បក្សសាធារណរដ្ឋនឹងប្តឹងលោកអូបាម៉ាពីបទរំលោភបំពានអំណាច
ចុះផ្សាយនៅថ្ងៃ៖
ស្តាប់ - ០៥:០២
នៅអាមេរិក លោកប្រធានាធិបតីបារ៉ាក់ អូបាម៉ា កំពុងប្រឈមនឹងការប៉ុនប៉ងប្តឹងពី ប្រធានក្រុមសមាជិកសភាមកពីគណបក្សសាធារណរដ្ឋ។ លោកJonh Boehner ចោទលោកបារ៉ាក់ អូបាម៉ាពីបទរំលោភអំណាច មិនគោរពរដ្ឋធម្មនុញ្ញអាមេរិក។ នៅប៉ុន្មានខែមុនការបោះឆ្នោតសភាពាក់កណ្តាលអាណត្តិដែលត្រូវរៀបចំនៅចុងឆ្នាំនេះ គណបក្សសាធារណរដ្ឋដែលមានសំឡេងភាគច្រើននៅសភាតំណាងរាស្រ្ត ចង់យកឱកាសប្តឹងលោកប្រធានាធិបតី ដើម្បី បំបាក់សំឡេងឆ្នោតរបស់គណបក្សប្រជាធិបតេយ្យរបស់លោកអូបាម៉ា នៅព្រឹទ្ធិសភាមួយទៀត។
ជាប្រធានាធិបតី ប៉ុន្តែ មិនអាចប្រើអំណាចរបស់ខ្លួន ជ្រុលហួសហេតុនោះទេ។ អាមេរិកមានច្បាប់ មានរដ្ឋធម្មនុញ្ញដែលបានចែងតម្រូវឲ្យប្រធានាធិបតីត្រូវសុំការអនុញ្ញាតិ យល់ព្រមពីសភា មុននឹងសម្រេចអនុវត្តនយោបាយអ្វីមួយ។ ប៉ុន្តែ សម្រាប់សមាជិកសភាអ្នកតំណាងរាស្រ្តអាមេរិក នៅក្នុងអាណត្តិរបស់ខ្លួន លោក បារ៉ាក់ អូបាម៉ាបានរំលោភ ប្រើអំណាចប្រធានាធិបតីច្រើនជ្រុល ម្តងហើយ ម្តងហើយ និងមិនបានគោរពសភា តាមការចែងរបស់រដ្ឋធម្មនុញ្ញទេ។
កាលពីចុងខែមិថុនា លោកJohn Boehner ប្រធានក្រុមគណបក្សសាធារណរដ្ឋ ដែលគ្រប់គ្រងសភាអ្នកតំណាងរាស្រ្ត បានប្រកាសប្រាប់អ្នកកាសែតថា លោកនឹងប្តឹងលោកប្រធានាធិបតីអូបាម៉ាទៅតុលាការ ពីបទរំលោភបំពានអំណាច។ ក្រុមសាធារណរដ្ឋខឹងនឹងលោកអូបាម៉ាដែលចេះតែប្រើអំណាចចេញក្រឹត្យ ដោយមិនចាំបាច់រង់ចាំ ការអនុម័តច្បាប់ពីសភា។ ក្រុមសាធារណដ្ឋនៅសភាបានបន្ទោសលោកអូបាម៉ាទៅលើរឿងកំណែទម្រង់ច្បាប់សុខភាព ការផ្តល់លិខិតស្នាមដល់ក្រុមជនបរទេស ដែលគ្មានក្រដាសស្នាម ឬការផ្តល់អំណាចដល់អាជ្ញាធរបរិស្ថាន ដើម្បីកាត់បន្ថយឧស្ម័នជាតិពុល។ តាមក្រុមសាធារណរដ្ឋ លោកអូបាម៉ាបានចេញក្រឹត្យដើម្បីដោះស្រាយបញ្ហាខាងលើ ដោយមិនបានសុំយោបល់ពីសភា។
កាលពីពេលថ្មីៗនេះ រដ្ឋាភិបាលអាមេរិកបានសម្រេចដោះលែងអ្នកទោសតាលីបង់៥នាក់ ជាថ្នូរនឹងការដោះលែងមកវិញនូវទាហានអាមេរិកាំង ដែលពួកតាលីបង់ នៅអាហ្វហ្កានីស្ថានចាប់ខ្លួន។ ក្រុមសាធារណរដ្ឋបានបន្ទោសលោកអូបាម៉ាខ្លាំងៗ ថា ហ៊ានសម្រេចដោះដូរអ្នកទោសតាលីបង់ ដោយមិនបានប្រាប់ ឬសុំការអនុញ្ញាតិពីសភា។
ភស្តុតាងមួយទៀតដែលបង្ហាញថា លោកអូបាម៉ាមិនគោរពរដ្ឋធម្មនុញ្ញ គឺកាលពីសប្តាហ៍មុន តុលាការកំពូលអាមេរិកទើបវិនិច្ឆ័យថា លោកអូបាម៉ាបានរំលោភរដ្ឋធម្មនុញ្ញដោយបានតែងតាំងមន្រ្តីក្នុងគណៈកម្មការជាតិរបស់រដ្ឋាភិបាល ដោយមិនសុំឆ្លងយោបល់ពីព្រឹទ្ធិសភា។
ហេតុអ្វីបានជាលោកអូបាម៉ាហ៊ានល្មើសនឹងច្បាប់រដ្ឋធម្មនុញ្ញ? ដោយពិតទៅ ច្បាប់ក៏បានចែងផងដែរ អនុញ្ញាតឲ្យប្រធានាធិបតីមានអំណាចចេញក្រឹត្យដើម្បីដោះស្រាយបញ្ហា ដោយមិនចាំបាច់សុំយោបល់ពីអំណាចនិតិបញ្ញត្តិ។ ប៉ុន្តែ អំណាចចេញក្រឹត្យរបស់ប្រធានាធិបតីមានដែនកំណត់ គឺទៅតាមមុខ ផ្នែក មួយចំនួនតែប៉ុណ្ណោះ។
ដោយពិតទៅ លោកអូបាម៉ាចង់បានណាស់ច្បាប់ ចេញពីសភា។ ប៉ុន្តែ រាល់ច្បាប់ ឬគម្រោងទាំងឡាយដែលលោកអូបាម៉ាស្នើឡើង ត្រូវជាប់កកស្ទះ មិនអាចចេញរួចពីសភា។ ជាក់ស្តែង ក្រុមបក្សសាធារណរដ្ឋដែលមានសំឡេងភាគច្រើននៅសភាតែងតែបោះឆ្នោតប្រឆាំងមិនឲ្យច្បាប់ដែលលោកអូបាម៉ាស្នើ ចេញរួច។ គឺដោយសារធុញទ្រាន់ នឹងការបោះឆ្នោតប្រឆាំងរបស់ក្រុមសាធារណរដ្ឋ នៅសភានោះហើយ ទើបលោកអូបាម៉ាបែរជាប្រើអំណាចប្រធានាធិបតីដើម្បីចេញក្រឹត្យដាក់ឲ្យអនុវត្តវិធានការនានា ដោយមិនចាំបាច់រង់ចាំច្បាប់ដែលនឹងគ្មានថ្ងៃចេញរួច ដរាបណាក្រុមបក្សសាធារណរដ្ឋនៅកាន់កាប់រដ្ឋសភា។
នៅក្រោយប្រធានក្រុមបក្សសាធារណរដ្ឋប្រកាសថា នឹងធ្វើពាក្យបណ្តឹង នៅខែកក្កដា នេះ លោកអូបាម៉ាមិនបានចាញ់គំរាមកំហែង និងជំរុញឲ្យបក្សប្រឆាំងប្តឹងលោកថែមទេ។ លោកបាននិយាយបញ្ឈឺទៅវិញថា ប្រជាជនអាមេរិកថ្នាក់មធ្យមមិនអាចរង់ចាំច្បាប់ដែលក្រុមសាធារណរដ្ឋត្រូវអនុម័តទេ។ តាមលោកអូបាម៉ា ដរាបណាក្រុមសាធារណរដ្ឋអសកម្ម មិនធ្វើអ្វីសោះ នៅសភា នោះ លោកក៏នឹងមិនបង្អន់ដៃ ចេញក្រឹត្យ ដើម្បីជំនួសច្បាប់របស់សភាដែរ។
ភាពតានតឹង និងជម្លោះដណ្តើមអំណាច គ្នា រវាងរដ្ឋាភិបាល និងសភាតែងតែកើតមានជានិច្ច នៅគ្រប់សម័យកាល នៅអាមេរិក។ វាអាចកើតមានឡើង នៅពេលរដ្ឋាភិបាល និងសភា មានប្រភពមកពីគណបក្សពីរប្រឆាំងគ្នា។ ជាក់ស្តែង សភាអ្នកតំណាងរាស្រ្តអាមេរិកគ្រប់គ្រងដោយបក្សសាធារណរដ្ឋ ចំណែករដ្ឋាភិបាល និងព្រឹទ្ធសភាគ្រប់គ្រងដោយបក្សប្រជាធិបតេយ្យ។ ជម្លោះរវាងអំណាចប្រតិបត្តិ និងអំណាចនិតិប្រតិបត្តិក៏ធ្លាប់កើតមានរួចហើយដែរ នៅក្នុងរដ្ឋបាលលោកប៊ូស ដែលមកពី គណបក្សសាធារណរដ្ឋ។ នៅសម័យនោះ អំណាចប្រធានាធិបតីត្រូវបានពង្រឹង និងកើនឡើងខ្លាំង។ ប្រធានាធិបតីជាអ្នកសម្រេចធ្វើសង្រ្គាម នៅអ៊ីរ៉ាក់ សភាប្រឆាំង ប៉ុន្តែ ក្រោយមកក៏យល់ព្រមធ្វើច្បាប់ស្របតាមដោយហេតុផលសន្តិសុខនៅអាមេរិក នៅក្រោយអំពើភេរវកម្ម ឆ្នាំ ២០០១ នៅទីក្រុងញូវយ៉ក។
លើកនេះ ពាក្យបណ្តឹងប្តឹងលោកអូបាម៉ាអាចចេញរូបរាងបានដរាបណាសភាយល់ព្រមបោះឆ្នោតដើម្បីអនុញ្ញាតឲ្យគេអាចប្តឹងលោកអូបាម៉ា។ ដំណើរពាក្យបណ្តឹងប្រឆាំងនឹងប្រធានាធិបតីទៀតសោតក៏ត្រូវការពេលវេលាវែង។ និយាយចំលោកអូបាម៉ានឹងអាចរងគ្រោះថ្នាក់ដោយសារបណ្តឹងរបស់បក្សសាធារណរដ្ឋឡើយ ផ្ទុយទៅវិញ លោកនឹងអាចកេងចំណេញពីបណ្តឹងលើកនេះ ដើម្បីអាចបង្ហាញថា លោកជាអ្នកធ្វើការ ហើយគឺក្រុមសាធារណរដ្ឋនៅសភា ដែលមិនធ្វើការ មិនអនុម័តច្បាប់អ្វីទាំងអស់។ បើដូច្នេះមែន លោកអូបាម៉ានឹងអាចស្តារប្រជាប្រិយភាពរបស់លោក ដែលកំពុងធ្លាក់ចុះដោយសាររឿងសេដ្ឋកិច្ច ឬនយោបាយការបរទេស ឲ្យឡើងខ្ពស់ឡើងវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ