កូតឌីវ័រកំពុងធ្វើដំណើរឆ្ពោះទៅរកសង្គ្រាមមែនឬ ?
ចុះផ្សាយនៅថ្ងៃ៖
ស្តាប់ - ០៥:៤៤
ស្ថានភាពនៅប្រទេសកូតឌីវ័រ នៅតែជាប់គាំង លោក បាក់បូ ប្រធានាធិបតីផុតអាណត្តិនៅតែធ្វើមិនដឹងមិនឮ នឹងការអំពាវនាវរបស់សហគមន៍អន្តរជាតិ ហើយបន្តកាន់អំណាចយ៉ាងពេញដៃដដែល។ គំនាបការទូត សេដ្ឋកិច្ច នៅតែបានបន្តធ្លាក់លើរដ្ឋាភិបាលខុសច្បាប់របស់កូតឌីវ័រនេះ។ អង្គការសិទ្ធិមនុស្សរបស់អង្គការសហប្រជាជាតិ សហគមន៍អាហ្វ្រិកខាងលិច បានរៀបចំជំនួបប្រជុំវិសាមញ្ញឡើងដើម្បីដោះស្រាយវិបត្តិកូតឌីវ័រ។
ម្សិលមិញ អង្គការសហប្រជាជាតិ បានអនុម័ត លើសេចក្តីសម្រេចចិត្តមួយ បរិហារ រដ្ឋាភិបាលលោកបាក់បូ ថាកំពុងតែកាន់អំណាចដោយខុសច្បាស់ សាបព្រោះអំពើហិង្សា និងបានបង្ខំឲ្យលោកបាក់បូ ប្រគល់កៅអីប្រមុខរដ្ឋទៅឲ្យប្រធានាធិបតីស្របច្បាប់។
បន្ទាប់ពីមូលនិធិរូបិយវត្ថុអន្តរជាតិ និងធនាគារកណ្តាលពិភពលោក ម្សិលមិញ សហភាពសេដ្ឋកិច្ច និងរូបិយវត្ថុអាហ្វ្រិកខាងលិច ក៏បានសម្តែងការគាំទ្រលោកប្រធានាធិបតី វ៉ាត់តារ៉ា ដោយបានស្នើសុំឲ្យធនាគារកណ្តាលនៃរដ្ឋអាហ្វ្រិកខាងលិច ធ្វើការតែជាមួយនឹងរដ្ឋាភិបាលរបស់ប្រធានាធិបតីស្របច្បាប់របស់ប្រទេសកូតឌីវ័រ លោកវ៉ាត់តារ៉ា មួយប៉ុណ្ណោះ។ គឺមានន័យថា លោក បាក់បូ នឹងមិនអាចប៉ះពាល់ ចាត់ចែងលើថវិកាជាតិបាន គ្មានលទ្ធភាពបើកប្រាក់បៀរវត្សដល់មន្ត្រីរដ្ឋការ។
ចំណែកសហគមន៍សេដ្ឋកិច្ចនៃបណ្តារដ្ឋអាហ្វ្រិកខាងលិច Cédéao ក៏បានបើកជំនួបប្រជុំវិសាមញ្ញ ជាលើកទីពីរ ដើម្បីដោះស្រាយវិបត្តិនៅកូតឌីវ័រ។ លើកទីមួយធ្វើឡើងនៅថ្ងៃទី ៧ធ្នូ តែកាលណោះពុំទទួលបានលទ្ធផលអ្វីទេ។ ប៉ុន្តែលើកនេះ សម័យប្រជុំនឹងផ្តោតទៅលើការដាក់ទណ្ឌកម្មលើលោក បាក់បូ ផង និងក៏ទំនងជាផ្តល់តម្លែដល់ការប្រើកម្លាំងប្រឆាំងនឹងលោកបាក់បូ។ ការប្រជុំនេះប្រព្រឹត្តទៅ ក្នុងខណៈពេលដែលភាគីលោកវ៉ាត់តារា បានស្នើសុំឲ្យសហគមន៍អន្តរជាតិផ្តួលរំលំលោកបាក់បូ ចេញពីអំណាច។
សហរដ្ឋអាមេរិក ក៏បានពិភាក្សាជាមួយនឹងសហគមន៍អាហ្វ្រិករួចហើយ ចំពោះលទ្ធភាពនៃការបង្កើនទ័ពមួកខៀវនៅក្នុងប្រទេសកូតឌីវ័រនេះ។
កងកម្លាំងអង្គការសហប្រជាជាតិ ពុំមានសមត្ថភាពអ្វីសម្រាប់ច្បាំងទេ។ ប៉ុន្តែដំណោះស្រាយវិបត្តិកូតឌីវ័រ តាមរយៈការប្រើកម្លាំងទ័ព ឬ ដោយធ្វើសង្គ្រាម គឺជាសេណារីយូ ដែលគេគិតថាអាចទៅរួច ! ដូចការប្រកាសរបស់នាយករដ្ឋមន្ត្រីស្របច្បាប់ កូតឌីវ័រ នៅថ្ងៃ ម្សិលមិញ។ ព្រោះរាល់គំនាបការទូត និងសេដ្ឋកិច្ច ហាក់មិនបានធ្វើរដ្ឋាភិបាលលោកបាក់បូ ហាក់គ្មានរង្គោះរង្គើសោះ។ ធនាគារពិភពលោក មូលនិធីរូបិយវត្ថុអន្តរជាតិ បាននាំគ្នាបិទខ្ទប់ថវិកា នៅខាងក្នុងប្រទេស ការដឹកជញ្ជូនគ្រឿងឧបភោគបរិភោគ តាមផ្លូវគោក និងផ្លូវដែក រវាងពីទីក្រុង ប៊ូអាគេ ភាគខាងជើង មករដ្ឋធានី អាប៊ីហ្សង់ ត្រូវកាត់ផ្តាច់។ ម្សិលមិញលោកបាក់បូ បានថែមទាំងបញ្ចេញប្រាក់ប្រមាណ៨០ពាន់លានហ្វ្រង់កូតឌីវ័រ ដើម្បីបើកប្រាក់ខែ ជូនបុគ្គលិករដ្ឋ។ អ្នកវិភាគខ្លះ សង្ស័យថា រដ្ឋាភិបាលលោកបាក់បូ ដែលឯកាបំផុត នៅលើឆាកអន្តរជាតិ អាចនឹងបង្កើតប្រាក់ខ្លួនឯងផង។ ទោះបីនេះជាដំណើរការវែងឆ្ងាយនិងសាំញ៉ាំសម្រាប់ក្រសែភ្នែកធនាគារក៏ដោយ។
ការព្រួយបារម្ភខ្លាំង នឹងផ្តោតទៅលើថ្ងៃទី ២៩ធ្នូ នៅពេលដែលក្រុមលោក បាក់បូ ប្រកូកប្រកាស ធ្វើបាតុកម្ម នៅទីក្រុងអាប៊ីហ្សង់។ ទោះបីជាលោក Charles Blé Goudé មនុស្សខ្លាំងរបស់លោកបាក់បូ ដែលជាអ្នកផ្តួចផ្តើមគំនិត បានអះអាងថាជាបាតុកម្ម ដោយសន្តិវិធី។
ដើម្បីបញ្ចៀសអំពើហិង្សា ប្រទេសបារាំងដែលជាអតីតប្រទេសធ្លាប់ធ្វើអាណានិគមលើប្រទេសកូតឌីវ័រ បានប្រកាសនៅថ្ងៃនេះ ជាថ្មីម្តងទៀតបើកច្រកចុងក្រោយឲ្យលោកបាក់បូ ដើរចេញពីតំណែងដោយកិត្តិយស ជាថ្នូរនឹងភាពស្ងប់ស្ងាត់សន្តិភាពក្នុងប្រទេស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ