អំពីការបោះឆ្នោតប្រធានាធិបតីឆ្នាំ២០១២
ទាំងលោកប្រធានាធិបតី Medvedev ទាំងលោកនាយករដ្ឋមន្ត្រី Poutine ទើបបានប្រកាសដូចគ្នា ថាអាចចូលប្រឡូករៀងៗខ្លួន ក្នុងការបោះឆ្នោតនេះ។ប៉ុន្តែម្នាក់ៗសុទ្ធតែនៅរង់ចាំមើល ស្ថានការណ៍សង្គម-សេដ្ឋកិច្ច និងនយោបាយក្នុងប្រទេសសិន។ សេចក្តីថ្លែងការណ៍របស់រដ្ឋបុរសរុស្ស៊ីទាំងពីរនាក់ ជាចម្លើយថ្មីតបនឹងសំណួរពីខាងអ្នកកាសែតជាតិ និងបរទេសដែលរមែងជីកសួរចង់ដឹងអំពីរឿងនេះ។
ចុះផ្សាយនៅថ្ងៃ៖
សេចក្តីរាយការណ៍របស់ កែវ ឆាយា ពីទីក្រុងម៉ូស្គូ
ម្សិលម៉្ងៃមុននឹងចេញដំណើរទៅបំពេញទស្សនកិច្ចរយៈពេល៥ថ្ងៃនៅប្រទេសចិន ដែលចាប់ផ្តើមតាំងពីម្សិលមិញមក ក្នុងសម្ភាសន៍នៅវិមានក្រេមឡាំងឲ្យទៅ “កាណាល់ទូរទស្សន៍សង់ត្រាល់របស់ចិន” CCTV តបនឹងសំណួរសមស្របរបស់អ្នកកាសែតចិន លោកប្រធានាធិបតី Medvedevថ្លែងថា ៖
- គាត់មិនបដិសេធឡើយ អំពីការចូលប្រឡូករបស់គាត់ក្នុងការបោះឆ្នោតឆ្នាំ២០១២ដើម្បីរើសប្រធានាធិបតីអាណត្តិថ្មីនៅរុស្ស៊ី។ សំរាប់ជាការកត់សំគាល់ អាណត្តិថ្មី នឹងពន្យារទៅរហូតដល់៦ឆ្នាំ ទល់នឹង៤ឆ្នាំសព្វថ្ងៃ។
លោក Medvedev លំអិតថា គឺក្នុងពេលឆាប់ៗខាងមុខទៅហើយ ដែលគាត់នឹងអារកាត់ក្នុងចិត្តឲ្យបានដាច់ស្រេច។ ការសម្រេចចិត្តនេះ នឹងយោងទៅលើកត្តាបី គឺ ទី១-វាត្រូវមានលក្ខណៈទុំជោរ -ទី២ អាស្រ័យទៅនឹងជម្រើសនយោបាយពីសំណាក់សង្គម -ទី៣ ថ្លឹងមើលភ័ព្វសំណាងខ្លួនឲ្យបានសព្វគ្រប់សិន។
ក្នុងសម្ភាសន៍នោះ លោក Medvedevក៏កត់សំគាល់ថា រូបគាត់និងលោក Poutineមានគោលដៅតែមួយដូចគ្នា គឺនាំនូវភាពចំរើនរុងរឿងដល់ប្រទេសជាតិ ប៉ុន្តែវិធីនិងមធ្យោបាយដែលរូបគាត់និងលោក Poutine ប្រកាន់យកសម្រាប់សមិទ្ធិគោលដៅនេះ គឺ ខុសគ្នាទេតើ ហេតុដែលឆ្លុះឲ្យឃើញពីលក្ខណៈប្រជាធិបតេយ្យមែនពិត។
ចំណែក លោកនាយករដ្ឋមន្ត្រី Poutine វិញ ម្សិលមិញក្រោយពីចប់ទៅ “សន្និបាតនៃបុគ្គលិកពេទ្យ ទូទាំងប្រទេស” ដោយឆ្លើយតបនឹងសំណួរ ទាក់ទងនឹងសាច់រឿងបោះឆ្នោតនោះ បានថ្លែងថា ៖
- ទាំងរូបគាត់ ទាំងរូបលោក Medvedev មិនបដិសេធឡើយ ថាម្នាក់ៗសុទ្ធតែអាចចូលប្រឡូកក្នុងការបោះឆ្នោតប្រធានាធិបតីនៅឆ្នាំក្រោយ ប៉ុន្តែការសម្រេចចិត្តដាច់ស្រេចនឹងត្រូវអនុម័ត គឺដោយយោងទៅលើស្ថានការណ៍សង្គម-សេដ្ឋកិច្ច-នយោបាយ ដែលនឹងកើតមានក្នុងប្រទេស ទៅទល់ពេលបោះឆ្នោតនោះ។
លោកPoutine គូសបញ្ជាក់ថា ទំរាំដល់ពេលនោះ គឺសល់ជិតមួយឆ្នាំទៀតឯណោះ។ តាមប្រសាសន៍គាត់ ៖ បើរូបគាត់ និងលោក Medvedevប្រកាសអំពីការសម្រេចចិត្តតាំងពីឥឡូវនោះ បរិយាកាសជ្រួលជ្រើម ក្នុងការងាររដ្ឋនឹងកើតឡើងពុំខាន ដ្បិតមន្ត្រីពាក់កណ្តាលក្នុងខុទ្ទកាល័យប្រធានាធិបតី និងមន្ត្រីជាងពាក់កណ្តាលដែរ ក្នុងរដ្ឋាភិបាល នឹងលែងធ្វើការតែម្តង ដោយនៅចាំអ៊ុតមើលតើនរណាដែលនឹងក្លាយទៅជាចៅហ្វាយគេនៅថ្ងៃក្រោយ។
រីឯ បក្សកាន់អំណាចនៅរុស្ស៊ី ឈ្មោះបក្ស Yedinaya Rossia ដែលមានរូបលោក Poutineជាប្រធានទើបថ្លែងថា ប្រសិនបើលោក Poutineមិនឈរឈ្មោះជាបេក្ខជនប្រធានាធិបតីទេ នោះបក្សនេះនឹងគាំទ្រ លោក Medvedev៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ