លោកអូបាម៉ាសន្យាចេញក្រឹត្យដំឡើងប្រាក់ឈ្នួលអប្បបរមា
ចុះផ្សាយនៅថ្ងៃ៖
ស្តាប់ - ០៤:២៥
កាលពីយប់ថ្ងៃអង្គារ លោកអូបាម៉ាបានថ្លែងសុន្ទរកថាប្រចាំឆ្នាំ (State of the Union) នៅចំពោះមុខសភាពេញអង្គអាមេរិក។ ជាសន្ទុរកថា ដែលផ្តោតសំខាន់ទៅលើនយោបាយក្នុងប្រទេស។ លោកអូបាម៉ាបានប្រកាសថាលោកនឹងចេញក្រឹត្យមួយ ដំឡើងប្រាក់ឈ្នូលអប្បបរមានៃបុគ្គលិករដ្ឋសហព័ន្ធ ហើយបានជំរុញឲ្យសភាអនុម័តច្បាប់ ដើម្បីដំឡើងប្រាក់ឈ្នួលអប្បបរមាដល់និយោជិតទូទៅ នៅទូទាំងប្រទេស។
នៅក្នុងសន្ទុរកថាប្រចាំឆ្នាំនេះ លោកអូបាម៉ាបានលើកឡើងពីបញ្ហាអន្តរជាតិមួយចំនួន ដូចជា អ៊ីរ៉ង់ អាហ្វហ្កានីស្ថាន មន្ទីរឃុំឃាំងនៅ Guantanamo ការប្រែប្រួលអាកាសធាតុ ជាដើម។ ក៏ប៉ុន្តែ អ្វីដែលជាអាទិភាពខ្ពស់ជាងគេ នៅក្នុងសន្ទុរកថាជាង១ម៉ោងនេះ គឺលោកអូបាម៉ាផ្តោតទៅលើនយោបាយក្នុងស្រុក ជាពិសេស ទាក់ទងនឹងបញ្ហាសេដ្ឋកិច្ច និងសង្គម។
លោកអូបាម៉ាបានរិះគន់សភាអាមេរិក ដែលមិនព្រមអនុម័តច្បាប់ដំឡើងប្រាក់ឈ្នួលអប្បបរមា ហើយបានប្រកាសថា លោកនឹងចេញក្រឹត្យមួយខ្លួនឯង ដើម្បីដំឡើងប្រាក់ឈ្នួលអប្បបរមារបស់បុគ្គលិក ដែលបម្រើការឲ្យរដ្ឋាភិបាលសហព័ន្ធ ពី ៧,២៥ដុល្លារ ទៅ ១០,១០ដុល្លារក្នុងមួយម៉ោង ពោលគឺ កើនឡើង ជិត ៤០%។
ក្នុងឋានៈជាប្រធានាធិបតី លោកអូបាម៉ាមានអំណាចចេញក្រឹត្យដំឡើងប្រាក់ឈ្នួលអប្បបរមា តែចំពោះបុគ្គលិក ដែលបម្រើការឲ្យរដ្ឋាភិបាលសហព័ន្ធប៉ុណ្ណោះ ដោយមិនអាចប៉ះពាល់ដល់ប្រាក់ឈ្នួលអប្បបរមារបស់និយោជិតទូទៅ នៅទូទាំងប្រទេសបានទេ។
ការដំឡើងប្រាក់ឈ្នួលអប្បបរមា ដែលលោកអូបាម៉ាបានសន្យា នៅក្នុងសន្ទុរកថាប្រចាំឆ្នាំនេះ ទាក់ទងតែនឹងបុគ្គលិកមួយផ្នែកតូចមួយប៉ុណ្ណោះ។ ក៏ប៉ុន្តែ វាជាកាយវិកាដែលមានតម្លៃជាសារនយោបាយដ៏សំខាន់មួយ ដើម្បីបង្ហាញថា ការដំឡើងប្រាក់ឈ្នួលអប្បបរមា គឺជាអាទិភាពដ៏ធំមួយរបស់លោកអូបាម៉ា ក៏ដូចជា របស់គណបក្សប្រជាធិបតេយ្យ។ ប្រសិនបើការដំឡើងប្រាក់ឈ្នួលអប្បបរមានេះមិនអាចធ្វើទៅបាននៅទូទាំងប្រទេស គឺមកពីសមាជិកសភាគណបក្សសាធារណរដ្ឋ ដែលមានសំឡេងភាគច្រើននៅរដ្ឋសភា ដែលជាអ្នកជំទាស់មិនឲ្យច្បាប់នេះចេញរួច។
ស្របនឹងពេលដែលការបោះឆ្នោតសភាពាក់កណ្តាលអាណត្តិ ជិតឈានចូលមកដល់ នេះគឺជាសារនយោបាយដ៏សំខាន់មួយ ទៅកាន់សមាជិកសភាមកពីគណបក្សសាធារណរដ្ឋ និងជាពិសេស ទៅកាន់ពលរដ្ឋអាមេរិកជាទូទៅ។
តាំងពីដើមមក គេសង្កេតឃើញថា នៅរាល់ការបោះឆ្នោតពាក់កណ្តាលអាណត្តិម្តងៗ គណបក្សរបស់ប្រធានាធិបតីច្រើនតែត្រូវបាត់បង់សំឡេង នៅក្នុងសភា។
រហូតមកទល់នឹងពេលនេះ គណបក្សសាធារណរដ្ឋ ដែលជាបក្សប្រឆាំង បានកាន់កាប់សំឡេងភាគច្រើន នៅរដ្ឋសភារួចទៅហើយ ដោយកាន់កាប់អាសនៈច្រើនជាងគណបក្សប្រជាធិបតេយ្យរហូតដល់ទៅ ៣៣អាសនៈ។ គណបក្សប្រជាធិបតេយ្យក៏មិនរំពឹងថានឹងអាចដណ្តើមកាន់កាប់រដ្ឋសភាបានមកវិញដែរ នៅក្នុងការបោះឆ្នោត នៅខែវិច្ឆិកានេះ។
អ្វីដែលលោកអូបាម៉ា និងគណបក្សប្រជាធិបតេយ្យខិតខំធ្វើនៅពេលនេះ គឺព្យាយាមធ្វើយ៉ាងណារក្សាសំឡេងភាគច្រើននៅក្នុងព្រឹទ្ធសភាឲ្យបាន។ បើមិនដូច្នោះទេ លោកអូបាម៉ាប្រាកដជានឹងត្រូវចំណាយពេលពីរឆ្នាំចុងក្រោយនៃអាណត្តិរបស់លោក ប្រឈមមុខនឹងសភា ដែលស្ថិតក្រោមការកាន់កាប់របស់គណបក្សប្រឆាំងទាំងស្រុង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ