តើលោកអូបាម៉ាចង់បានអ្វីពីជំនួបកំពូលអាមេរិក អាហ្វ្រិក?
ចុះផ្សាយនៅថ្ងៃ៖
ស្តាប់ - ០៤:៣០
ចាប់ពីថ្ងៃអង្គារទី ៥ និងទី ៦សីហា ទីក្រុងវ៉ាស៊ីនតោនត្រូវបើកទ្វារទទួលប្រមុខរដ្ឋ និងមេដឹកនាំរបស់ប្រទេសជាង៥០មកពី ទ្វីបអាហ្វ្រិក។ នៅក្នុងជំនួបកំពូលអាមេរិក-អាហ្វ្រិក បញ្ហាសុខភាព សង្គម សេដ្ឋកិច្ច សន្តិសុខ និងអភិបាលកិច្ចនៅអាហ្វ្រិកជាប្រធានបទដែលលោកប្រធានាធិបតីអាមេរិក បារ៉ាក់ អូបាម៉ាលើកទៅជជែកជាមួយមេដឹកនាំអាហ្រ្វិក។ ប្រជាជនអាហ្វ្រិកធ្លាប់អស់សង្ឃឹមដោយសារនយោបាយបែរខ្នងរបស់លោកអូបាម៉ា កាលពីក្នុងអាណត្តិទីមួយ។ តើអាមេរិករបស់លោកអូបាម៉ានៅតែបែរខ្នងដាក់អាហ្វ្រិកតទៅទៀតដែរឬទេ?
កិច្ចប្រជុំកំពូលអាមេរិក-អាហ្រ្វិកនៅក្នុងទឹកដីអាមេរិក ធ្វើឡើងជាលើកទីមួយ មិនធ្លាប់មាននៅក្នុងប្រវត្តិសាស្រ្តទំនាក់ទំនងអាមេរិក និងអាហ្វ្រិក។ កិច្ចប្រជុំកំពូលដែលមានថ្នាក់ដឹកនាំកំពូលរបស់បណ្តាប្រទេសអាហ្វ្រិកជាង៥០ចូលរួម ត្រូវបានរដ្ឋាភិបាលអាមេរិករៀបចំយ៉ាងម៉ត់ចត់បំផុត ទៅតាមការសន្យារបស់លោកអូបាម៉ា ដែលធ្លាប់បានប្រកាសឡើង នៅក្នុងអំឡុងទស្សនកិច្ចផ្លូវរដ្ឋរបស់លោកនៅក្នុងប្រទេសអាហ្រ្វិកបី កាលពីខែមិថុនា ឆ្នាំមុន។
នៅក្នុងកិច្ចប្រជុំកំពូលអាមេរិក-អាហ្វ្រិក ទីក្រុងវ៉ាស៊ីនតោនបានប្រកាសថា ខ្លួនបើកទ្វារចំហរទទួលគ្រប់មេដឹកនាំអាហ្វ្រិក លើកលែងតែមេដឹកនាំប្រទេសដែលគ្មានទំនាក់ទំនងល្អជាមួយអាមេរិក ឬត្រូវព្យួរចេញពីសមាជិកភាពរបស់សហព័ន្ធអាហ្រ្វិក។ មេដឹកនាំអវត្តមាននៅក្នុងជំនួបកំពូលអាមេរិក-អាហ្វ្រិកមាន មេដឹកនាំស៊ូដង់ លោកអូម៉ា អែល បាស្ហៀរ ដែលកំពុងត្រូវតុលាការព្រហ្មទណ្ឌអន្តរជាតិតាមរកចាប់ខ្លួន មេដឹកនាំប្រទេសហ្សីមបាវ៉េ រូប៊ែរ មូហ្គាបេ ដែលអាមេរិកដាក់ទណ្ឌកម្មមិនឲ្យជាន់ដីអាមេរិកចាប់តាំងពីឆ្នាំ ២០០១។ ចំណែកមេដឹកនាំថ្មីរបស់អេហ្ស៊ីបដែលឡើងកាន់អំណាចតាមរយៈរដ្ឋប្រហារក៏នឹងគ្មានមុខនៅក្នុងជំនួបកំពូលដែលអាមេរិករៀបចំដែរ។ តាមអ្នកនាំពាក្យរបស់សេតវិមាន ការដែលមេដឹកនាំរបស់ប្រទេសអាហ្រ្វិកមួយចំនួនអវត្តមាន ក៏ដោយសារតែរដ្ឋាភិបាលអាមេរិកមិនចង់លើកទឹកចិត្តដល់មេដឹកនាំប្រទេសណាដែលរំលោភ កែប្រែរដ្ឋធម្មនុញ្ញដើម្បីអាចពន្យារការកាន់អំណាចរបស់ខ្លួន តាមរបៀបផ្តាច់ការ។
ជំនួបកំពូលអាមេរិក អាហ្វ្រិកនឹងបើកធ្វើឡើងជាមួយប្រធានបទសុខភាព ដោយផ្តោតសំខាន់លើការរីករាតត្បាតនៃមេរោគអេបូឡា ដែលពេលនេះ កំពុងក្លាយជាក្តីបារម្ភសម្រាប់សុខភាពពិភពលោកទាំងមូល។ បន្ទាប់មក គឺបញ្ហាសេដ្ឋកិច្ច និងសន្តិសុខ នៅអាមេរិក ដែលលោកប្រធានាធិបតីអាមេរិកត្រូវលើកមកនិយាយជាមួយ មេដឹកនាំអាហ្វ្រិក។ នៅក្នុងជំនួបកំពូលអាមេរិក-អាហ្វ្រិក គឺលោកប្រធានាធិបតីអាមេរិកដែលជាអ្នកកាច់ចង្កូត មានមតិនិយាយច្រើនជាងគេ ឬអាចនិយាយបែបម្យ៉ាង គឺ លោកអូបាម៉ានឹងធ្វើជាគ្រូ ជាវាគ្មិនអន្តរាគមន៍ និយាយទៅកាន់មេដឹកនាំអាហ្វ្រិក ដែលប្រកាន់ខ្លួនដូចជាកូនសិស្សដែលរង់ចាំស្តាប់យោបល់ ការពន្យល់ ឲ្យដំបូន្មានពីគ្រូបង្រៀន។ វាជារឿងធម្មតា ព្រោះថា អាមេរិកជាមហាអំណាច ដែលប្រទេសអាហ្វ្រិកក្រីក្រ ជាច្រើនត្រូវខ្លបខ្លាច និងត្រូវប្រកាន់ឥរិយាបទទន់ភ្លន់ដើម្បីអាចទទួលជំនួយពីអាមេរិក។
ជាផ្លូវការ អាមេរិកបានប្រកាសក្តែងៗថា នឹងចាត់ទុក អាហ្វ្រិកជាដៃគូពាណិជ្ជកម្មស្មើភាព គឺគ្មានអ្នកណាជាធំ ឬតូច ប៉ុន្តែ ត្រូវបានទទួលប្រយោជន៍ស្មើៗគ្នា។ អាមេរិកមើលឃើញសក្តានុពលសេដ្ឋកិច្ចរបស់អាហ្វ្រិកដែលជាប់លេខពីរបន្ទាប់ពីអាស៊ី។ តាំងពីនៅក្នុងកិច្ចប្រជុំជាមួយប្រធានសហគ្រាសអាហ្រ្វិកវ័យក្មេង កាលពីដើមសប្តាហ៍ លោកអូបាម៉ាបានអំពាវនាវឲ្យប្រជាជនអាហ្វ្រិកងើបឡើង និងហ៊ានតវ៉ាទាមទារយកប្រយោជន៍ពីការវិនិយោគបរទេស។ ប្រធានាធិបតីអាមេរិកទំនងចង់និយាយយោងដល់ប្រទេសចិន ដែលប្រជាជនអាហ្វ្រិកជាច្រើនបានរិះគន់ថា បោះទុនវិនិយោគនៅទឹកដីអាហ្វ្រិក ប៉ុន្តែ មិនបានផ្តល់ផលប្រយោជន៍ដល់ប្រជាជនក្នុងស្រុក។
បើនិយាយពីការបោះទុនវិនិយោគក្នុងទឹកដីអាហ្វ្រិក អាមេរិកស្ថិតនៅដាច់ឆ្ងាយ ក្រោយសហភាពអឺរ៉ុប និងចិន ដែលការដោះដូរពាណិជ្ជកម្មចិន អាហ្វ្រិកមានដល់ទៅ ១០០ពាន់លានដុល្លារ។ ប្រាកដណាស់ថា អាមេរិកមិនអាចប្រជែងជាមួយប្រទេសចិនភ្លាមៗ ប៉ុន្តែ ការពង្រឹងទំនាក់ទំនង ពាណិជ្ជកម្ម ដោយប្រមូលមេដឹកនាំអាហ្រ្វិកឲ្យជួបជុំគ្នានៅក្នុងទឹកដីអាមេរិក លោកប្រធានាធិបតីអាមេរិកចង់យកទឹកដី អាហ្វ្រិកដើម្បីទប់ទល់នឹងឥទ្ធិពលរបស់ចិន កុំឲ្យចេះតែរីកធំ។ ចង់ ឬមិនចង់ ការលើកឡើងពីលទ្ធិប្រជាធិបតេយ្យ និងដោះដូរពាណិជ្ជកម្មដោយស្មើភាព នឹងអាចលើកទឹកចិត្តដល់មេដឹកនាំអាហ្វ្រិក និងមេដឹកនាំសហគ្រិនពិចារណា ថ្លឹងថ្លែង ដកទំនុកចិត្តពីក្រុមហ៊ុនចិន ដែលកំពុងចាប់មានកេរ្តិ៍ឈ្មោះមិនសូវល្អនៅអាហ្វ្រិក។
ក្រៅតែពីសេដ្ឋកិច្ច អាមេរិកយកចិត្តទុកដាក់និយាយផងដែរពីបញ្ហាសន្តិសុខ ការរីកធំធាត់នៃក្រុមភេរវកម្មនៅអាហ្វ្រិក ជាពិសេស ការវាយលុករបស់ក្រុមអ៊ីស្លាមជ្រុលនិយមសូម៉ាលីទៅក្នុងប្រទេសកេនយ៉ា ដែលជាទឹកដីកំណើតរបស់ឪពុកលោកអូបាម៉ា។
មួយឆ្នាំក្រោយជាន់ទឹកដីអាហ្រ្វិក ប្រធានាធិបតីអាមេរិកលោកបារ៉ាក់ អូបាម៉ា ដែលមានឪពុកជាជនជាតិកេនយ៉ាបានសន្យារៀបចំជំនួបកំពូលអាមេរិក អាហ្វ្រិក។ ការទន្ទឹងរង់ចាំរបស់បណ្តាប្រទេសអាហ្វ្រិកពីមេដឹកនាំរបស់ប្រទេសមហាអំណាចដូចជាអាមេរិកនៅមានកំរិតខ្ពស់។ ប៉ុន្តែ ប្រជាជនអាហ្វ្រិកនឹងអាចខកចិត្តជាថ្មី ព្រោះថា នៅក្នុងជំនួបកំពូលលើកនេះ គេគ្រាន់តែពិភាក្សា និងយ៉ាងហោច មានត្រឹមការណែនាំក្រុមវិនិយោគអាមេរិកឲ្យស្គាល់មេដឹកនាំ ឬមេសហគ្រិនអាហ្រ្វិក។ ប៉ុន្តែ នឹងគ្មានកិច្ចព្រមព្រៀង ឬជំនួបទ្វេភាគី ដែលលោកអូបាម៉ានឹងធ្វើជាមួយមេដឹកនាំបណ្តាប្រទេសអាហ្វ្រិកឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ