ការផ្ទុះគ្រាប់បែកអត្តឃាត នៅទីក្រុងកាប៊ូល សម្លាប់មនុស្ស៧នាក់
កាលពីព្រឹកថ្ងៃចន្ទទី ១០ មិថុនា មានការបំផ្ទុះគ្រាប់បែកអត្តឃាត នៅទីក្រុងកាប៊ូល ប្រទេសអាហ្កានីស្ថាន។មនុស្សចំនួន7នាក់បានស្លាប់ ក្នុងហេតុការណ៍នេះ ក្នុងនោះរួមមានប៉ូលីសជនស៊ីវិល និង ក្រុមសកម្មជនប្រយុទ្ធតាលីបង់។ ពួកតាលីបង់បានប្រកាសទទួលខុសត្រូវចំពោះការវាយប្រហារលើកនេះ។
ចុះផ្សាយនៅថ្ងៃ៖
ស្តាប់ - ០១:៤៦
កាលពីព្រឹកព្រលឹមស្រាងៗ ក្នុងថ្ងៃចន្ទទី ១០ មិថុនា ក្រុមសកម្មប្រយុទ្ធ តាលីបង់បានបំផ្ទុះគ្រាប់បែកអត្តឃាត នៅក្បែរព្រលានយន្តហោះក្នុងក្រុងកាប៊ូល និងមានការបាញ់ប្រហារយ៉ាងកញ្រ្ជោល ក្នុងរដ្ឋធានី។ ប៉ូលីសម្នាក់ ប្រជាជនស៊ីវិល ពីរនាក់ និងក្រុមសកម្មប្រយុទ្ធអត្តឃាតទាំង ៤នាក់បានស្លាប់ នៅក្នុងការវាយប្រហារនោះ។
ការបំផ្ទុះដ៏មានសំលេងខ្លាំងក្លា និងការផ្ទុះអាវុធធុនតូចបានកើតឡើងយ៉ាងហោចណាស់រយៈពេល90នាទី និងបន្តរហូត ដែលធ្វើអោយស្ថានទូតអាមេរិចប្រុងជើងដើម្បីការពារខ្លួន។ មេប៉ូលីសក្រុងកាប៊ូល លោក Hasmat Stanikzai បាននិយាយ ក្នុងសេចក្តីថ្លែងការណ៍ ថា ការផ្ទុះមួយនេះបានកើតឡើង បន្ទាប់ពីក្រុមវាយប្រហារដោយគ្រាប់បែកបានចូលទៅក្នុង អគារដែលឋិតនៅលើដងវិថីQasaba ខាងលិចព្រលានយន្តហោះកាប៊ូល ហើយពួកគេបានចាប់ផ្តើមធ្វើការបាញ់ប្រហារ។
ឥលូវនេះ ក្នុងតំបន់នោះកងកម្លាំងសន្តិសុខបានការពារមិនអោយប្រជាជនចូលទៅ ហើយការប្រឈមមុខដាក់គ្នា រវាងកងកម្លាំងសន្តិសុខ និងពួកឧទ្ទាម នៅតែបន្ត។ លោក stanikzai បាននិយាយថា លោកមិនអាចបញ្ជាក់បានទេថា ការវាយប្រហារនេះមានគោលដៅជាក់លាក់នៅទីណាទេ តែការផ្ទុះ គឺកើតឡើង នៅក្បែរព្រលានយន្តហោះក្នុង ភាគឦសានរដ្ឋធានី។
ក្រុមឧទ្ទាមតាលីបង់បានប្រកាសទទួលខុសត្រូវលើការវាយប្រហារ បន្តបន្ទាប់នៅព្រលានយន្តហោះ កាប៊ូល ក្នុងថ្ងៃចន្ទនេះ។ ពួកគេបាននិយាយថា ក្រុមខ្មាន់កាំភ្លើងមានគោលដៅវាយលើយោធា។ អ្នកនាំពាក្យក្រុមតាលីបង់ លោកzabihulla Mujahid បាននិយាយប្រាប់ទីភ្នាក់ងារព័ត៌មានបារាំងAFP ថា ពួកគេប្រកាសទទួលខុសត្រូវលើហេតុការណ៍នេះ។ នៅព្រឹកថ្ងៃចន្ទ ទី ១០មិថុនា នេះក្រុមMujahedeen បានវាយប្រហារលើតំបន់យោធានៃព្រលានយន្តហោះ កាប៊ូល។
ក្នុងដំណាក់កាលដែលក្រុមទាហានប្រយុទ្ធរបស់អង្គការNATO នឹងដកចេញ ក្នុងដំណាច់ ឆ្នាំ2014 ប្រសិទ្ធភាពនៃកងម្លាំងសន្តិសុខមានសារៈសំខាន់ណាស់សម្រាប់រដ្ឋាភិបាលអាហ្កានីស្ថាន ក្នុងការបង្ក្រាបក្រុមឧទ្ទាមតាលីបង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ