ថៃព្រមបើកច្រកអានសេះវិញ ទាហានថ្មើរជើងកម្ពុជាធ្វើសមយុទ្ធ
នៅរសៀលថ្ងៃពុធនេះ យោធាថៃបានបើកច្រកអានសេះនៅខាងកើតប្រាសាទព្រះវិហារវិញហើយ បន្ទាប់ពីពួកគេបានសម្រេចបិទច្រកនេះជាឯកតោកាលពីថ្ងៃម្សិលមិញ។ការបើកច្រកធ្វើឡើងក្រោយការសម្របសម្រួលគ្នារវាងអាជ្ញាធរកម្ពុជា និងថៃ។ នេះជាព្រឹត្តិការណ៍តានតឹងដ៏កម្រមួយនៅតំបន់ព្រំដែន ខណៈរដ្ឋាភិបាលកម្ពុជា និងរដ្ឋាភិបាលថៃរបស់លោកស្រីយីងឡាក់ ស៊ីណាវ៉ាត់បានព្យាយាមធ្វើអោយស្ថានភាពព្រំដែនមានសភាពស្ងប់ស្ងាត់យ៉ាងយូរនោះ។
ចុះផ្សាយនៅថ្ងៃ៖
ស្តាប់ - ០១:៤៩
សមត្ថកិច្ចព្រំដែនថៃបានយល់ព្រមបើកច្រកអានសេះក្នុងខេត្តព្រះវិហារវិញហើយនៅរសៀលថ្ងៃពុធទី២៦ធ្នូនេះ ក្រោយការចរចាររវាងអាជ្ញាធរកម្ពុជា និងថៃនោះ។ យោងតាមសារព័ត៌មានក្នុងស្រុក ភាគីថៃដែលមិនសប្បាយចិត្តនឹងសមត្ថកិច្ចកម្ពុជាដែលលើកស្លាកទីស្នាក់ការមួយ ដែលអាជ្ញាធរកម្ពុជាអះអាងថាស្ថិតនៅក្នុងទឹកដីកម្ពុជាក៏ដោយនោះ បានបិទច្រកអានសេះនេះ ជាឯកតោភាគីកាលពីថ្ងៃអង្គារម្សិលមិញ។ ច្រកអានសេះស្ថិតនៅចំងាយប្រមាណ៤០គីឡូម៉ែតខាងកើតប្រសាទព្រះវិហារ។
វិទ្យុបារាំងអន្តរជាតិមិនអាចទាក់ទងលោកគ្រួច សម្បត្តិដែលជាប្រធានច្រកអាន សេះដើម្បីបញ្ជាក់អំពីស្ថានភាពទូទៅនៅច្រកព្រំដែនអានសេះនោះទេ។ ប៉ុន្តែយោងតាមប្រភពព័ត៌មានរបស់គេហទំព័រ CEN សមត្ថកិច្ចព្រំដែនថៃបានអះអាងថា ទីកន្លែងដែលភាគីកម្ពុជាលើស្លាកស្នាក់ការមួយនោះ គឺស្ថិតនៅក្នុងតំបន់ជម្លោះ។ តែថា អាជ្ញាធរកម្ពុជាបញ្ជាក់ច្បាស់ថា ទីតាំងស្នាក់ការនោះគឺស្ថិតនៅក្នុងទឹកដីកម្ពុជាយ៉ាងពិតប្រាកដ។
នេះគឺជាឧប្បតិហេតុដ៏កម្រមួយដែលកើតមាននៅតំបន់ព្រំដែន បន្ទាប់ពីភាគីទាំងពីរបានរក្សាភាពស្ងប់ស្ងាត់យ៉ាងយូរ។ ពិសេសក្រោយប្រទេសថៃស្ថិតនៅក្រោមការដឹកនាំរបស់លោកស្រីនាយករដ្ឋមន្ត្រីយីងឡាក់ ស៊ីណាវ៉ាត់ ដែលជាប្អូនស្រីរបស់លោកថាក់ស៊ីន ស៊ីណាវ៉ាត់។
បើទោះជាស្ថានភាពស្ងប់ស្ងាត់ល្អក៏ដោយ ក៏ប៉ុន្តែការហ្វឹកហាត់ពង្រឹងសមត្ថភាពយោធាកម្ពុជាដើម្បី ការពារបូរណភាពទឹកដីនោះ មិនបានអាក់ខានឡើយ។ កាលពីថ្ងៃអង្គារម្សិលមិញលោកនាយឧត្តមសេនីយ៏ គន់ គីម អគ្គមេបញ្ជាការរងកងយោធពលខេមរភូមិន្ទបានទស្សនកិច្ចការធ្វើលំហាត់យុទ្ធដំណើររបស់អង្គភាពកងពលតូចអន្តរាគមន៏លេខ៤ លេខ៥ និង កងពលតូចលេខ៤២។ នៅចំពោះមុខយោធាកម្ពុជា លោកគន់ គីមនៅតែបញ្ជាក់ឡើងវិញអោយពួកគេចងចាំ និងគោរពបទបញ្ជាលោកនាយករដ្ឋមន្ត្រីហ៊ុន សែន ដែលមិនចង់ឃើញកម្ពុជាបាត់បង់ដីមួយមីល្លីម៉ែត្រឡើយនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ