អាមេរិកពង្រីកទំនាក់ទំនងពាណិជ្ជកម្មជាមួយអាស៊ាន
អាមេរិកកំពុងខិតខំពង្រីកទំនាក់ទំនងអោយកាន់តែស៊ីជម្រៅជាមួយអាស៊ានក្នុងវិស័យផ្លាស់ប្តូរពាណិជ្ជកម្ម។ នៅក្នុងជំនួបជាមួយលោកចម ប្រសិទ្ធ រដ្ឋមន្ត្រីក្រសួងពាណិជ្ជកម្មកម្ពុជា មន្ត្រីជាន់ខ្ពស់របស់រដ្ឋាភិបាលអាមេរិកទទួលបន្ទុកផ្នែកពាណិជ្ជកម្ម លោក រ៉ុន ឃើក Ron Kirk បានថ្លែងថា លោកបានមើលឃើញពីការរីកចម្រើនខ្លាំងនៃសហប្រតិបត្តិការពាណិជ្ជកម្មរវាងអាមេរិកនិងអាស៊ាន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥០
ប្រទេសអាស៊ានទាំង១០ គឺជាដៃគូសេដ្ឋកិច្ច និងដៃគូយុទ្ធសាស្ត្រសម្រាប់អាមេរិក។ ហើយយើងកំពុងធ្វើការជាប្រចាំដើម្បីពង្រឹងភាពជាដៃគូរវាងអាមេរិកនិងអាស៊ាននៅលើរាល់គ្រប់ទិដ្ឋភាព។ ឧទាហរណ៍ បច្ចុប្បន្ននេះ យើងកំពុងធ្វើសហប្រតិបត្តិការក្នុងវិស័យមួយចំនួនដូចជា ការគ្រប់គ្រងគ្រោះមហន្តរាយ និង សន្តិសុខស្បៀង ជាដើម។
នេះគឺជាការលើកឡើងនៅក្នុងសន្ទរកថារបស់ លោក រ៉ុន ឃើក Ron Kirk មន្ត្រីជាន់ខ្ពស់រដ្ឋាភិបាលអាមេរិកទទួលបន្ទុកផ្នែកពាណិជ្ជកម្ម ដែលត្រូវបានអានដោយឯកអគ្គរដ្ឋទូតអាមេរិកប្រចាំអាស៊ាន លោកដេវី ខាដិន David Carden នៅក្នុងពិធីបើកកិច្ចប្រជុំកំពូលផ្នែកសេដ្ឋកិច្ច អាមេរិក-អាស៊ាន កាលពីថ្ងៃម្សិលមិញនៅខេត្តសៀមរាប។
នៅឯខេត្តទេសចរណ៍វប្បធម៌សៀមរាបនោះ លោក រ៉ុន ឃើកបានជួបពិភាក្សាទ្វេភាគីជាមួយលោកចម ប្រាសិទ្ធ រដ្ឋមន្ត្រីក្រសួងពាណិជ្ជកម្មរបស់កម្ពុជាផងដែរ។ នៅក្នុងជំនួបនោះ លោករ៉ុន ឃើក បានបញ្ជាក់ថា វាមានកន្លែងនៃការរីកលូតលាស់ផ្នែកការផ្លាស់ប្តូរពាណិជ្ជកម្ម និងវិនិយោគ សម្រាប់អាស៊ាននិងអាមេរិក។
នៅឆ្នាំ២០១១កន្លងទៅ ទំហំនៃការផ្លាស់ប្តូរពាណិជ្ជកម្មរវាងអាមេរិក និងអាស៊ានបានឡើងដល់ ១៩៨ពាន់លានដុល្លារ។ តួលេខនេះបានបង្ហាញពីកំណើនពីឆ្នាំ២០១០ដែលមាន១៨៦ពាន់លានដុល្លារ។
អាមេរិក និងចិនកំពុងតែប្រណាំងប្រជែងគ្នាដើម្បីទាញយកប្រយោជន៍ផ្នែកពាណិជ្ជកម្ម និងវិនិយោគពីអាស៊ានដែលមានប្រជាពលរដ្ឋសរុបជាង៦០០លាននាក់។ អាស៊ានវិញក៏មានប្រយោជន៍ក្នុងការពង្រីកទំនាក់ទំនងជាមួយមហាអំណាចសេដ្ឋកិច្ចទាំងពីរនេះដែរ។
នៅក្នុងសប្តាហ៍នេះ មិនមែនមានតែជំនួបរដ្ឋមន្ត្រីពាណិជ្ជកម្មអាស៊ាននិងអាមេរិកទេ វាក៏មានដែរ ជំនួបរដ្ឋមន្ត្រីពាណិជ្ជកម្មអាស៊ានចិន។
បើតាមការអះអាងរបស់រដ្ឋមន្ត្រីពាណិជ្ជកម្មចិន ទំហំនៃការផ្លាស់ប្តូរពាណិជ្ជកម្មចិនអាស៊ានក្នុងរយៈពេល៧ខែដើមឆ្នាំ២០១២នេះបានហក់ឡើងដល់ ២០០ពាន់លានដុល្លារហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ