អន្តរជាតិថ្កោលទោសថៃអំពីការប្រើប្រាស់គ្រាប់បែកចង្កោម
មន្ត្រីតំណាងរដ្ឋាភិបាលថៃបានសារភាពនៅក្នុងកិច្ចប្រជុំមួយនាទីក្រុងហ្សឺណែវថា ទាហានថៃពិតជាបានប្រើប្រាស់គ្រាប់បែកចង្កោមមែន ដើម្បីការពារខ្លួនប្រឆាំងនឹងទាហានកម្ពុជា នៅក្នុងព្រឹត្តិការណ៍ផ្ទុះអាវុធកាលដើមខែកុម្ភៈ នៅព្រំដែនប្រាសាទព្រះវិហារនោះ។ មិនថាថៃនិយាយការពារខ្លួនយ៉ាងណានោះទេ សម្ព័ន្ធអ្នកប្រឆាំងការប្រើប្រាស់គ្រាប់បែកចង្កោមបានថ្កោលទោសយោធាថៃយ៉ាងខ្លាំង។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ លាង ដឺលុច ពីទីក្រុងភ្នំពេញ
សម្ព័ន្ធអ្នកប្រឆាំងការប្រើប្រាស់គ្រាប់បែកចង្កោម បានធ្វើសេចក្តីថ្លែងការណ៍ថ្កោលទោសប្រទេសថៃដែលបានប្រើប្រាស់គ្រាប់បែកចង្កោមនៅក្នុងការប៉ះទង្គិចដោយអាវុធជាមួយកងទ័ពកម្ពុជា កាលពីខែកុម្ភៈកន្លងទៅ។ សេចក្តីបន្ទោសជាសាធារណៈ តាមរយៈសេចក្តីថ្លែងការណ៍នេះ ត្រូវបានធ្វើឡើង ដោយក្រុមសម្ព័ន្ធប្រឆាំងគ្រាប់បែកចង្គោមCMC (Cluster Munition Coalition) ពីទីក្រុងហ្សឺណែវ បន្ទាប់ពីអគ្គរាជទូតថៃប្រចាំអង្គការសហប្រជាជាតិក្នុងទីក្រុងហ្សឺណែវបានសារភាព នៅក្នុងកិច្ចប្រជុំមួយ កាលពីថ្ងៃទី៥មេសាថា ទាហានថៃបានប្រើប្រាស់គ្រាប់បែកចង្កោមដោយគោលការណ៍ចាំបាច់នៅក្នុងទិសដៅការពារខ្លួន។
សេចក្តីថ្លែងការណ៍របស់ក្រុមសម្ព័ន្ធអ្នកប្រឆាំងការប្រើប្រាស់គ្រាប់បែកចង្កោមបានសរសេរថា បើទោះជាប្រទេសថៃមិនទាន់ជាសមាជិកនៃអនុសញ្ញាប្រឆាំងការប្រើប្រាស់គ្រាប់បែកចង្កោមក៏ដោយ ប៉ុន្តែវាគឺជាការគួរអោយព្រួយបារម្ភ នៅពេលដែលប្រទេសថៃនៅតែប្រើប្រាស់គ្រាប់បែកចង្កោម ដែលសហគមអន្តរជាតិបានចូលរួមហាមប្រាមហើយនោះ។
CMCបានថ្លែងថា នេះគឺជាលើកដំបូងហើយ ដែលមានការប្រើប្រាស់គ្រាប់បែកចង្កោមនៅក្នុងពិភពលោក តាំងពីអនុសញ្ញាស្តីពីការប្រឆាំងការប្រើប្រាស់គ្រាប់បែកចង្កោមចូលជាធរមាននៅឆ្នាំ២០០៨។ ទន្ទឹមគ្នានេះ CMCបានជំរុញអោយកម្ពុជា និងថៃប្តេជ្ញាជាបន្ទាន់ថានឹងមិនប្រើប្រាស់គ្រាប់បែកចង្កោមទៅថ្ងៃអនាគត ហើយយល់ព្រមរៀបចំខ្លួនចូលជាសមាជិកនៃអនុសញ្ញាស្តីពីការប្រឆាំងការប្រើប្រាស់គ្រាប់បែកចង្កោម។
គួរបញ្ជាក់ថា រដ្ឋាភិបាលរាជធានីបាងកកមិនអាចឆ្លើយអ្វីផ្ទុយពីការរកឃើញរបស់ក្រុមសម្ព័ន្ធអ្នកប្រឆាំងគ្រាប់បែកចង្កោមនោះទេ។ ពោលគឺ ក្រោយពីការផ្ទុះអាវុធដាក់គ្នារវាងកងទ័ពទាំងពីរកាលពីដើមខែកុម្ភៈនោះ ភ្នាក់ងាររបស់CMCបានចុះស៊ើបអង្កេតផ្ទាល់នៅក្នុងសមភូមិចំនួន២ដង នៅក្នុងខែកុម្ភៈ និងខែមេសានេះ ហើយបានរកឃើញភស្តុតាងនៃគ្រាប់បែកចង្កោមដែលមិនទាន់ផ្ទុះច្រើនប្រភេទ។ សម្ព័ន្ធអ្នកប្រឆាំងគ្រាប់បែកចង្កោមបានអំពាវនាវផងដែរ អោយប្រទេសថៃផ្តល់ព័ត៌មានបន្ថែមមកខាងកម្ពុជា ដើម្បីជាជំនួយក្នុងប្រតិបត្តិការសម្អាតតំបន់ជាច្រើននៅលើទឹកដីកម្ពុជាដែលទទួលរងការបាញ់គ្រាប់បែកចង្កោម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ