សហភាពអឺរ៉ុបបញ្ចូលក្រុមHezbollah ក្នុងបញ្ជីឈ្មោះក្រុមភេរវករ
នៅថ្ងៃចន្ទនេះ រដ្ឋមន្ត្រីការបរទេសនានានៃសហភាពអឺរ៉ុប បានសំរេចកត់ត្រាបញ្ចូលក្រុម Hezbollah ទៅក្នុងបញ្ជីឈ្មោះនៃបណ្តាក្រុមភេរវករនានា។ Hezbollah គឺជាចលនាសកម្មជនលីបង់ដ៏មានសក្តានុពលមួយ។ ក្រុមនេះគាំទ្រប្រទេសអ៊ីរ៉ង់។ បច្ចុប្បន្ន ក្រុមHezbollah កំពុងតែធ្វើសកម្មភាពច្រើនឡើង នៅប្រទេសស៊ីរី គាំទ្រប្រធានាធិបតីអាសាដ។ ប្រទេសជាច្រើនដូចជា អ៊ីស្រាអែល អាមេរិក អូស្ត្រាលី រឺក៏កាណាដា ធ្លាប់បានកត់ត្រាទុកក្រុមនេះក្នុងបញ្ជីខ្មៅរបស់ខ្លួន តាំងពីយូរណាស់មកហើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៦
នៅថ្ងៃចន្ទនេះ ប្រមុខការទូតនានានៃសហភាពអឺរ៉ុប បានសំរេចកត់ត្រាបញ្ចូលក្រុម Hezbollah ទៅក្នុងបញ្ជីឈ្មោះបណ្តាក្រុមភេរវករ។ ប៉ុន្តែ សហភាពអឺរ៉ុបបានប្រាប់ថា ខ្លួននៅតែមានបំណងបន្តការចរចាជាមួយមេដឹកនាំនយោបាយរបស់ក្រុមនេះដដែល។ រហូតមកដល់ពេលនេះ នៅសហភាពអឺរ៉ុប មានតែប្រទេសហូឡង់ និងអង់គ្លេសប៉ុណ្ណោះ ដែលបានកត់ត្រាទុកក្រុម Hezbollah នៅក្នុងបញ្ជីខ្មៅរបស់ខ្លួន។
ពាក្យជាភាសាអារ៉ាប់ Hezbollah ប្រែជាខ្មែរថា គណបក្សព្រះជាម្ចាស់។ ក្រុម Hezbollah ជាចលនានយោបាយនិកាយChiite លីបង់ ដែលបានបង្កើតឡើងក្នុងឆ្នាំ១៩៨២ នៅក្រុង Baalbek ភាគខាងកើតលីបង់។ កាលណោះ ចលនានេះមានទិសដៅប្រឆាំងការឈ្លានពានរបស់អ៊ីស្រាអែលមកលើលីបង់។ ក្នុងសកម្មភាពប្រឆាំងអ៊ីស្រាអែល ក្រុម Hezbollah ទទួលបានជំនួយហិរញ្ញវត្ថុពីប្រទេសអ៊ីរ៉ង់។ ចាប់ពីឆ្នាំ ១៩៨៥ មក សាខាយោធាក្រុមនេះបានឈរជើងយ៉ាងរឹងមាំ នៅភាគខាងត្បូងលីបង់។ ក្រុមនេះតែងតែវាយប្រហារបង្កអោយមានមនុស្សស្លាប់ច្រើន ជាហេតុនាំអោយអ៊ីស្រាអែលដកកងទ័ពខ្លួនចេញពីលីបង់ នៅឆ្នាំ២០០០ បន្ទាប់ពីមានវត្តមាននៅប្រទេសនេះ អស់រយៈពេល ២២ឆ្នាំរួចមក។
នៅឆ្នាំ ១៩៨៩ក្រុម Hezbollah បានត្រូវអ៊ីស្រាអែលកត់បញ្ចូលឈ្មោះទៅក្នុងបញ្ជីក្រុមភេរវករ។ ក្រុមនេះមិនមែនត្រឹមតែជាសត្រូវរបស់អ៊ីស្រាអែលតែមួយនោះទេ សហរដ្ឋអាមេរិក កាណាដា អូស្ត្រាលី រឺក៏ប្រទេសបារ៉ែន ក៏បានកត់ត្រាក្រុមនេះក្នុងបញ្ជីខ្មៅរបស់ខ្លួនដែរ។
កាលពីដើមខែមិថុនា កន្លងទៅ អ្នករាជានិយមនានាដែលកាន់កាប់ផ្នែកប្រេងឥន្ធនៈ នៅតំបន់ឈូងសមុទ្រពែរស៍ បានប្រកាសដាក់ទណ្ឌកម្មប្រឆាំងសមាជិកក្រុម Hezbollah ដែលរស់នៅ តំបន់ឈូងសមុទ្រពែរស៍ ជាការសងសឹកនឹងសកម្មភាពដែលក្រុម Hezbollah បានបង្កនៅប្រទេសស៊ីរី។ គួរបញ្ជាក់ថា នៅស៊ីរី ក្រុម Hezbollah និកាយChiite ធ្វើសកម្មភាពគាំទ្រប្រធានាធិបតីអាសាដ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ