ការផ្ទុះអាវុធដោយកាំភ្លើងធំ នៅព្រំដែនតំបន់ព្រះវិហារ
ការផ្ទុះអាវុធដាក់គ្នាបានចាប់ផ្តើមឡើងនៅវេលាម៉ោង៣និង១៥នាទី រសៀលថ្ងៃទី៤កុម្ភៈនេះនៅឯតំបន់ប្រាសាទព្រះវិហារដែលជាចំណុចក្តៅ មួយក្នុងសមរភូមិជួរមុខនៃប្រទេសទាំងពីរ។ ការផ្ទុះអាវុធនេះបានកើតឡើងជួនចំពេលដែលរដ្ឋមន្ត្រីការបរទេស កម្ពុជានិងថៃបានជួបគ្នានៅថ្ងៃនេះនៅខេត្តសៀមរាបដើម្បីចូលរួម កិច្ចប្រជុំគណៈកម្មការចម្រុះកម្ពុជាថៃលើកទី៧។ កិច្ចប្រជុំមិនបានពិភាក្សាដោះស្រាយអំពីភាពតានតឹងនៅតាមព្រំដែន ទេ។ បន្ទាប់ពីការផ្ទុះអាវុធជាង២ម៉ោង ស្ថានការណ៍ក៏បានស្ងប់ស្ងាត់ទៅវិញ ដោយសារភាគីថៃសុំចរចា។
ចុះផ្សាយនៅថ្ងៃ៖ កែប្រែថ្ងៃទី៖
ព័ត៌មានលម្អិតតាមទូរស័ព្ទ រាយការណ៍ពីទីក្រុងភ្នំពេញ
អាវុធចាប់ផ្តើមផ្ទុះនៅតំបន់សំបុកឃ្មុំក្នុងតំបន់ព្រះវិហារកាលពីម៉ោងជាង៣រសៀលថ្ងៃទី៤កុម្ភៈនេះ។ ប្រភពពីព្រះវិហារឱ្យដឹងថាការផ្ទុះអាវុធឆ្លើយឆ្លងគ្នាមានទាំងអាវុធធុនតូច និងធុនធំដែលធ្វើឱ្យមានផ្សែងខ្មៅខ្មួលខ្មាញ់ពេញផ្ទៃមេឃ។
ការផ្ទុះអាវុធបណ្តាលមកពីភាគីថៃជាអ្នកបង្កដោយពួកគេបានប្រើគ្រឿងចក្រឈូសឆាយផ្លូវចូលមកតំបន់សំបុកឃ្មុំ និងភ្នំទ្រព្យតាំងពីព្រឹកថ្ងៃទី៤កុម្ភៈនេះហើយភាគីកម្ពុជាក៏បានព្យាយាមរារាំងម្តងហើយម្តងទៀតតែពួកគេមិនស្តាប់នៅតែបន្តឈូសចូលក្នុងទឹកដីខ្មែរដដែល។ នៅទីបំផុត កងទ័ពកម្ពុជាបានគូសខ្សែបន្ទាត់ប្រាប់ទាហានថៃថា ប្រសិនបើពួកគេចូល យើងនឹងប្រើសិទ្ធិការពារខ្លួន។ យ៉ាងណាក៏ដោយ ក៏ទាហានថៃនៅតែបន្តរុលចូលរហូតដល់មានការបាញ់គំរាមគ្នាទៅវិញទៅមកផង ដែលជាហេតុធ្វើឱ្យកម្ពុជាប្រើប្រាស់សិទ្ធិការពារទឹកដីរបស់ខ្លួន។
នៅចុងក្រោយនេះ ការផ្ទុះអាវុធបានឈានដល់ការប្រើប្រាស់កាំភ្លើងធំផ្លោងដាក់គ្នា។ ថៃបានផ្លោងដាក់វត្តកែវសិក្ខាគីរីស្វារៈ និងប្រាសាទរបស់ខ្មែរ ប៉ុន្តែនៅមិនទាន់មានសេចក្តីរាយការណ៍អំពីការខូចខាតយ៉ាងណានៅឡើយទេ។ បន្ទាប់ពីការផ្ទុះអាវុធបានប្រហែលមួយម៉ោង ភាគីថៃបានសុំបញ្ឈប់ការបាញ់ គ្នាហើយសុំចរចាវិញ ប៉ុន្តែ ស្នូរអាវុធនៅតែបន្តផ្ទុះជាបន្តបន្ទាប់។ សភាពការណ៍បានច្របូកច្របល់ យ៉ាងខ្លាំង។ សេចក្តីរាយការណ៍ឱ្យដឹងថា ជនជាតិថៃ៤នាក់ត្រូវបានចាប់ខ្លួន ហើយភាគីទាំងពីរបានទទួលរបួសនិងស្លាប់មួយចំនួន។
ទីបំផុតនៅវេលាម៉ោង ៥និង៤៨នាទី ស្នូរអាវុធបានស្ងប់ស្ងាត់ទៅវិញ ដោយភាគីថៃបានស្នើសុំចរចា ហើយលោកនាយករដ្ឋមន្ត្រីកម្ពុជាបានសុខចិត្តឱ្យរដ្ឋមន្ត្រីការពារជាតិទាំងពីរជួបចរចាគ្នា។ គេនៅមិនទាន់ដឹងពីលទ្ធផលនៃការចរចានៅឡើយទេ។ យ៉ាងណាក៏ដោយកម្ពុជាអះអាងថានឹងដាក់ពាក្យប្តឹងទៅក្រុមប្រឹក្សាសន្តិសុខអង្គការសហប្រជាជាតិ។
ថ្លែងទៅកាន់ក្រុមអ្នកកាសែតនៅល្ងាចថ្ងៃនេះ លោក ហោ ណាំហុង រដ្ឋមន្ត្រីការបរទេសកម្ពុជាបានអះអាង ថាកម្ពុជានឹងសរសេរលិខិតមួយនៅល្ងាចនេះ ដើម្បីប្តឹងទៅក្រុមប្រឹក្សាសន្តិសុខសហប្រជាជាតិ អំពីចេតនាបង្កហេតុរបស់ថៃក្នុងការរំលោភបំពានចូលក្នុងទឹកដីកម្ពុជា។ លិខិតនេះនឹងដាក់ជូនក្រុមប្រឹក្សាសន្តិសុខសហប្រជាជាតិនៅថ្ងៃស្អែកទី៥កុម្ភៈ។ លោក ហោ ណាំហុង បានបានអះអាងថា ថៃបានរំលោភចូលទឹកដីខ្មែរចម្ងាយ ៥០០ ម៉ែត្រពីជណ្តើរទី១នៃប្រាសាទព្រះវិហារ។
គួរកត់សម្គាល់ថា ការផ្ទុះអាវុធនេះបានកើតឡើងខណៈដែលរដ្ឋមន្ត្រីការបរទេសកម្ពុជានិងថៃបានជួប គ្នានៅថ្ងៃនេះនៅឯសៀមរាបក្នុងកិច្ចប្រជុំគណៈកម្មការចម្រុះកម្ពុជាថៃដែលបានបើកប្រជុំរយៈពេល២ថ្ងៃនៅខេត្តសៀមរាប។
តុល្យការបណ្តោះអាសន្នចុងក្រោយនៅល្ងាចថ្ងៃទី៤កុម្ភៈដែលទទួលបានពីប្រភពយោធា មានទាហានកម្ពុជាម្នាក់បានស្លាប់ និង៥នាក់រងរបួស។ ក្រៅពីនោះ ក៏មានឆេះរ៉ឡូកិនថ្ម មួយគ្រឿង និងអេស្កាវ៉ាទ័រមួយគ្រឿងរបស់កងវិស្វកម្មដែលធ្វើផ្លូវទៅកាន់ប្រាសាទព្រះវិហារ។ កម្ពុជាបានប្រើប្រាស់អាវុធធុនធ្ងន់ BM 21 អស់២០កញ្ច្រែង។ ប្រភពដដែលឱ្យដឹងថា ទាហានថៃស្លាប់៧នាក់ក្នុងនោះ៤នាក់នៅភ្នំទ្រព្យ និង៣នាក់នៅក្បែរផ្ទះក្រហម និងរងរបួសមួយចំនួនទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ