីហើយនៅថ្ងៃនេះ ដើម្បីរៀបចំអោយសហគ្រាសចិន ត្រលប់ចូលទៅរកស៊ីនៅក្នុងប្រទេសលីប៊ីវិញ។ ប៉ុន្តែមតិសាធារណជនជាច្រើនកំពុងតែព្រួយបារម្ភពីគ្រោះថ្នាក់ដែលមានកាន់តែច្រើនឡើងទៅលើពលករចិនធ្វើការនៅក្រៅប្រទេស ជាពិសេសប្រទេសដែលមានអស្ថិរភាពនយោបាយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៧
រូបភាពពលករចិនជាង ៣៦០០០នាក់ ដែលត្រូវបានគេជម្លៀសភ្លាមៗចេញពីប្រទេសលីប៊ី កាលពីរដូវរងាឆ្នាំមុន ដោយសារតែសង្រ្គាមផ្ទៃក្នុងបានផ្ទុះឡើង នៅក្នុងប្រទេសអាហ្រ្វិកមួយនេះ ឋិតនៅក្នុងការចងចាំនៅឡើយរបស់មនុស្សជាច្រើន។ ប៉ុន្តែនៅថ្ងៃនេះ សាជាថ្មីម្តងទៀតទីក្រុងប៉េកាំងចង់អោយសហគ្រាសរបស់ខ្លូនត្រលប់ចូលទៅវិនិយោគនៅក្នុងប្រទេសនោះវិញ បើទោះបីជាបុគ្គលិករបស់ចិនជាច្រើននាក់ទើបតែត្រូវចាប់ធ្វើជាចំណាប់ខ្មាំង ហើយដោះលែងនៅអេហ្ស៊ីប និងស៊ូដង់កាលពីសប្តាហ៍មុន។
គណៈប្រតិភូទីក្រុងប៉េកាំងដែលរួមមាន មន្រ្តីរដ្ឋាភិបាល និងថៅកែក្រុមហ៊ុន នឹងស្នាក់នៅក្នុងប្រទេសលីប៊ី រហូតដល់ថ្ងៃពុធសប្តាហ៍ក្រោយដើម្បី វាស់វែងទំហំនៃការខូចខាតនានារបស់ក្រុមហ៊ុនចិន កាលពីកំឡុងពេលមានសង្រ្គាមបះបោរ។ ហើយពួកគេនឹងផ្តោះប្តូរយោបល់ជាមួយមេដឹកនាំបច្ចុប្បន្នរបស់ក្រុងទ្រីប៉ូលី ពីគម្រោងវិនិយោគថ្មី ឬគម្រោងចាស់ៗរបស់ពួកគេដែលបានផ្អាកមុនពេលមានសង្រ្គាម។
នៅក្នុងក្រុមគណៈប្រតិភូខាងលើគេឃើញមាន វត្តមានក្រុមហ៊ុន BTP Gezhouba ដែលទទួលបន្ទុកសាងសង់ផ្ទះចំនួន ៧០០០ខ្នង និងក្រុមហ៊ុនបណ្តាញទូរស័ព្ទធំៗជាច្រើន ដូចជា Hua Wei និង ZTE ដែលបានបំពាក់ឧបករណ៍នៅនឹងកន្លែងរួចរាល់ហើយ។
បើគេសរុបគ្រប់ជំនាញ ទាំងខាងផ្លូវដែក ខាងចម្រាញ់ប្រេង និងហេដ្ឋារចនាសម្ព័ន្ធផ្សេងៗ ទាំងអស់មានក្រុមហ៊ុនចិនចំនួន៧៥ ជាមួយទឹកប្រាក់វិនិយោគសរុប ជាង១៨ពាន់លានដុល្លារដែលមានវត្តមាននៅក្នុងប្រទេសលីប៊ី មុនសង្រ្គាមបានផ្ទុះឡើង។ ប៉ុន្តែប្រឈមមុខនឹងស្ថានភាពបច្ចុប្បន្ន ចិនមានគម្រោងវិនិយោគច្រើនជាងមុន។ បើតាមអ្នកជំនាញ ការស្ថាបនាប្រទេសលីប៊ីឡើងវិញ ត្រូវការទឹកប្រាក់យ៉ាងហោចណាស់ ១០០ ពាន់លានដុល្លារ។
គួរបញ្ជាក់ថា តំបន់អាហ្រ្វិកបានក្លាយជាទិសដៅវិនិយោគដ៏សំខាន់របស់ទីក្រុងប៉េកាំងនាពេលបច្ចុប្បន្ន។ ក្រុមហ៊ុនវិនិយោគរបស់ចិនកាន់តែច្រើនឡើងបានមានវត្តមាននៅទីនោះដោយនាំទៅជាមួយបុគ្គលិក និងពលករចិនរាប់ម៉ឺននាក់។ បុគ្គលិក និងពលករចិនដែលជារឿយៗរស់នៅក្នុងស្ថានភាពគ្រោះថ្នាក់ នៅក្នុងប្រទេសដែលគ្មានស្ថិរភាពនយោបាយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ