រដ្ឋាភិបាលភូមា និងក្រុមបះបោរមួយក្រុមធំយល់ព្រមបញ្ឈប់ការបាញ់គ្នា
បើយោងតាមការផ្សព្វផ្សាយរបស់ប្រព័ន្ធពត៌មានជាផ្លូវការនៅក្នុងស្រុក នៅថ្ងៃអាទិត្យនេះ កិច្ចព្រមព្រៀងឈប់បាញ់ជាផ្លូវការមួយ ត្រូវបានចុះហត្ថលេខាកាលពីថ្ងៃ សុក្រ២ ធ្នូ រវាងក្រុមប្រដាប់អាវុធដ៏សំខាន់របស់ជនជាតិភាគតិចមួយក្រុមធំ ដែលបានធ្វើការប្រយុទ្ធតស៊ូដើម្បីស្វ័យភាពរបស់ខ្លួនជាច្រើនទសវត្សមកហើយ និងអាជ្ញាធរតំបន់ សានស៊ូដ ភាគឦសាន នៃប្រទេស។
ចុះផ្សាយនៅថ្ងៃ៖ កែប្រែថ្ងៃទី៖
វាជាកិច្ចព្រមព្រៀង ដែលបានធ្វើឡើងក្រោមគំនិតផ្តូចផ្តើមរបស់ រដ្ឋាភិបាលភូមា ក្នុងន័យស្វែងរកការផ្សះផ្សាដោយសន្តិវិធីមួយ នេះបើតាមការអះអាងបន្ថែមរបស់កាសែតជាភាសាអង់គ្លេស New Light of Myanmar ។ សំរាប់អ្នកសង្កេតការណ៍មួយចំនួន វាជាសញ្ញានៃនយោបាយបើកចំហនៃរបប “ស៊ីវិលថ្មី” មួយ អោយក្រុមប្រឆាំងរបស់ខ្លួន។
គួរបញ្ជាក់ថា ចាប់តាំងពីទទួលបានឯករាជ្យនៅឆ្នាំ ១៩៤៨ មក ក្រុមជនជាតិភាគតិចជាច្រើន ដែលតំណាងអោយមួយភាគបី នៃប្រជាជនទូទាំងប្រទេស មិនធ្លាប់មានទំនាក់ទំនងល្អជាមួយអ្នកកាន់អំណាចនោះទេ។ សង្រ្គាមស៊ីវិលរវាងពួកគេបានអូសបន្លាយចាប់តាំងពីពេលនោះមក។
ទើបតែថ្មីៗនេះទេ ដែលរដ្ឋាភិបាលថ្មីភូមា មានឈ្មោះថា ស៊ីវិល ក៏ប៉ុន្តែនៅតែគ្រប់គ្រងដោយយោធាដដែលនោះ បានសំរេចបញ្ជូនរដ្ឋមន្រ្តីម្នាក់របស់ខ្លូនកាលពីខែមុន អោយទៅជួបចរចាជាមួយក្រុមបះបោរ។ ហើយគេមើលឃើញថា ចាប់តាំងពីរបបសឹកផ្តាច់ការរលាយរូបរាងបាត់ទៅ នៅខែមីនា រដ្ឋាភិបាលភូមាថ្មី បានចាប់ផ្តើមធ្វើកំណែទម្រង់ជាបន្តបន្ទាប់។
កន្លងទៅថ្មីៗនេះ លោក ថេន សេន ប្រធានាធិបតីប្រទេសនេះ ក៏បានចុះហត្ថលេខាយល់ព្រមលើច្បាប់មួយ ដែលអនុញ្ញាតអោយប្រជាជនធ្វើបាតុកម្ម។ ច្បាប់ដែលតម្រូវអោយរាយការណ៍ជូនអាជ្ញាធរ៥ថ្ងៃមុន បាតុកម្មនេះ ត្រូវបានរដ្ឋសភាអនុម័តកាលពីខែមុន។ នៅពេលមិនទាន់មានច្បាប់អនុញ្ញាត ការដង្ហែក្បួនបាតុកម្មមានតិចតួចណាស់ កន្លងមក ។ មហាបាតុកម្មចុងក្រោយដែលត្រូវបានបង្រ្កាបយ៉ាងឃោរឃៅដោយក្រុមយោធា គឺការក្រោកតវ៉ារបស់ព្រះសង្ឈ នៅឆ្នាំ២០០៧។
ការដោះលែងមេដឹកនាំបក្សប្រឆាំង លោកស្រី អ៊ុង សានសូជី ពីការឃុំឃាំងនៅក្នុងគេហដ្ឋានរបស់ខ្លូន និងការអនុញ្ញាតអោយគាត់បានវិលចូលទៅក្នុងឆាកនយោបាយវិញ ក៏ជាសញ្ញាវិជ្ជមានមួយដែរ។ ក៏ប៉ុនែ្តបើទោះបីជា លោកស្រី ហ៊ីលឡារី គ្លីនតុនរដ្ឋមន្រ្តីការបរទេសអាមេរិកបានអបអរសាទរចំពោះកំណែទម្រង់ទាំងនេះ នៅក្នុងដំណើរទស្សនកិច្ចជាប្រវត្តិសាស្រ្តរបស់គាត់នៅភូមា នៅសប្តាហ៍នេះក៏ដោយ ក៏សំរាប់គាត់ វាមិនទាន់គ្រប់គ្រាន់ក្នុងការដកចេញទណ្ឌកម្មសេដ្ឋកិច្ចពីប្រទេសមួយនេះដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ