ម៉ាលី ៖ យុទ្ធសាស្ត្របញ្ឆោត ដ៏ស្រទន់របស់មេដឹកនាំ AQMI
ចុះផ្សាយនៅថ្ងៃ៖
ស្តាប់ - ០៤:១៣
វិទ្យុបារាំងអន្តរជាតិ RFI និងកាសែត Libération ចុះផ្សាយទាំងស្រុងនូវផែនការលម្អិតរបស់ក្រុមភេរវជនអាល់កៃដា ប្រចាំអាហ្វ្រិកខាងជើង (AQMI) ដែលចង់យកមកអនុវត្តក្នុងប្រទេស ម៉ាលី។ ឯកសារនេះចុះហត្ថលេខាដោយ ឌ្រូកាឌែល (Droukdel)មេដឹកនាំ AQMI ដោយផ្ទាល់។ ឯកសារនេះ ត្រូវបានរកឃើញដោយអ្នកកាសែត RFI និង Libération ដែលបានចុះទៅយកព័ត៌មាន នៅប៉ែកខាងជើងប្រទេសម៉ាលី។ មេដឹកនាំចលនាភេរវនិយម AQMI ស្និទ្ធនឹងអាល់កៃដា បានសរសេរយ៉ាងច្បាស់អំពីផែនការចង់បង្កើតរដ្ឋអ៊ីស្លាម តែគ្មានពាក្យថាអ៊ីស្លាមជ្រុលនិយម ជីហាត នៅភាគខាងជើងប្រទេសម៉ាលី។ នេះគឺជាលើកទីមួយហើយ ដែលឯកសាររបស់ពួកភេរវជនអាល់កៃដាប្រចាំអាហ្វ្រិកខាងជើងត្រូវបាន ចុះផ្សាយជាសាធារណៈ។
ផែនការលម្អិតរបស់ AQMI ដែលចុះថ្ងៃទី២០ កក្កដា ២០១២ (មុនអន្តរាគមន៍យោធារបស់បារាំង) ត្រូវបានរកឃើញដោយអ្នកកាសែតរបស់ RFI និង Libaration កាលពីថ្ងៃទី១៦ ខែកុម្ភៈ ឆ្នាំ២០១៣ នៅទីក្រុង Tombouctou ក្រោយពីកងទ័ពបារាំងបានវាយបណ្តេញក្រុមឧទ្ទាម និងក្រុមភេរវជនចេញពីប៉ែកខាងជើងម៉ាលី។
យោងតាមឯកសារនេះ Droukdel មេដឹកនាំ AQMI បានដាក់ចេញនូវគោលដៅមួយច្បាស់លាស់ គឺបង្កើតរដ្ឋអ៊ីស្លាមមួយ នៅប៉ែក ខាងជើងប្រទេសម៉ាលី ដោយប្រើយុទ្ធសាស្រ្ត សហការជាមួយក្រុមឧទ្ទាមម៉ាលី ដើម្បី វាយដណ្តើមកាន់កាប់យកតំបន់ខាងជើងម៉ាលី និងកំណត់ផ្លូវដែលត្រូវដើរយ៉ាងច្បាស់ៗ។ កងកម្លាំងរបស់ AQMI ត្រូវទៅពង្វង់ប្រជាជនក្នុងស្រុកឱ្យស្រលាញ់និងចូលចិត្ត បន្លំភ្នែកក្រុមចលនាឧទ្ទាមប្រដាប់អាវុធនៅភាគខាងជើងថាមានអំណាច ដែលធ្វើដូច្នេះសហគមន៍អន្តរជាតិនឹងចាប់អារម្មណ៍ឈឺឆ្អាល។
AQMI ជាក្បាលម៉ាស៊ីនដឹកនាំ និងសម្រេចការ ប៉ុន្តែមិនលេចមុខជាផ្លូវការសោះឡើយ។ ក្រុមចលនាភេរវនិយមក្នុងតំបន់ ពួកឧទ្ទាមរំដោះម៉ាលី MNLA ដែលតាំងខ្លួនមិនប្រកាន់សាសនា និងមានបណ្តាញពេញពិភពលោក ត្រូវយកប្រើប្រាស់សម្រាប់បិទបាំងការពិត។ ប្រមុខរដ្ឋាភិបាលអនាគត ត្រូវប្រគល់ទៅឱ្យមេដឹកនាំចលនាឧទ្ទាម Ansar Dine ព្រោះមានអំណាចយោធា ហើយរូបឌ្រូកាឌែល មេកើយ AQMI និងមនុស្សខ្លាំងមួយចំនួនទៀត ត្រូវនៅពីក្រោយខ្នងចាំញាក់កងទ័ពទាំងនោះ។ ពោលគឺគេចង់បង្កើតរដ្ឋអ៊ីស្លាមមួយ ដែលមិនជារដ្ឋាភិបាលអ៊ីស្លាមតឹងរ៉ឹងជីហាត មិនអនុវត្តច្បាប់ និងទំនៀមទម្លាប់តឹងរ៉ឹងរបស់អ៊ីស្លាម នៅម៉ាលី ភ្លាមៗ នោះទេ។ ប៉ុន្តែ បើតាមឯកសារលម្អិតរបស់ AQMIនេះដដែល មេកើយជាតិអាល់ហ្សេរី ឌ្រូកាឌែ ហៅ អាប៊ូ ម៉ូសា អាប់ឌឺលូអាឌូ មានគម្រោងការណ៍យ៉ាង ដាក់បញ្ចូលច្បាប់អ៊ីស្លាម Charia នៅភាគខាងជើងម៉ាលី ដោយគ្រាន់តែរង់ចាំពង្រឹងអំណាចពេញលេញសិន ទើបចាប់ផ្តើមអនុវត្ត តែប៉ុណ្ណោះ។
នេះសបញ្ជាក់ យ៉ាងច្បាស់អំពីយុទ្ធសាស្ត្រឱនដាក់គ្រាប់របស់មេដឹកនាំភេរវជន AQMI និងបញ្ជាក់ផងដែរពីជម្រៅនៃសម្ពាធផ្ទៃក្នុងរបស់ចលនាអាល់កៃដា។ ថ្វីដ្បិតតែគម្រោងដ៏លម្អិតរបស់ AQMIនេះ មានរចនាសម្ព័ន្ធ មានវគ្គ មានស្នើ មានជំពូក សរសេរជាភាសាអារ៉ាប បកប្រែជាភាសាយ៉ាងត្រឹមត្រូវ ប៉ុន្តែឯកសារនេះបានឆ្លុះបញ្ចាំងឱ្យឃើញពីកង្វះស្ថានភាពជាក់ស្តែងលើសមរភូមិ និងលើមេទ័ពក្នុងពេលធ្វើប្រតិបត្តិការ។ គ្មានចំណុច ណាមួយបញ្ជាក់ថាបទបញ្ជាកំណត់ក្នុងផែនការនេះត្រូវបានគោរពតាមឡើយ។
តាមការពិត ឌ្រូកាឌែ បានទទួលស្គាល់ខ្លួនឯងថាមានពិសោធន៍ក្មេងខ្ចីក្នុងការដឹកនាំ ប៉ុន្តែតំបន់ភាគខាងជើងម៉ាលី គឺជាកន្លែងធ្វើពិសោធន៍ ! បើមិនសម្រេចថ្ងៃនេះ ក៏គង់មានថ្ងៃក្រោយទៀតដែរ។ បើតាមឯកសារលម្អិត ដែលមានចំណងជើង “គោលការណ៍ណែនាំស្តីអំពីផែនការអ៊ីស្លាមជីហាតនៅតំបន់ម៉ាលីខាងជើង" កម្រាសជាង៥០ទំព័រ ចុះថ្ងៃទី ២០កក្កដាឆ្នាំ២០១២ នេះ អាចចាត់ទុកថាជាសារព្រមានដល់ប្រធានាធិបតីម៉ាលីថ្មីឱ្យចងចាំថា AQMI អាចនឹងចេញធ្វើពិសោធន៍ជាថ្មីទៀត។ យុទ្ធសាស្ត្ររបស់ក្រុមនេះ គឺគ្រាន់តែផ្អាកសកម្មភាពភេរវនិយមមួយរយៈ ដោយវិធីសំងំបែបស្រទន់ដើម្បីយកពិស។
អន្តរាគមន៍យោធារបស់បារាំងកាលពីដើមឆ្នាំ បានបញ្ចប់ការកាន់អំណាច១០ខែរបស់ឧទ្ទាមអ៊ីស្លាមជីហាត នៅភាគខាងជើងម៉ាលី និងបានបណ្តេញចេញក្រុមប្រដាប់អាវុធ AQMI និងAnsar Dine ពីកន្លែងលាក់ខ្លួន តាមរូងភ្នំ និងប្រមូលបានអាវុធយុទ្ធភណ្ឌ និងប្រេងឥន្ធនៈ ដ៏សន្ធឹកសន្ធាប់។ ប៉ុន្តែក្រុមនេះនៅតែមានសមត្ថភាពបំផ្លាញម៉ាលីដដែល តាមរយៈការធ្វើភេរវកម្មអត្តឃាតផ្សេងៗ។
ក៏ប៉ុន្តែ ឯកសារនេះក៏បានបង្ហាញឲ្យឃើញផងដែរថា ក្រុមភេរវជន AQMI គ្មានគោលដៅវាយលុកចុះមកប៉ែកខាងត្បូងម៉ាលីនោះទេ។ អ្នកដែលចង់វាយ យករដ្ឋធានីបាម៉ាកូ គឺក្រុមឧទ្ទាមម៉ាលី ដើម្បីងាយបង្ខំរដ្ឋាភិបាលអន្តរកាលម៉ាលីឱ្យចុះហត្ថលេខានិងបោះបង់ភាគខាងជើងមកឱ្យខ្លួន៕
ដើម្បីអានឯកសារដើមទាំងស្រុង (ជាភាសាបារាំង) សូមចុចត្រង់នេះ
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ