កម្ពុជានិងថៃបន្តជជែកអំពីការដកទ័ពនៅព្រំដែនព្រះវិហារ
ក្រុមការងារចម្រុះភាគីកម្ពុជាបានចេញដំណើរទៅប្រទេសថៃនៅថ្ងៃនេះ ដើម្បីបន្តជជែកអំពីការដកកងទ័ពចេញពីព្រំដែនប្រាសាទព្រះវិហារ។ ក្រុមការងារនេះដឹកនាំដោយលោកនាង ផាត រដ្ឋលេខាធិការក្រសួងការពារជាតិ។ លោកនាយករដ្ឋមន្ត្រីហ៊ុន សែននៅថ្ងៃនេះក៏បានថ្លែងអោយតម្លៃចំពោះសន្តិភាពនៅតាមតំបន់ព្រំដែនផងដែរ ដើម្បីការអភិវឌ្ឍ និងវិបុលភាពរបស់ពលរដ្ឋដែលរស់នៅតាមព្រំដែននោះ។
ចុះផ្សាយនៅថ្ងៃ៖
ស្តាប់ - ០២:២១
ក្រុមការងារចម្រុះកម្ពុជាថៃបានផ្តើមជួបគ្នាលើកទី៣នៅថ្ងៃនេះ នៅក្នុងប្រទេសថៃ ដើម្បីបន្តជជែកអំពីផែនការដកកងទ័ពបណ្តោះអាសន្នចេញពីតំបន់ព្រំដែនប្រាសាទព្រះវិហារ។ ក្រុមការងារភាគីកម្ពុជាដែលដឹកនាំដោយនាយឧត្តមសេនីយ៍ នាង ផាតបានចាកចេញពីកម្ពុជានៅព្រឹកថ្ងៃចន្ទទី១៧ធ្នូនេះហើយ ដើម្បីចូលរួមក្នុងការកិច្ចប្រជុំរយៈពេល២ថ្ងៃនោះ។
ការងារដោះមីន និងការជជែកអំពីយន្តការនៃការអញ្ជើញអ្នកសង្កេតការណ៍អោយត្រួតពិនិត្យតំបន់ដែលត្រូវដកកងទ័ពបណ្តោះអាសន្ននោះ គឺជារបៀបវារៈសំខាន់នៃកិច្ចប្រជុំលើកទី៣នៃក្រុមការងារចម្រុះកម្ពុជាថៃនេះ។ នេះគឺជាការបញ្ជាក់របស់លោកនាង ផាតនៅក្នុងសន្និសីទកាសែត នៅឯអាកាសយាន្តដ្ឋានអន្តរជាតិភ្នំពេញ មុនលោកដឹកនាំប្រតិភូចាកចេញពីកម្ពុជាកាលពីព្រឹកថ្ងៃចន្ទនេះ។
លោកនាយឧត្តមសេនីយ៍បានបញ្ជាក់ថា ភាគីទាំងពីរត្រូវជជែកព្រមព្រៀងគ្នាក្នុងការដោះមីននៅក្នុងតំបន់អាទិភាពដែលត្រូវដកកងទ័ពបណ្តោះអាសន្ននៅព្រំដែនប្រាសាទព្រះវិហារតែប៉ុណ្ណោះ។ គឺមិនមែនជាការដោះមីននៅគ្រប់កន្លែងតាមព្រំដែននៅឡើយទេ។
ការជជែកជាទ្វេភាគីអំពីការកែសម្រួលកងទ័ពចេញពីតំបន់ព្រំដែនប្រាសាទព្រះវិហាររវាងក្រសួងការពារជាតិទាំងពីរបានស៊ីពេលយ៉ាងយូរ និងទៅមុខយ៉ាងយឺតបំផុត តាមនីតិវិធីនោះ។ ប៉ុន្តែ ពេលខ្លះការដកកងទ័ពដែលធ្វើឡើងតាមឆន្ទៈនោះ វាបានប្រព្រឹត្តទៅយ៉ាងងាយ និងលឿនបំផុតទៅវិញ។ ឧទាហរណ៍ដូចជានៅពាក់កណ្តាលខែកក្កដា នៅពេលកម្ពុជាបញ្ចប់កិច្ចប្រជុំរដ្ឋមន្ត្រីការបរទេសអាស៊ាន កម្ពុជាបានប្រកាសជាឯកតោភាគីកែសម្រួលកងទ័ពរបស់ខ្លួនចំនួន៤៨៦នាក់ចេញពីតំបន់ប្រសាទព្រះវិហារ។
ប៉ុន្តែ ទោះយ៉ាងណាក៏ដោយ លោកនាង ផាត ដែលជាប្រធានក្រុមការងារចម្រុះ បានពន្យល់ថា ការជួបគ្នារវាងក្រុមការងារកម្ពុជាថៃស្តីពីការអនុវត្តដីកាបង្គាប់របស់តុលាការយុត្តិធម៌អន្តរជាតិគឺជាសញ្ញាល្អមួយដែលបង្ហាញអំពីសុឆន្ទៈនៃរដ្ឋាភិបាលជិតខាងទាំងពីរ កម្ពុជាថៃ ក្នុងការជំរុញ និងលើកស្ទួយព្រំដែនសន្តិភាព។
ទាក់ទងនឹងប្រធានបទព្រំដែនសន្តិភាពនេះ លោកនាយករដ្ឋមន្ត្រីដែលបានទៅសម្ពោធតំបន់សេដ្ឋកិច្ចពិសេសនៅខេត្តកោះកុងក្បែរព្រំដែនដែនថៃនៅព្រឹកថ្ងៃចន្ទនេះ ក៏បានថ្លែងផ្តល់សារៈសំខាន់ចំពោះព្រំដែនសន្តិភាពនេះផងដែរ។ ចំពោះលោកប្រមុខរដ្ឋាភិបាលកម្ពុជា ព្រំដែនសន្តិភាពនេះហើយ ដែលបង្កើតអោយមានវិបុលភាពចំពោះជីវភាពប្រជាជនទាំងពីរ ហើយបានទាក់ទាញវិនិយោគិនបរទេសអោយមកបោះទុននៅទីនោះទៀតផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ