ប៉ាគីស្ថានរងគ្រោះភេរវកម្ម ដែលមិនមែនជាស្នាដៃពួកតាលីបង់ ?
ក្នុងចន្លោះតែបួននាទីពីគ្នាប៉ុណ្ណោះ មានគ្រាប់បែកពីរ បានផ្ទុះឡើង ទាំងកណ្តាលអធ្រាត្រ នៅក្រុងប៉េស្ហាវ៉ា ភាគពាយ័ព្យប្រទេសប៉ាគីស្ថាន។ គ្រាប់បែកទីពីរមានកម្លាំងខ្លាំងជាងគ្រាប់ទីមួយឆ្ងាយណាស់។ ជាតុល្យការបណ្តោះអាសន្ន មានស្លាប់យ៉ាងហោចណាស់ ៣៩នាក់ និងរបួស ជាង៩០ នាក់។ ខុសពីលើកមុនៗ ពួកតាលីបង់នៅប៉ាគីស្ថានបានប្រកាសច្រានចោលថាមិនមែនជាស្នាដៃរបស់ពួកគេទេ។ ប៉ុន្តែភេរវកម្មនេះបានប្រព្រឹត្តទៅប៉ុន្មានម៉ោងក្រោយទស្សនកិច្ចរបស់ប្រធានាធិបតីអាហ្វហ្គានីស្ថាននៅប៉ាគីស្ថាន ដើម្បីប្រយុទ្ធប្រឆាំងនឹងភេរវនិយមប៉ុណ្ណោះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៧
នេះជាភេរវកម្មដែលបានសម្លាប់ជីវិតមនុស្សច្រើនបំផុត គិតចាប់តាំងពី មេបណ្តាញភេរវនិយមអាល់កៃដា អ៊ូសាម៉ា បិនឡាដិន ត្រូវបានប្រហារជីវិតដោយកងកុម្ម៉ង់ដូពិសេសអាមេរិក កាលពីថ្ងៃទី២ខែឧសភាមក។
នៅវេលាម៉ោង ១១កន្លះ អធ្រាត្រយប់មិញនេះ គ្រាប់បែកទីមួយ បានផ្ទុះឡើងក្នុងបន្ទប់ទឹកនៃសណ្ឋាគារមួយ។ គ្រាន់តែក្រុមសង្គ្រោះ ប៉ូលិស និងអ្នកតាមដានព័ត៌មានបានជួបជុំគ្នាភ្លាម អត្តឃាតជនជិះម៉ូតូកាត់កន្លែងកើតហេតុ បានចុចបំផ្ទុះគ្រាប់បែកទីពីរ ដែលមានកម្លាំងខ្លាំងជាងគ្រាប់ដំបូង។ ក្នុងចំណោមជនរងគ្រោះដល់ជីវិត មានពីរនាក់ជាអ្នកកាសែតធ្វើការឲ្យសារព័ត៌មានប៉ាគីស្ថានជាភាសាអង់គ្លេស Today និង The News។
ពួកតាលីបង់នៅប៉ាគីស្ថាន ដែលបានសន្យាធ្វើការសងសឹកជូស បិនឡាដិន បានច្រានចោលយ៉ាងដាច់អហង្ការ មិនទទួលស្គាល់អំពើភេរវកម្មលើកនេះទេ។ អ្នកនាំពាក្យរបស់តាលីបង់ បានគូសបញ្ជាក់តាមទូរស័ព្ទទៅកាន់ទីភ្នាក់ងារសារព័ត៌មានបារាំងថា “តាលីបង់មានគោលការណ៍ច្បាស់លាស់ណាស់ គឺធ្វើភេរវកម្មប្រឆាំងនឹងរដ្ឋាភិបាល យោធា និងក្រុមអ្នកគាំទ្រ ហើយមិនធ្វើឡើយភេរវកម្មប្រឆាំងនឹងជនស៊ីវិលស្លូតត្រង់”។
ប៉ុន្តែអ្វីដែលមិនអាចប្រកែកបាន គឺភេរវកម្មនេះបានផ្ទុះឡើងនៅក្រោយទស្សនកិច្ចរបស់លោកប្រធានាធិបតីអាហ្វហ្គានីស្ថាន អាមីត កាហ្សៃ នៅក្រុងអ៊ីស្លាម៉ាបាដ ដើម្បីស្វែងរកសហប្រតិបត្តិការជាមួយប៉ាគីស្ថានក្នុងការបោសសម្អាតពួកភេរវជននៅតាមតំបន់កុលសម្ព័ន្ធជាប់ព្រំប្រទល់គ្នា។
ជាសរុប ពួកតាលីបង់នៅប៉ាគីស្ថាន និងបក្សពួក បានសម្លាប់ជីវិតមនុស្សអស់ ជាង៤០០០នាក់ តាមរយៈភេរវកម្មផ្សេងៗ គិតចាប់ពីឆ្នាំ២០០៧មក ឆ្នាំដែលរដ្ឋាភិបាលប៉ាគីស្ថានបានបើកយុទ្ធនាការប្រឆាំងនឹងវិហារអ៊ីស្លាមនៅក្រុងអ៊ីស្លាម៉ាបាដ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ