កាដាហ្វីស្វែងរកច្រកចេញ អ. ស. ប. ស្វែងរកសេចក្តីសម្រេចចិត្ត
ក្នុងខណៈពេលដែលសហគមន៍អន្តរជាតិកំពុងស្វែងរកមធ្យោបាយដើម្បីធ្វើការ ប្រឈមមុខទល់នឹងការវាយប្រយុទ្ធគ្នាយ៉ាងសាហាវនៅប្រទេសលីប៊ី មេដឹកនាំផ្តាច់ការមូអាម៉ារកាដាហ្វីឯណេះក៏កំពុងតែខិតខំរិះរក ច្រកចេញដើម្បីគេចយករួចខ្លួន។ វិបត្តិនយោបាយនិងការបះបោរដ៏ហិង្សានៅលីប៊ីនេះបានបណ្តាលឲ្យមាន មនុស្សស្លាប់រាប់ពាន់ឬរាប់ម៉ឺននាក់ និងមានអ្នកភៀសខ្លួនប្រមាណមួយលាននាក់។
ចុះផ្សាយនៅថ្ងៃ៖ កែប្រែថ្ងៃទី៖
បទវិភាគរបស់ សៀក សារិន
បើយោងតាមទូរទស្សន៍Al Djazira និងសារព័ត៌មានជាភាសាអារ៉ាប់ កាដាហ្វីបានស្នើទៅពួកអ្នកបះបោរលីប៊ីឲ្យជួបប្រជុំគ្នានៅក្នុងសមាជប្រជាជនដែលមានលក្ខណៈជាសភានៅលីប៊ីដើម្បីពិនិត្យមើលពីលក្ខខណ្ឌនៃការចាកចេញពីមុខតំណែងរបស់ខ្លួនហើយភ្ជាប់មកជាមួយនូវការធានាដល់សុវត្ថភាពរបស់ខ្លួននិងគ្រួសារផងទៀត។
ទូរទស្សន៍Al Djaziraបានបញ្ជាក់ទៀតថា សំណើរបស់កាដាហ្វីនេះបានធ្វើទៅកាន់ “ក្រុមប្រឹក្សាជាតិ” របស់បក្សប្រឆាំងលីប៊ីដែលមានទីតាំងនៅទីក្រុងបេនហ្កាហ្ស៊ី គឺ“ក្រុមប្រឹក្សាជាតិ”នេះហើយដែលតំណាងតំបន់ភាគច្រើនដែលឋិតនៅក្រោមការត្រួតត្រានៃពួកអ្នកបះបោរនៅប៉ែកខាងកើតនៃប្រទេស។
រីឯសារព័ត៌មានAchark Al Aousat ដែលមានទីតាំងនៅទីក្រុងឡុងដ្រឹ៍ ហើយនិងសារព័ត៌មានal Bayan ដែលមានទីតាំងនៅប្រទេសអារ៉ាប់រួមបានថ្លែងឲ្យដឹងថា មេដឹកនាំរបបផ្តាច់ការលីប៊ីកំពុងខិតខំរិះរកធ្វើការសម្រុះសម្រួល។
ចំណែកឯប្រភពស្និទ្ធនឹង“ក្រុមប្រឹក្សាជាតិ”របស់បក្សប្រឆាំងលីប៊ីបានបញ្ជាក់ប្រាប់ថា “កាដាហ្វីបានស្នើយល់ព្រមប្រគល់អំណាចឲ្យទៅប្រធានសភាលីប៊ីហើយចាកចេញពីប្រទេស លុះត្រាណាតែគេយល់ព្រមឲ្យខ្លួនមានច្រកចេញឲ្យបានសមរម្យហើយនិងយល់ព្រមធានាឲ្យយកប្រាក់មួយចំនួនតាមខ្លួនផងទៀត។
ក៏ប៉ុន្តែ “ក្រុមប្រឹក្សាជាតិ”ពុំយល់ព្រមតាមការស្នើរបស់កាដាហ្វីឡើយ ដោយគេយល់ថា ធ្វើយ៉ាងនេះជាការប្រមាថមើលងាយដល់ប្រជាពលរដ្ឋលីប៊ីរាប់ម៉ឺននាក់ដែលទទួលរងគ្រោះនឹងអំពើផ្តាច់ការនិងអំពើហិង្សារបស់កាដាហ្វី។
សំណើសម្រុះសម្រួលរបស់មូអាម៉ារកាដាហ្វីនេះធ្លាក់ចំពេលដែលកងកម្លាំងរបស់កាដាហ្វីបានធ្វើការវាយលុកតបតនៅតំបន់ឈូងសមុទ្រSyrte ដើម្បីវាយដណ្តើមយកទីក្រុងRas Lanouf។ ទីក្រុងRas Lanoufគឺជាកំពង់ផែប្រេងកាតយុទ្ធសាស្ត្រមួយដ៏សំខាន់សម្រាប់ប្រទេសលីប៊ី។
កាលពីថ្ងៃចន្ទទី៧មីនាម្សិលមិញ កងកម្លាំងស្មោះស្ម័គ្រនឹងកាដាហ្វីបានយកយន្តហោះទៅទម្លាក់គ្រាប់បែកលើទីក្រុងRas Lanoufដល់ទៅបីលើក។ ប្រជាជនស៊ីវិលលីប៊ីមួយចំនួននៅឯទីក្រុងMisrata និងនៅទីក្រុងZaouïah វិញ បានឋិតនៅក្នុងការឡោមព័ទ្ធរបស់កងកម្លាំងស្មោះស្ម័គ្រនឹងកាដាហ្វីដែលជាមូលហេតុបណ្តាលឲ្យគេខ្លាចក្រែងមានឧបទ្ទវហេតុនិងគ្រោះថ្នាក់ដ៏ធំដល់ប្រជាពលរដ្ឋនៅទីនោះ។
ប្រទេសបារាំងនិងប្រទេសអង់គ្លេសដែលជាមហាអំណាចអឺរ៉ុបឋិតនៅជិតប្រទេសលីប៊ីបានប្រកាសឲ្យដឹងថា ពួកគេនឹងខិតខំធ្វើយ៉ាងណាទទួលឲ្យបានពីអ ស ប នូវការបង្កើតឲ្យមាន “តំបន់ហាមឃាត់ពុំឲ្យមានការហោះហើរមួយនៅលើដែនដីលីប៊ី” ដើម្បីខាឃាំងកុំឲ្យកងកម្លាំងអាកាសរបស់កាដាហ្វីអាចទៅទម្លាក់គ្រាប់បែកលើប្រជាជនបះបោរលីប៊ី។
មន្ត្រីក្រសួងការបរទេសអង់គ្លេសបានថ្លែងឲ្យដឹងថា គេបានខ្នះខ្នែងសហការជាមួយសមភាគីដើម្បីទទួលឲ្យបាននូវសេចក្តីសម្រេចចិត្តដើម្បីបង្កើតឲ្យបាននូវ តំបន់ហាមឃាត់ពុំឲ្យមានការហោះហើរមួយនៅលើដែនដីលីប៊ី” ដោយមានការគាំទ្រពីសំណាក់ប្រទេសក្នុងតំបន់នៅក្នុងក្របខ័ណ្ឌនៃការគោរពច្បាប់អន្តរជាតិ។ ប្រទេសបារាំងគាំទ្រគោលជំហររបស់ប្រទេសអង់គ្លេសនេះ។
មុននឹងមានសេចក្តីសម្រេចចិត្តពីអ ស ប បក្សសម្ព័ន្ធអូតង់បានកេណ្ឌប្រមូលជាស្រេចនូវយន្តហោះយកការណ៍ “AWACS” របស់ខ្លួនដើម្បីធ្វើការឃ្លាំយាមទាំងយប់ទាំងថ្ងៃ។ នេះជាប្រកាសឲ្យដឹងដោយលោកឯកអគ្គរដ្ឋទូតអាមេរិកប្រចាំបក្សសម្ព័ន្ធអូតង់។
ទាំងសហគមន៍អន្តរជាតិ ទាំងអង្គការសហប្រជាជាតិពុំអាចឈរឱបដៃមើលមេដឹកនាំផ្តាច់ការមូអាម៉ារកាដាហ្វីវាយប្រហារយ៉ាងសាហាវទៅលើប្រជាជនលីប៊ីស្លូតត្រង់យ៉ាងនេះបានឡើយ។ កងកម្លាំងយោធានៃបក្សសម្ព័ន្ធអូតង់បានត្រៀមលក្ខណៈជាស្រេចនឹងចូលធ្វើអន្តរាគមន៍យ៉ាងឆាប់រហ័ស។
រីឯលោកប្រធានាធិបតីអាមេរិកបារ៉ាក់អូបាម៉ាវិញសង្ឃឹមថា នៅចំពោះមុខសម្ពាធដ៏សែនខ្លាំងក្លាបែបនេះពីសំណាក់សហគមន៍អន្តរជាតិ សហការីរបស់កាដាហ្វីច្បាស់ជាបន្ទន់និងប្តូរប្រែឥរិយាបថរបស់ខ្លួន។ លោកអូបាម៉ាបានបញ្ជាក់បន្ថែមទៀតថា៖ “សហការីរបស់កាដាហ្វីត្រូវតែមានការទទួលខុសត្រូវនៅចំពោះមុខទង្វើរបស់ខ្លួន ហើយនិងក្នុងការជ្រើសយកមាគ៌ាសម្រាប់អនាគតរបស់ខ្លួន”។
គួរកត់សម្គាល់ថា ពាក្យសំដីចុងក្រោយប៉ុន្មានម៉ាត់របស់លោកប្រធានាធិបតីអាមេរិកបារ៉ាក់អូបាម៉ានេះប្រៀបបានទៅនឹងសម្ពាធមួយដ៏មានប្រសិទ្ធិភាពទៅលើទាហានលីប៊ីចុងក្រោយដែលនៅស្មោះស្ម័គ្រនឹងមេដឹកនាំផ្តាច់ការលីប៊ីមូអាម៉ារកាដាហ្វី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ