សវនាការបឋមរបស់សាលាក្តីខ្មែរក្រហមចាប់ផ្តើមនៅថ្ងៃចន្ទ២៧មិថុនា២០១១
មុនម៉ោង៩ព្រឹក រថយន្តសាលាក្តីខ្មែរក្រហមបានដឹកជនជាប់ចោទទាំង៤ ពីមន្ទីរ ឃុំឃាំង-មកដល់បន្ទប់សវនាការ។ នួន ជា អៀង សារី អៀង ធីរិទ្ធ និងខៀវ សំផន បានអង្គុយនៅជួរតុតែមួយនៅពីក្រោយសហមេធាវីរបស់ពួកគេរៀងៗខ្លួន។ អ្នកទាំង៤ មើលទៅមានសភាពទ្រុឌទ្រោម ដោយសារភាពជរា ប៉ុន្តែពួកគេមិនបានបង្ហាញភាពតក់ស្លុតចំពោះសវនាការឡើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០១
វាំងននពណ៌សបើកនៅម៉ោង៩ព្រឹក បង្ហាញអង្គជំនុំជម្រះដល់សាធារណជនជិត៥០០នាក់ដែលអង្គុយនៅក្នុងបន្ទប់សវនាការ។ អតីតមេដឹកនាំជាន់ខ្ពស់របបខ្មែរក្រហមបានអង្គុយក្បែរៗគ្នាអមដោយជំនួយការច្បាប់និងសន្តិសុខ។ នួន ជា អៀង សារី អៀង ធីរិទ្ធ និងខៀវ សំផនអង្គុយនៅពីក្រោយសហមេធាវីរបស់ពួកគេ។ នួន ជាមានសហមេធាវីដល់ទៅ៣នាក់ឯណោះ។
សវនាការចាប់ផ្តើមនៅក្នុងបន្ទប់សវនាការ ប៉ុន្តែនៅខាងក្រៅបន្ទប់សវនាការវិញ ប្រជាពលរដ្ឋ និងនិស្សិតជាច្រើនរយនាក់ទៀតកំពុងតម្រង់ជួរនៅខាងក្រៅទីធ្លាសាលាក្តីនៅឡើយដើម្បីរង់ចាំចូលក្នុងបន្ទប់សវនាការនៅម៉ោងបន្ទាប់។ អ្នកកាសែតជាតិ និងអន្តរជាតិជាច្រើនរយនាក់រត់ចុះឡើងដើម្បីផ្តិតរូបភាព ថតសំឡេង និងអ្នកខ្លះផ្សាយចេញផ្ទាល់ព័ត៌មានអំពីការផ្តើមបើកសវនាការ។
នៅក្នុងបន្ទប់សវនាការ នៅចំពោះមុខក្រុមប្រឹក្សាចៅក្រម សហព្រះរាជអាជ្ញានិង
សាធារណជនផង អតីតមេដឹកនាំរបបខ្មែរក្រហមទាំង៤មិនបានបង្ហាញទឹកមុខភ័យព្រួយបារម្ភនិងតក់ស្លុតឡើយ។ ប៉ុន្តែពួកគេបានបង្ហាញសភាពទ្រុឌទ្រោមផ្នែកសុខភាព។ ម្នាក់ៗសុទ្ធតែមានពាក់អាវក្រាស់ធំដើម្បីការពារភាពត្រជាក់។
នួន ជាបានពាក់មួកអំបោះចាក់ដើម្បីទប់ទល់ចំហាយម៉ាស៊ីនត្រជាក់ ដូចស្ត្រីទើបសំរាលកូនហើយ ហើយក៏មានពាក់វ៉ែនតាខ្មៅដើម្បីទប់ទល់ពន្លឺភ្លើងផងដែរ។ អៀង សារីនិងអៀង ធីរិទ្ធក្រោកចេញទៅបន្ទប់ទឹកញឹកញាប់ ដោយមានសន្តិសុខ២ ទៅ៣នាក់គ្រាទប់ យោងរាងកាយពួកគេ កុំអោយដួល។ អៀង សារីអង្គុយមិនត្រង់ខ្លួនទេ ហើយផ្អែកខ្នងខ្លាំងទៅលើកៅអី។
ខៀវ សំផន មើលទៅហាក់នៅរឹងមាំជាងមិត្តភក្តិ៣នាក់ទៀត។ ជនជាប់ចោទរូបនេះ អាចក្រោកដើរទៅបន្ទប់ទឹកដោយខ្លួនឯងបាន ដោយមិនត្រូវការសន្តិសុខជួយគ្រាឡើយ។ ប៉ុន្តែ ខៀវ សំផនដើរមិនស្វាហាប់ប៉ុន្មានទេ។ ខៀវ សំផនពាក់ឧបករណ៍ស្តាប់សំឡេងនៅលើក្បាលជានិច្ច។ យូរៗម្តងគេឃើញខៀវ សំផនអោននិយាយខ្សឹបៗជាមួយស្ត្រីជំនួយការច្បាប់ ហើយពេលខ្លះខៀវ សំផនក៏និយាយលាយសំណើចផង។ ភាពរឹងមាំផ្នែកសុខភាពជាងអ្នកដទៃ ធ្វើអោយខៀវ សំផន គឺជាជនជាប់ចោទតែម្នាក់ដែលអង្គុយក្នុងសវនាការរហូតដល់ចប់នៅថ្ងៃនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ