កម្ពុជា-ថៃ

តុលាការថៃ ផ្តន្ទាទោសបុរសកម្ពុជាម្នាក់ ដាក់ពន្ធនាគារ ២ ឆ្នាំ៣ខែ ពីបទរួមដំណើរជាមួយចារបុរស

នៅព្រឹកថ្ងៃអង្គារ ទី៦កញ្ញានេះ តុលាការខេត្តស៊ីសាកេត របស់ប្រទេសថៃ បានសម្រេចផ្តន្ទាទោស ដាក់ពន្ធនាគារលើបុរសកម្ពុជាម្នាក់ឈ្មោះ អ៊ឹង គឹមថៃ ពីបទរួមដំណើរជាមួយចារបុរស ចូលក្នុងបន្ទាយយោធា លើទឹកដីថៃ។ ក៏ប៉ុន្តែបុរសជាប់ចោទ និងមន្ត្រីជាន់ខ្ពស់រដ្ឋាភិបាលកម្ពុជា បានច្រានចោលការចោទប្រកាន់។

ចុះផ្សាយនៅថ្ងៃ៖ 06/09/2011 - 13:02កែប្រែថ្ងៃទី៖ 06/09/2011 - 14:16

ដោយ៖ លី ម៉េងហួរ

ផ្សាយពាណិជ្ជកម្ម

ការផ្តន្ទាទោសបុរសកម្ពុជាដូច្នេះ បានធ្វើឡើង បន្ទាប់ពីតុលាការថៃ បានបើកសវនាការរយៈពេល ៤៥ នាទី ចាប់ពីម៉ោង ១០ ព្រឹក ថ្ងៃទី៦កញ្ញា ឆ្នាំ២០១១។

អ្នកនាំពាក្យក្រសួងការបរទេសកម្ពុជា លោក កុយ គួង បានលើកឡើងថា តុលាការថៃបានសម្រេចផ្តន្ទាទោសលោក អ៊ឹង គឹមថៃ ពីបទរួមដំណើរជាមួយចារបុរសម្នាក់ដ៏សំខាន់ ឈ្មោះ យ៉ា ពៅ ដោយសារតែអាជ្ញាធរថៃរកឃើញនូវផែនទី នៅក្នុងឡាន ដែលលោក អ៊ឹង គឹមថៃ បានធ្វើដំណើរជាមួយ។ ក៏ប៉ុន្តែលោកអ៊ឹងគឹមថៃ បានបដិសេធចំពោះការចោទប្រកាន់ ហើយរដ្ឋាភិបាលកម្ពុជា មិនដែលបានដឹង ឬបានស្គាល់ឈ្មោះ យ៉ា ពៅ ជានរណាទេ។

លោក កុយ គួង បានគូសបញ្ជាក់ថា កន្លងមក រដ្ឋាភិបាលកម្ពុជា បានបញ្ជាក់ហើយថា យើងគ្មានភាពចាំបាច់ណាមួយ ដែលបញ្ជូនលោក អ៊ឹង គឹមថៃ ធ្វើជាចារបុរសនៅលើទឹកដីថៃនោះទេ។ ចំណែកលោក អ៊ឹង គឹមថៃ ក៏បានបដិសេធហើយបដិសេធទៀតលើរឿងនេះ។

យ៉ាងណាក៏ដោយមន្ត្រីរដ្ឋាភិបាល និងអគ្គកុងស៊ុលកម្ពុជា ប្រចាំខេត្តស៊ីសាកេត កំពុងរង់ចាំជួយខាងផ្លូវច្បាប់ ដោយជួយរកមេធាវីប្តឹងឧទ្ធរណ៍ ប្រសិនបើលោក អ៊ឹង គឹមថៃ និងក្រុមគ្រួសារ ដែលបានចូលរួមសវនាការ នៅព្រឹកមិញ សម្រេចប្តឹងតវ៉ា។

មានអាយុ ៤៦ ឆ្នាំ លោក អ៊ឹង គឹមថៃ ជាអ្នករកស៊ី និងមានស្រុកកំណើតនៅខេត្តកណ្តាល ត្រូវបានអាជ្ញាធរថៃចាប់ខ្លួន កាលពីថ្ងៃទី៧ មិថុនា ឆ្នាំ២០១១ ជាមួយនឹងបុរសថៃកាត់មូស្លីមម្នាក់ និងវៀតណាមម្នាក់ទៀត។ ក្រោយការចាប់ខ្លួននោះ តុលាការថៃ បានបើកសវនាការ២លើកជាបន្តបន្ទាប់ ប៉ុន្តែត្រូវលើកពេលទៅវិញ ដោយសារតែគ្មានភស្តុតាងដាក់បន្ទុកគ្រប់គ្រាន់។

តាមមន្ត្រីការទូតកម្ពុជា នៅក្នុងសវនាការ មេធាវី ៤ រូប ដែលការពារលោក អ៊ឹង គឹមថៃ រួមទាំងរូបលោក អ៊ឹង គឹមថៃ បានច្រានចោលការចោទប្រកាន់ និងចាត់ទុកថា រាល់ភស្តុតាងទាំងប៉ុន្មាន សម្រាប់ដាក់បន្ទុកនោះ គឺជាការប្រឌិតរបស់អាជ្ញាធរថៃ ព្រោះថា លោកអ៊ឹង គឹមថៃ បានឆ្លងដែន ចូលទឹកដីថៃ ដោយស្របច្បាប់ និងក្នុងនាមជាអ្នកជំនួញប៉ុណ្ណោះ៕