អាជ្ញាធរថៃចាប់បញ្ជូនពលរដ្ឋខ្មែរពីផ្សាររុងក្លឿមកកម្ពុជាវិញ
ពលរដ្ឋខ្មែរអាជីវករលក់ដូរ២២នាក់ត្រូវបានអាជ្ញាធរថៃបញ្ជូនមកដល់កម្ពុជាតាមច្រកអន្តរជាតិប៉ោយប៉ែតកាលពីរសៀលម៉ោង៣ថ្ងៃចន្ទនេះ បន្ទាប់ពីពួកគេត្រូវបានប៉ូលិសថៃចាប់ប្រមូល និងបានឃាត់ខ្លួនកាលពីថ្ងៃសៅរ៍ចុងសប្តាហ៍។ មន្ត្រីរដ្ឋាភិបាលកម្ពុជាសាទរការប្រើប្រាស់វិធានការច្បាប់របស់អាជ្ញាធរថៃដែលចៀសវាងការប្រើប្រាស់អាវុធដូចករណីមួយចំនួនមកលើពលរដ្ឋខ្មែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៦
ក្រុមអាជីវករអ្នកលក់ដូរជនជាតិកម្ពុជាចំនួន២២នាក់ដែលក្នុងនោះមានស្ត្រី២នាក់ ត្រូវបានអាជ្ញាធរថៃដោះលែងអោយមានសេរីភាព និងបញ្ជូនមកកម្ពុជាវិញហើយ បន្ទាប់ពីពួកគេត្រូវបានចាប់ឃុំខ្លួនតាំងពីថ្ងៃសៅរ៍ទី១០កញ្ញា។ ពលរដ្ឋខ្មែរ២២នាក់បានមកដល់កម្ពុជាវិញតាមច្រកប៉ោយប៉ែតកាលពីម៉ោង៣រសៀលថ្ងៃចន្ទទី១២កញ្ញានេះ។
កាលព្រឹកថ្ងៃសៅរ៍ចុងសប្តាហ៍កន្លងទៅអាជ្ញាធរបានធ្វើប្រតិបត្តិការប្រមូលពលរដ្ឋខ្មែរដែលចេញចូលប្រកបរបររកស៊ីនៅផ្សាររុងក្លឿលើទឹកដីថៃហើយដែលគ្មានក្រដាសស្នាមស្របច្បាប់។
នៅព្រឹកថ្ងៃសៅរ៍នោះ វេលាម៉ោង១០ព្រឹក អាជ្ញាធរថៃក៏បានចាប់ប្រមូលពលរដ្ឋខ្មែរប្រមាណ២០នាក់ដូចគ្នាដែលភាគច្រើនគឺជាកុមារ ហើយបានបញ្ជូនពួកគេមកកម្ពុជាវិញភា្លម។ នៅម៉ោង១២និង៤០នាទី ប៉ូលិសថៃក៏ចាប់ប្រមូលអាជីវករលក់ដូរ២២នាក់ផ្សេងទៀតដែលប៉ូលិសថៃអះអាងថាគ្មានលិខិតអនុញ្ញាតឆ្លងកាត់ព្រំដែន។
អ្នកនាំពាក្យក្រសួងការបរទេសខ្មែរលោក កុយ គួង បានរៀបរាប់ អោយដឹងថា ក្រោយពីមានអន្តរាគមន៍ពីអគ្គកុងស៊ុលកម្ពុជាប្រចាំខេត្តស្រះកែវ អាជ្ញាធរថៃបានសម្រេចដោះលែងពលរដ្ឋខ្មែរទាំង២២នាក់អោយមានសេរីភាពវិញនៅថ្ងៃនេះ។
មន្ត្រីអ្នកនាំពាក្យដដែល អត្ថាធិប្បាយថា កម្ពុជាចង់បានការដោះស្រាយតាមផ្លូវច្បាប់យ៉ាងនេះជាមួយអាជ្ញាធរថៃ នៅគ្រប់ករណីរបស់ពលរដ្ឋខ្មែរដែលអាជ្ញាធរថៃយល់ថាមានបញ្ហាផ្ទុយពីច្បាប់របស់ខ្លួននោះ។ លោកកុយ គួង កំពុងថ្លែងយោងទៅករណីមុនៗដែលទាហានព្រំដែនថៃបើកការបាញ់ប្រហារមកពលរដ្ឋខ្មែរដែលជាទូទៅតែងឆ្លងចូលដោយអចេតនាទៅក្នុងទឹកដីថៃ នៅពេលដែលពួកគេគ្រាន់តែប្រកបរបរចិញ្ចឹមជីវិតនៅតាមព្រំដែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ