លោក អ៊ឹង គឹមថៃ ប្តឹងឧទ្ធរណ៍ប្រឆាំងសាលាដំបូងថៃ
លោក អ៊ឹង គឹមថៃ បានសម្រេចចិត្តប្តឹងឧទ្ធរណ៍ ប្រឆាំងសាលក្រមសាលាដំបូងថៃខេត្តស៊ីសាកេត ដែលបានផ្តន្ទាទោសលោកដាក់ពន្ធនាគារ២ឆ្នាំ៣ខែ ពីបទសង្ស័យធ្វើចារកម្មក្នុងទឹកដីថៃ។ អ្នកនាំពាក្យក្រសួងការបរទេសកម្ពុជាលោក កុយ គួង បានបញ្ជាក់ថា មេធាវីរបស់លោក អ៊ឹង គឹមថៃ នឹងរៀបចំឯកសារបណ្តឹងនេះ ដាក់ទៅសាលាឧទ្ធរណ៍នៅសប្តាហ៍ក្រោយ។
ចុះផ្សាយនៅថ្ងៃ៖
ស្តាប់ - ០១:២០
លោក អ៊ឹង គឹមថៃ ដែលតុលាការថៃផ្តន្ទាទោសអោយជាប់ពន្ធនាគារ២ឆ្នាំ៣ខែ ពីបទសង្ស័យធ្វើចារកិច្ចនោះ បានសម្រេចប្តឹងឧទ្ធរណ៍ជំទាស់សាលក្រមតុលាការដំបូងថៃហើយ។
ក្រុមគ្រួសារលោក អ៊ឹង គឹមថៃ និងលោក អ៊ឹង គឹមថៃ ខ្លួនឯងផ្ទាល់ រួមទាំងមេធាវី និងមន្ត្រីអគ្គកុងស៊ុលកម្ពុជាប្រចាំខេត្តស្រះកែវប្រទេសថៃបានពិភាក្សា អំពីការដាក់ប្តឹងទៅសាលាឧទ្ធរណ៍នេះ។ នេះបើតាមការអះអាងរបស់អ្នកនាំពាក្យក្រសួងការបរទេសកម្ពុជា។ អ្នកនាំពាក្យក្រសួងការបរទេសលោក កុយ គួង បានប្រាប់អោយដឹងថា ការដាក់ពាក្យបណ្តឹងជាផ្លូវការទៅសាលាឧទ្ធរណ៍នោះប្រហែលនឹងអាចប្រព្រឹត្តទៅនៅសប្តាហ៍ក្រោយនេះ។
ប្រភពពីមន្ត្រីការបរទេសដដែលបានអោយដឹងថា បើទោះជាមានការផ្តន្ទាទោសទៅលើលោក អ៊ឹង គឹមថៃ យ៉ាងនេះក៏ដោយ ក៏កម្ពុជាមិនបានយល់ស្របចំពោះសេចក្តីសម្រេចរបស់តុលាកាថៃ ហើយកម្ពុជាគ្មានភាពចាំបាច់ណាមួយត្រូវបញ្ជូនលោក អ៊ឹង គឹមថៃ ឬជនណាទៅធ្វើចារកម្មនៅក្នុងប្រទេសថៃឡើយ។
តុលាការថៃខេត្តស៊ីសាកេតបានផ្តន្ទាទោសលោក អ៊ឹង គឹមថៃ កាលពីថ្ងៃទី៦កញ្ញាដោយចោទប្រកាន់លោក អ៊ឹង គឹមថៃ ពីបទសង្ស័យធ្វើចារកម្ម។ ការកាត់ទោសលោក អ៊ឹង គឹមថៃ ធ្វើឡើងចំពេលដែលមន្ត្រីជាន់ខ្ពស់រដ្ឋាភិបាលថៃនៅចិញ្ចឹមចិត្តមកពិភាក្សាជាមួយកម្ពុជា ដើម្បីស្វែងរកការដោះលែងជនជាតិថៃពីរនាក់ដែលកំពុងជាប់ពន្ធនាគារនៅក្នុងប្រទេសកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ