ក្រុមតាលីបង់វាយប្រហារកុងស៊ុលអាមេរិកនៅភាគខាងលិចអាហ្វហ្កានីស្ថាន
នៅថ្ងៃសុក្រនេះ ក្រុមឧទ្ទាមតាលីបង់បានវាយប្រហារកុងស៊ុលអាមេរិក នៅខេត្តហេរ៉ាត ក្នុងប្រទេសអាហ្វហ្កានីស្ថាន បណ្តាលអោយមានមនុស្សស្លាប់ម្នាក់ និង១៨នាក់ផ្សេងទៀតរងរបួស។ គ្មានជនជាតិអាមេរិកណាម្នាក់ត្រូវបានស្លាប់ រឺរងរបួសក្នុងការវាយប្រហារនេះទេ។ ជនរងគ្រោះសុទ្ធតែជាជនជាតិអាហ្វហ្កានីស្ថាន។ ដោយឡែក ក្នុងឱកាសរំលឹកខួបភេរវកម្មខែកញ្ញាឆ្នាំ២០១១ នៅអាមេរិកនោះ មេដឹកនាំក្រុមអាល់កៃដាថ្មី អៃម៉ាន អាល់ហ្សាវ៉ាហ៊ីរី បានអំពាវនាវអោយមានការវាយប្រហារជាទ្រង់ទ្រាយតូចៗប្រឆាំងទៅនឹងអាមេរិក និងមិនអោយមានការរាប់រកបណ្តាប្រទេសសម្ព័ន្ធមិត្តអាមេរិកផងដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២៩
នៅព្រឹកព្រហាម ថ្ងៃសុក្រនេះ នៅភាគខាងលិចប្រទេសអាហ្វហ្កានីស្ថាន ក្រុមឧទ្ទាមតាលីបង់៧នាក់ បាននាំគ្នាបំផ្ទុះរថយន្តមួយគ្រឿង នៅជិតកុងស៊ុលអាមេរិក ក្នុងខេត្តហេរ៉ាត។ ហើយរថយន្តមួយគ្រឿងទៀត បានត្រូវដុតឆេះ នៅពីមុខអគារកុងស៊ុល។ នេះបើយោងតាមលោក អាប់ឌុល ហាមីឌ ហាមេឌី អនុប្រធានផ្នែកសន្តិសុខខេត្តហេរ៉ាត។
ក្រុមឧទ្ទាម៥នាក់ និងក្រុមសន្តិសុខបានបាញ់ប្រឈមមុខគ្នា ហើយក្រុមឧទ្ទាមទាំងអស់នោះត្រូវបានសម្លាប់។ ការវាយប្រហារកុងស៊ុលអាមេរិក នៅថ្ងៃសុក្រនេះ មិនបានធ្វើអោយជនជាតិអាមេរិកណាមួយ ត្រូវស្លាប់រឺរងរបួសនោះទេ តែបានសម្លាប់អ្នកយាមកាមអាហ្វហ្កានីស្ថានម្នាក់ និងបង្ករបួសដល់អ្នកយាមកាមពីរនាក់ និងប៉ូលិសពីរនាក់ផ្សេងទៀត។
អ្នកនាំពាក្យតាលីបង់ ការី យូស៊ុហ្វ អាម៉ាឌី បានចេញមុខប្រកាសថា ក្រុមតាលីបង់ជាអ្នកបង្កភេរវកម្មនេះ ដើម្បីបង្ហាញថា ជនជាតិអាមេរិកគ្មានសុវត្ថិភាពសន្តិសុខ នៅអាហ្វហ្កានីស្ថាននោះទេ។ លោក ចេម ឃុននិងហ្កាំ ឯកអគ្គរដ្ឋទូតអាមេរិកនៅអាហ្វហ្កានីស្ថាន បានថ្កោលទោសភេរវកម្មនេះថា ជាការស្រោចឈាមជនជាតិអាហ្វហ្កនីស្ថានលើទឹកដីអាហ្វហ្កានីស្ថានតែម្តង។
ខេត្តហេរ៉ាតជាប់ព្រំប្រទល់ជាមួយអ៊ីរ៉ង់ ជាខេត្តសេដ្ឋកិច្ចសំខាន់ នៅភាគខាងលិចប្រទេស។ រហូតមកដល់ពេលនេះ ខេត្តនេះរងអំពើហិង្សាតិចតួចជាងគេ ប្រៀបធៀបជាមួយតំបន់ផ្សេងទៀត។
ក្រុមតាលីបង់បានបដិសេធចរចាសន្តិភាព ដោយផ្ទាល់ជាមួយប្រធានាធិបតី ហាមីឌ កាហ្សៃ ព្រោះចាត់ទុកលោកកាហ្សៃថា ជាអាយ៉ងរបស់អាមេរិក។ ដោយឡែក ថ្មីៗនេះ ប៉ាគីស្ថានបានប្រកាសថា ចង់ដោះលែង ហ្កានី បារ៉ាដា ដែលជាជនសំខាន់ទី២នៃក្រុមតាលីបង់ អោយមានសេរីភាពឡើងវិញ ដើម្បីអោយបារ៉ាដា បញ្ចុះបញ្ចូលក្រុមតាលីបង់អោយចរចាសន្តិភាពជាមួយរដ្ឋាភិបាលក្រុងកាប៊ូល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ