Lobsang Sangay អ្នកបន្តស្នងនយោបាយពីសម្តេចសង្ឃ Dalai Lama
លោក Lobsang Sangay អ្នកច្បាប់ ទីបេអាយុ៤៣ឆ្នាំ ទើបបានធ្វើសច្ចាប្រណិធានជានាយករដ្ឋមន្ត្រីថ្មីនៃរដ្ឋាភិបាល ទីបេនិរទេសនិងជាអ្នកបន្តស្នងនយោបាយជាផ្លូវការពីសម្តេច សង្ឃ ដាឡៃឡាម៉ានៅព្រឹកថ្ងៃចន្ទទី៨សីហា២០១១នេះ។ ពិធីនេះ ត្រូវបានប្រារព្ធធ្វើឡើងក្រោមអធិបតីភាពរបស់សម្តេចសង្ឃដាឡៃឡាម៉ានៅវិហារ Tsuglagkhang ក្នុង Dharamsala ទីក្រុងមួយរបស់ឥណ្ឌានៅប៉ែកខាងជើងប្រទេសនិងដែលជាទីតាំងនៃរដ្ឋាភិបាលនិរទេសទីបេដែរ។
ចុះផ្សាយនៅថ្ងៃ៖
ស្តាប់ - ០២:៤០
លោក Lobsang Sangay ដែលជាបណ្ឌិតខាងច្បាប់អន្តរជាតិ ចេញពីមហាវិទ្យាល័យនីតិសាស្ត្រនៃសាកលវិទ្យាល័យ Harvard សហរដ្ឋអាមេរិកនិងឯកទេសខាងទីបេ ត្រូវបានប្រជាជនទីបេក្នុងពិភពលោកបោះឆ្នោតជ្រើសរើសតាំងពីថ្ងៃទី២៧មេសា២០១១ម្ល៉េះ ជានាយករដ្ឋមន្រ្តីថ្មីនៃរដ្ឋាភិបាលនិរទេសទីបេ។
ការបោះឆ្នោតនេះ ត្រូវបានធ្វើឡើងក្រោយពីសេចក្តីសំរេចចិត្តរបស់សម្តេចសង្ឃដាឡៃឡាម៉ា ដែលមានព្រះជន្ម៧៦វស្សា ប្រកាសលះបង់ចោលតួនាទីជាផ្លូវការរបស់ខ្លួន ជាមេដឹកនាំនយោបាយរបស់ទីបេនិរទេសកាលពីថ្ងៃទី១០មីនាកន្លងផុតទៅនេះ ដើម្បី ផ្ទេរការទទួលខុសត្រូវទាំងអស់ឲ្យដល់នាយករដ្ឋមន្ត្រីទីបេថ្មីតែដាឡៃឡាម៉ានៅរក្សាតួនាទីជាប្រមុខដឹកនាំសាសនាទីបេដដែល។
នៅឱកាសសច្ចាប្រណិធានធ្វើឡើងនៅទីក្រុង Dharamsala ដែលជាទីតាំងរបស់រដ្ឋាភិបាលទីបេនិរទេសនៅប៉ែកខាងជើងឥណ្ឌា លោក Lobsang Sangay មានចេតនាចង់កំចាត់ឲ្យអស់ការព្រួយបារម្ភខ្លាំងរបស់ប្រជាជនទីបេ ស្តីពី ការបន្តប្រយុទ្ធតស៊ូ ដើម្បីសិទ្ធិសេរីភាពរបស់ពួកគេទៅអនាគត។ ការប្រយុទ្ធតស៊ូដើម្បីសិទ្ធិសេរីភាពរបស់ប្រជាជនទីបេនេះ ដែលតំណាងដោយដាឡៃឡាម៉ា តែមួយអង្គគត់ ចាប់តាំងពី លោកបាននិមន្តចាកចេញពីទីក្រុង Lhassa ទឹកដីកំណើតរបស់ខ្លួននៅឆ្នាំ១៩៥៩ បន្ទាប់ពី ពលរដ្ឋទីបេ បានងើបបះបោរប្រឆាំងនឹងការក្តោបក្តាប់ទឹកដីទីបេពីរដ្ឋអំណាចចិន។
Lobsang Sangay បានសន្យាថា« នឹងបន្តការប្រយុទ្ធតស៊ូ លុះត្រា តែ ទីបេ រកឃើញយុត្តិធម៌ឡើងវិញ " ដោយអះអាងបន្ថែមទៀតថា « យើង តស៊ូ ដើម្បីប្រឆាំងទល់នឹងនយោបាយដាច់ខាតនៃរបបចិននៅទីបេប្រឆាំងនឹងបណ្តាអ្នកដែលបដិសេធមិនព្រមទទួលស្គាល់សិទ្ធិសេរីភាព យុត្តិធម៌ សេចក្តីថ្លៃថ្នូរ និង អត្តសញ្ញាណរបស់ជនជាតិទីបេ។
Lobsang Sangay អ្នកជំនាញការខាងច្បាប់នេះ ដែលកើតនៅតំបន់ផលិតតែមួយនៅប៉ែកឦសានប្រទេសឥណ្ឌា ពុំធ្លាប់រស់នៅតំបន់ទីបេ និងក៏ពុំធ្លាប់អញ្ជើញទៅកាន់តំបន់ទីបេ ដូចអ្នកដឹកនាំសាសនាទីបេជំនាន់មុន ដែលក្តាប់បានជីវភាពនយោបាយតស៊ូរបស់ទីបេ ទេ។
រដ្ឋាភិបាលនិរទេសទីបេ មកទល់ពេលនេះ ពុំទាន់ត្រូវបានទទួលស្គាល់ពីរដ្ឋាភិបាលបរទេសណាមួយនៅឡើយទេ។ ចំណែកចិនវិញនៅតែបដិសេធជានិច្ច មិនទទួលស្គាល់រដ្ឋាភិបាលនិរទេសទីបេ ហើយធម្មានុរូបភាពនៃរដ្ឋាភិបាលនេះ អាចនឹងមានភាពស្រពេចស្រពិល នៅចំពោះមុខក្រសែភ្នែករបស់ប្រជាជនទីបេ បើសិនជាពុំមានការគាំទ្រពីសំណាក់សម្តេចសង្ឃដាឡៃឡាម៉ាទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ