អាមេរិកគាំទ្រទីក្រុងគែរដើម្បីអន្តរកាលឆ្ពោះទៅរកលទ្ធិប្រជាធិបតេយ្យ
នៅក្នុងដំណើរទស្សនកិច្ច២ថ្ងៃនៅអេហ្ស៊ីប លោកស្រី ហ៊ីលឡារី គ្លីនតុនរដ្ឋមន្ត្រីការបរទេស អាមេរិកនៅថ្ងៃ១៤កក្កដាម្សិលមិញ បានជួបសន្ទនាជាមួយប្រធានាធិបតីថ្មីអេហ្ស៊ីប លោក Mohamed Morsi នៃចលនាអ៊ីស្លាមភាតរបុត្រ។ នៅឱកាសសន្និសីទសារព័ត៌មានរួមគ្នាជាមួយរដ្ឋមន្ត្រីការបរទេសអេហ្ស៊ីបលោក Mohamed Amr លោកស្រី ហ៊ីលឡារី គ្លីនតុនបានថ្លែងបញ្ជាក់ការគាំទ្រជាថ្មីទៀតរបស់សហរដ្ឋអាមេរិកចំពោះពលរដ្ឋអេហ្ស៊ីបនិងអន្តរកាលនៅអេហ្ស៊ីបដើម្បី ឆ្ពោះទៅរកលទ្ធិប្រជាធិបតេយ្យ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤២
"សហរដ្ឋអាមេរិក មានបំណងចង់ធ្វើជាដៃគូដ៏ល្អរបស់អេហ្ស៊ីបនិងគាំទ្រទាំងស្រុងចំពោះ អន្តរកាលមួយដើម្បីឆ្ពោះទៅរកលទ្ធិប្រជាធិបតេយ្យដែលពលរដ្ឋអេហ្ស៊ីប បានខិតខំតស៊ូ ដោយសេចក្តីអង់អាចក្លាហាននិងពលីកម្មដើម្បីលទ្ធិប្រជាធិបតេយ្យនៅក្នុងប្រទេស"-នេះជា សេចក្តីថ្លែងរបស់លោកស្រី ក្លីនតុនរដ្ឋមន្ត្រីការបរទេសអាមេរិកកាលពីថ្ងៃសៅរ៍ម្សិលមិញ ។ លោកស្រី គ្លីនតុន បានបន្តទៀតថា « សហរដ្ឋអាមេរិកនឹងយល់ព្រមផ្តល់ជំនួយយោធាក្នុងទឹកប្រាក់ចំនួន ១៣០០ លានដុល្លារក្នុងមួយឆ្នាំដល់ប្រទេសអេហ្ស៊ីប។
ក្នុងដំណើរទស្សនកិច្ចពីរថ្ងៃនៅអេហ្ស៊ីបក្នុងថ្ងៃទីពីរនៅថ្ងៃអាទិត្យនេះ ប្រមុខការទូតអាមេរិក ត្រូវ ជួបសន្ទនាជាមួយលោកសេនាប្រមុខ Tantaoui ដែលជាប្រមុខក្រុមប្រឹក្សាជាន់ខ្ពស់នៃកងកម្លាំងយោធាអេហ្ស៊ីប ក៏ព្រមទាំងអ្នកតំណាងនៃសង្គមស៊ីវិលជាពិសេស អ្នកតំណាងនៃវិហារគ្រឹស្តសាសនា Coptesនៅអេហ្ស៊ីប និងសកម្មជនការពារសិទ្ធិស្ត្រីអេហ្ស៊ីបផងដែរ។
ដំណើរទស្សនកិច្ចនេះ បានប្រព្រឹត្តទៅនៅខណៈ ដែលអ្នកដឹកនាំនយោបាយអេហ្ស៊ីបកំពុងប្រជែងកម្លាំងគ្នា គឺវាងលោក Morsi ដែលចេញពីក្រុមភាតរបុត្រអ៊ីស្លាមនិងពួកយោធា ដែលលោក Hosni Moubarak បានប្រគល់អំណាចទៅឲ្យ នៅពេលដែលគាត់ធ្លាក់ចេញពីអំណាចប្រធានាធិបតីនៅឆ្នាំ២០១១ និង តុលាការអេហ្ស៊ីបដែរ ។ តុលាការអេហ្ស៊ីប-ដែលបានលុបចោលការបោះឆ្នោតសភាមួយភាគកាលពីពេលថ្មីៗកន្លងទៅនេះនិងដែលជ័យជំនះត្រូវដណ្តើមបានដោយក្រុមភាតរបុត្រអ៊ីស្លាមរបស់លោក Morsi ។
មួយវិញទៀត លោកស្រីគ្លីនតុន ក៏បានរំលឹកជាច្រើនដងដែរ អំពីការគោរពចំពោះលទ្ធផលនៃការបោះឆ្នោតនិងបានអះអាងថា នៅឱកាសជួបសន្ទនាជាមួយលោកសេនាប្រមុខ Tantaoui លោកស្រីនឹងលើកឡើងដែរ អំពីការគាំទ្ររបស់អាមេរិកចំពោះការវិលមកវិញនៃយោធាតែនៅក្នុងតួនាទីតែមួយគត់ពាក់ព័ន្ធនឹងកិច្ចការ ការពារប្រទេសជាតិប៉ុណ្ណោះ។
លោកស្រីហ៊ីលឡារីគ្លីនតុន បានសង្កត់ធ្ងន់ទៀតថា”ដំណើរឆ្ពោះទៅរកមាគ៌ាប្រជាធិបតេយ្យ មានការពិបាក និងក៏តម្រូវឲ្យមានការចរចាគ្នានិងការសម្រុះសម្រួលជាតិ។”យើង មានបំណងចង់ជួយអេហ្ស៊ីបតែ យើងក៏បានដឹងថា គឺពុំមែនអាមេរិកទេដែលជាអ្នកត្រូវអារកាត់បញ្ហាផ្ទៃក្នុងរបស់អេហ្ស៊ីប ក៏ប៉ុន្តែ គឺពលរដ្ឋអេហ្ស៊ីបខ្លួនឯងទេដែលជាអ្នកសម្រេចនៅលើជោគវាសនានៃប្រទេសជាតិរបស់ខ្លួន-នេះជាការគូសបញ្ជាក់របស់ប្រមុខការទូតអាមេរិកលោកស្រីហ៊ីលឡារី គ្លីនតុន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ