កងទ័ពអ៊ីស្រាអែលនិងលីបង់ប៉ះទង្គិចគ្នានៅព្រំដែន
ទាហានអ៊ីស្រាអែល និងទាហានលីបង់បានប៉ះប្រយុទ្ធគ្នា នៅព្រំដែន កាលពីថ្ងៃអង្គារ ទី៣ សីហា ២០១០ បណ្តាលឲ្យមានការបារម្ភថា សង្រ្គាមអ៊ីស្រាអែល-លីបង់អាចនឹងផ្ទុះម្តងទៀត។ ក្រុមប្រឹក្សាសន្តិសុខអ.ស.ប.បានកោះប្រជុំបន្ទាន់ ហើយបានអំពាវនាវឲ្យភាគីទាំងពីរមានការអត់ធ្មត់ ចៀសវាងកុំឲ្យការប៉ះទង្គិចគ្នានេះរាលដាលទៅជាសង្រ្គាមធំ។
ចុះផ្សាយនៅថ្ងៃ៖
បទវិភាគរបស់ សេង ឌីណា
វរសេនីយ៍ឯកអ៊ីស្រាអែលម្នាក់ ទាហានលីបង់ពីរនាក់ និងអ្នកកាសែតលីបង់ម្នាក់បានស្លាប់ នៅក្នុងការប្រយុទ្ធគ្នា កាលពីម្សិលមិញនេះ។ ចាប់តាំងពីសង្រ្គាមឆ្នាំ២០០៦មក ការវាយប្រយុទ្ធគ្នា ដោយមានប្រើទាំងអាវុធធុនធ្ងន់ផង កាលពីម្សិលមិញនេះ គឺជាការប៉ះទង្គិចគ្នាទ្រង់ទ្រាយធំបំផុតមិនធ្លាប់មាន រវាងអ៊ីស្រាអែល និងលីបង់។
ដើមហេតុ គឺកើតចេញពីដើមឈើមួយដើម។ នៅមុនពេលកើតមានការប្រយុទ្ធគ្នា ទាហានអ៊ីស្រាអែលបានទៅកាប់ដើមឈើ និងមែកឈើ នៅជាប់នឹងព្រំដែន ដើម្បីកុំឲ្យបាំងកាម៉េរ៉ា ដែលអ៊ីស្រាអែលដាក់ឃ្លាំមើលព្រំដែន។ ទាហានលីបង់ក៏បានបាញ់ប្រហារលើទាហានអ៊ីស្រាអែល ដោយចោទថា ពួកគេឆ្លងចូលទៅកាប់ឈើ នៅប៉ែកខាងលីបង់។ អ៊ីស្រាអែលក៏បានបាញ់តបតវិញ។
ក្រុមប្រឹក្សាសន្តិសុខអ.ស.ប.បានកោះប្រជុំជាបន្ទាន់ កាលពីយប់ថ្ងៃអង្គារ តាមសំណើរបស់រដ្ឋាភិបាលលីបង់។ បន្ទាប់ពីកិច្ចប្រជុំនេះ ក្រុមប្រឹក្សាសន្តិសុខបានអំពាវនាវឲ្យភាគីទាំងសងខាងមានការអត់ធ្មត់ ដើម្បីចៀសវាងកុំឲ្យការប៉ះទង្គិចគ្នានេះរាលដាលទៅជាសង្រ្គាម។ សហរដ្ឋអាមេរិក បារាំង និងសហភាពអឺរ៉ុប ក៏បានធ្វើការអំពាវនាវស្រដៀងគ្នានេះដែរ។
ចំណែករដ្ឋាភិបាលលីបង់ និងរដ្ឋាភិបាលអ៊ីស្រាអែលវិញ នៅតែបន្តចោទប្រកាន់គ្នាទៅវិញទៅមកថា ជាអ្នកទទួលខុសត្រូវ បង្កឲ្យមានការវាយប្រយុទ្ធគ្នា ម្សិលមិញនេះ។ លីបង់ចោទអ៊ីស្រាអែលថាបានរំលោភលើអធិបតេយ្យរបស់ខ្លួន។ ចំណែកអ៊ីស្រាអែលវិញបានអះអាងថា ទាហានរបស់ខ្លួនមិនបានឆ្លងចូលទៅក្នុងទឹកដីលីបង់ដូចការ ចោទប្រកាន់របស់លីបង់នោះទេ។ ការកាប់ឈើនេះ ក៏ត្រូវបានជូនដំណឹងជាមុនទៅកាន់កងមួកខៀវ ដែលឈរជើងនៅព្រំដែនដែរ។
អ៊ីស្រាអែលចោទលីបង់ថា បានដឹងពីគម្រោងកាប់ឈើនេះ ហើយរៀបចំផែនការទុកជាមុន ដើម្បីលបវាយឆ្មក់លើទាហានអ៊ីស្រាអែល។ អ៊ីស្រាអែលក៏បានបង្ហាញភស្តុតាងផងដែរថា មេបញ្ជាការកងទ័ពអ៊ីស្រាអែលដែលស្លាប់ គឺស្លាប់ដោយត្រូវគ្រាប់កាភ្លើងបាញ់ស៊ីប (Sniper)ចំក្បាល ហើយមេបញ្ជាការរូបនោះមិនមែនស្ថិតនៅកន្លែងកាប់ឈើនោះទេ គឺឈរនៅឯបន្ទាយ ចម្ងាយប្រមាណ ១០០ម៉ែត្រពីខ្សែព្រំដែនឯណោះ។
នៅព្រឹកថ្ងៃពុធនេះ កងកម្លាំងអ.ស.ប.ប្រចាំនៅព្រំដែនអ៊ីស្រាអែល-លីបង់បានចេញសេចក្តី ថ្លែងការណ៍មួយបញ្ជាក់ថា ដើមឈើដែលអ៊ីស្រាអែលកាប់ គឺពិតជាស្ថិតនៅក្នុងដីរបស់អ៊ីស្រាអែលពិតមែន។ ទាហានអ៊ីស្រាអែលបានចូលទៅកន្លែងផ្ទុះអាវុធជាថ្មីម្តងទៀត នៅថ្ងៃពុធ ដើម្បីកាប់ដើមឈើ ដែលជាដើមហេតុនោះចោល។ កងមួកខៀវ និងទាហានលីបង់បានតាមដានមើលសកម្មភាពរបស់ទាហានអ៊ីស្រាអែលនេះ ក៏ប៉ុន្តែ មិនមានហេតុការណ៍ណាថ្មីកើតឡើងទៀតឡើយ។
នៅតាមព្រំដែននៃប្រទេសទាំងពីរ គេមិនឃើញមានការប្រមូលផ្តុំទ័ពខុសប្រក្រតីណាមួយនោះទេ។ ក៏ប៉ុន្តែ គេនៅតែមានការបារម្ភថា ការប៉ះទង្គិចគ្នា កាលពីម្សិលមិញ អាចជាឆ្នួនសង្រ្គាមថ្មីមួយទៀត ជាពិសេស ប្រសិនបើពួក Hezbollah លូកដៃចូល។ គួររំឭកថា កាលពីឆ្នាំ២០០៦ សង្រ្គាមរវាងអ៊ីស្រាអែល និងលីបង់បណ្តាលឲ្យមនុស្សរាប់ពាន់នាក់បាត់បង់ជីវិត។ រវាងប្រទេសទាំងពីរនេះ នៅមិនទាន់មានចុះកិច្ចព្រមព្រៀងសន្តិភាពជាមួយគ្នានៅឡើយទេ។ ដូច្នេះ សង្រ្គាមអាចនឹងផ្ទុះឡើងវិញគ្រប់ពេល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ