ហេតុអ្វីបានជាអាមេរិកនិងប៉ាគីស្ថានមិនទុកចិត្តគ្នា?
នៅថ្ងៃសុក្រ ២៧ ឧសភា ២០១១នេះ លោកស្រីហ៊ីឡារី គ្លីនតុន រដ្ឋមន្រ្តីការបរទេសអាមេរិកកំពុងបំពេញទស្សនកិច្ច នៅក្នុងប្រទេសប៉ាគីស្ថាន។ ដំណើរទស្សនកិច្ចនេះត្រូវបានធ្វើឡើង ដើម្បីព្យាយាមសម្រុះសម្រួលទំនាក់ទំនងជាមួយប៉ាគីស្ថាន ដែលតានតឹងខ្លាំង ក្រោយពីកងកុម្ម៉ង់ដូអាមេរិកបានចូលទៅសម្លាប់ប៊ិនឡាដិន នៅក្នុងទឹកដីប៉ាគីស្ថាន។ ប៉ាគីស្ថានខឹងនឹងអាមេរិកធ្វើសកម្មភាពក្នុងទឹកដីប៉ាគីស្ថាន ដោយមិនប្រាប់ម្ចាស់ផ្ទះ។ ចំណែកអាមេរិកវិញ មិនប្រាប់ប៉ាគីស្ថានឲ្យដឹងជាមុន ព្រោះខ្លាចប៉ាគីស្ថានលួចឲ្យការណ៍ទៅប៊ិនឡាដិន។ ការមិនទុកចិត្តគ្នានេះហើយ ដែលធ្វើឲ្យទំនាក់ទំនងអាមេរិក-ប៉ាគីស្ថានមានភាពស្មុគស្មាញខ្លាំង។
ចុះផ្សាយនៅថ្ងៃ៖
ស្តាប់ - ០៥:៥៦
លោកស្រីគ្លីនតុន គឺជាមន្រ្តីជាន់ខ្ពស់របស់អាមេរិកទីមួយ ដែលទៅបំពេញទស្សនកិច្ច នៅប៉ាគីស្ថាន ក្រោយពីកងកុម្ម៉ង់ដូអាមេរិកបានចូលទៅសម្លាប់ប៊ីនឡាដិន នៅប៉ាគីស្ថាន កាលពីថ្ងៃទី២ ឧសភាកន្លងទៅ។ លោកស្រីត្រូវបានអមដំណើរដោយលោកឧត្តមនាវី ម៉ៃក៍ មូលែន (Mike Mullen) អគ្គសេនាធិការកងទ័ពចម្រុះអាមេរិក។ ដំណើរទស្សនកិច្ចនេះត្រូវបានធ្វើឡើង ក្នុងពេលដែលទំនាក់ទំនងអាមេរិក-ប៉ាគីស្ថាន កំពុងស្ថិតក្នុងភាពតានតឹងបំផុត។
ប៉ាគីស្ថានទើបតែបានទាមទារឲ្យអាមេរិកកាត់បន្ថយចំនួនអ្នកជំនាញការយោធាអាមេរិក ដែលកំពុងឈរជើង នៅក្នុងប្រទេសប៉ាគីស្ថាន។ ប៉ាគីស្ថានខឹងនឹងអាមរិក ដែលបានបញ្ជូនកងកុម្ម៉ង់ដូ ចូលទៅសម្លាប់ប៊ិនឡាដិន នៅក្នុងទឹកដីប៉ាគីស្ថាន ដោយមិនប្រាប់អាជ្ញាធរប៉ាគីស្ថានឲ្យដឹងជាមុន។ នេះមិនមែនជាលើកទីមួយទេ ដែលកងទ័ពអាមេរិកធ្វើប្រតិបត្តិការយោធា ក្នុងទឹកដីប៉ាគីស្ថាន ដោយមិនសុំការអនុញ្ញាត និងមិនបានប្រាប់អាជ្ញាធរជាម្ចាស់ផ្ទះឲ្យដឹងជាមុន ដែលប៉ាគីស្ថានចាត់ទុកថាជាការរំលោភលើអធិបតេយ្យរបស់ប៉ាគីស្ថាន។
ប៉ាគីស្ថានយល់ថា ទង្វើរបស់អាមេរិកបែបនេះបង្ហាញថា អាមេរិកចាត់ទុកប៉ាគីស្ថាន ដូចជា ប្រទេសអាយ៉ងមួយ មិនមែនជាប្រទេសជាដៃគូ ស្មើភាពគ្នានោះទេ។ ប៉ាគីស្ថាននៅតែសង្ស័យថា គោលដៅរបស់អាមេរិក គឺគ្រាន់តែចង់ខ្ចីដៃប៉ាគីស្ថាន ដើម្បីបង្រ្កាបពួកតាលីបង់ និងពួកអាល់កៃដា ដើម្បីបញ្ចប់សង្រ្គាមនៅអាហ្វហ្កានីស្ថានប៉ុណ្ណោះ។ នៅពេលដែលបានសម្រេចដល់គោលដៅ អាមេរិកប្រាកដជានឹងបែរខ្នងដាក់ប៉ាគីស្ថានវិញជាមិនខាន។ គឺជាមួយឥណ្ឌា ដែលជាសត្រូវរបស់ប៉ាគីស្ថានឯណោះវិញទេ ដែលអាមេរិកចង់ភ្ជាប់ទំនាក់ទំនងជាយុទ្ធសាស្រ្ត សម្រាប់រយៈពេលវែង។
អាមេរិកវិញ កំពុងតែសង្ស័យថា ប៉ាគីស្ថានកំពុងតែលេងល្បិច ដៃម្ខាងធ្វើជាសហការជាមួយអាមេរិកកម្ទេចពួកភេរវជន ក៏ប៉ុន្តែ ដៃម្ខាងទៀតលួចជួយភេរវជនជាសម្ងាត់។ កន្លងមក អាមេរិកធ្លាប់បានជូនដំណឹងប៉ាគីស្ថានជាមុន មុននឹងចូលទៅទម្លាក់គ្រាប់បែកលើទីតាំងភេរវជន នៅប៉ាគីស្ថាន។ ក៏ប៉ុន្តែ ស្ទើរតែរាល់លើក ពេល Drone (យន្តហោះគ្មានមនុស្សបើក) របស់អាមេរិកទៅដល់ មេភេរវជនច្រើនតែរត់គេចខ្លួនបាត់អស់ ធ្វើឲ្យអាមេរិកសង្ស័យថា មានមន្រ្តីប៉ាគីស្ថានលួចឲ្យការណ៍ដល់ពួកភេរវជន។ ការដែលប៊ិនឡាដិន ដែលជាមេភេរវជនដ៏ល្បី អាចលាក់ខ្លួនរាប់ឆ្នាំ នៅក្បែរបណ្ឌិតសភាយោធាប៉ាគីស្ថាន ក៏រឹតតែធ្វើឲ្យអាមេរិកលែងទុកចិត្តប៉ាគីស្ថានទៅទៀត។
ក៏ប៉ុន្តែ បើទោះជាយ៉ាងនេះក៏ដោយ ក៏អាមេរិកមិនចង់ឲ្យទំនាក់ទំនងជាមួយប៉ាគីស្ថានត្រូវបែកបាក់ដែរ។ តាមពិត អាមេរិកត្រូវការប៉ាគីស្ថាន ជាងប៉ាគីស្ថានត្រូវការអាមេរិក ព្រោះថា បើគ្មានជំនួយពីប៉ាគីស្ថានទេ អាមេរិកប្រាកដជាមិនអាចបញ្ចប់សង្រ្គាមនៅអាហ្វហ្កានីស្ថាន ហើយដកកងទ័ពចេញទៅវិញបាននោះទេ។
ភាពស្មុគស្មាញក្នុងទំនាក់ទំនងអាមេរិក-ប៉ាគីស្ថាន គឺបណ្តាលមកពីប្រទេសទាំងពីរមានផលប្រយោជន៍បញ្ច្រាសគ្នា។ អាមេរិកចង់ឲ្យប៉ាគីស្ថានជួយធ្វើយ៉ាងណាឲ្យអាហ្វហ្កានីស្ថានមានស្ថិរភាព ដើម្បីអាចដកកងទ័ពចេញរួច។ ប៉ាគីស្ថានវិញ ចង់ឃើញអាហ្វហ្កានីស្ថានបន្តស្ថិតក្នុងភាពចលាចល ហើយរដ្ឋាភិបាលរបស់លោកហាមីដ កាហ្សៃ (Hamid Karzai) ស្ថិតក្នុងសភាពផុយស្រួយតទៅទៀត ពីព្រោះ រដ្ឋាភិបាលនេះមានទំនោរទៅរកឥណ្ឌា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ