ហិង្សារវាងសហគមន៍សាសនាបានបណ្តាលឲ្យមានជនរងគ្រោះជាច្រើន
ការប្រឈមមុខដាក់គ្នាដ៏កាចសាហាវបំផុតរវាងសហគមន៍គ្រិស្តសាសនា coptes និងសហគមន៍អ៊ីស្លាម បានកើតឡើងកាលពីយប់ថ្ងៃសៅរ៍៧ ឧសភាម្សិលមិញនៅក្នុងសង្កាត់មួយនៃទីក្រុង គែរប្រទេសអេហ្ស៊ីប។ ពួកអ្នកកាន់សាសនាអ៊ីស្លាម បានវាយប្រហារទៅលើវិហារ គ្រិស្តសាសនាអេហ្ស៊ីបមួយ ជាហេតុបណ្តាលឲ្យមានមនុស្សស្លាប់យ៉ាង តិច៩នាក់និងរបួសជនជាង ១០០នាក់ផ្សេងទៀត។ យោងតាមការអះអាងរបស់ពួកអ៊ីស្លាម -ការវាយប្រហាររបស់ពួកគេ គឺដើម្បី រំដោះ ស្រ្តីម្នាក់ដែលត្រូវបានគេឃុំឃាំង បន្ទាប់ពីនារីនេះ មានបំណងចង់ចូលមកកាន់សាសនាអ៊ីស្លាមវិញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០០
ភាពតានតឹង នៅតែគ្របដណ្តប់ជុំវិញ វិហារគ្រិស្តសាសនា Mar Mina ជានិច្ច។ កងទ័ពអេហ្ស៊ីប នៅតែបន្តបាញ់ឡើងលើ និងប្រើគ្រាប់បោកចេញផ្សែងបង្ហូរទឹកភែ្នក ដើម្បីវាយបំបែក ពួកអ៊ីស្លាមជ្រុលនិយមឲ្យចាកចេញឆ្ងាយពី វិហារគ្រិស្តសាសនាអេហ្ស៊ីប។
មិនតែប៉ុណ្ណោះ ក្រសួងការពារជាតិអេហ្ស៊ីប បានបញ្ជូនកងទ័ពជើងគោកមួយអង្គភាព អមដោយរថក្រោះជាច្រើនគ្រឿងផង ក៏ព្រមទាំងប៉េអិមទៀតផង ដើម្បីធ្វើប្រតិបត្តិការកំចាត់ការវាយលុករបស់ពួកអ៊ីស្លាមជ្រុលនិយមទៅលើវិហារគ្រិស្តសាសនាអេហ្ស៊ីប។
យោងតាមសាក្សី អន្តរាគមន៍ដ៏យឺតពេលរបស់យោធាអេហ្ស៊ីបនេះ បានធ្វើ ឲ្យមានអំពើហិង្សាកាន់តែខ្លាំងឡើង។ ឧបករណ៍សំរាប់វាយប្រហារមានដូចជា ពូថៅ កាំបិត ដំបងធំ គ្រឿងដុតបញ្ឆេះ(Cocktail Molotov) និង កាំភ្លើងទៀតផង ត្រូវបានប្រើប្រាស់ដោយពួកអ៊ីស្លាមឈ្លានពាននិងពួកអ្នកការពារវិហារ ជាច្រើនពាន់នាក់។ អគារមួយរបស់វិហារគ្រិស្តសាសនាបានឆេះទ្រលោម ក៏ព្រមទាំង ហាងលក់ទំនិញនិង លំនៅឋានជាច្រើនខ្នងរបស់សហគមន៍គ្រិស្តសាសនា។
ដោយឡែក វិហារគ្រិស្តសាសនាកាតូលិកមួយដែលស្ថិតនៅក្នុងសង្កាត់ដូចគ្នានេះ ក៏បានទទួលរងការវាយប្រហារដោយគ្រឿងដុតបញ្ឆេះដែរ។ ឧប្បត្តិហេតុហិង្សានេះ បានចាប់ផ្ទុះឡើងដោយហេតុតែពាក្យចចាមអារ៉ាមមួយ បានលេចឮថា វិហារគ្រិស្តសាសនាអេហ្ស៊ីបនៅក្រុង Imbaba ដែលស្ថិតនៅជិតទីក្រុងគែរនេះ បានចាប់ឃុំឃាំងស្រ្តីកាន់គ្រិស្តសាសនាមួយរូបតាំងពី៧ខែមកហើយ ដោយហេតុតែស្រ្តីរូបនេះមានបំណងចង់ប្តូរមកកាន់សាសនាអ៊ីស្លាមវិញ។
ពាក្យចចាមអារ៉ាមនេះ បានលេចឮសុសសាយខ្លាំងឡើងៗ តាមរយៈការផ្សព្វផ្សាយតាម មីក្រូរបស់វិហារអ៊ីស្លាមជាច្រើន ដែលស្ថិតនៅក្នុងសង្កាត់ប៉ែកខាងលិចទីក្រុងគែរ- សង្កាត់ដែល មានសំណង់អនាធិបតេយ្យដ៏ច្រើន និងដែលត្រូវគេប្រសិទ្ធនាមឲ្យថា « សាធារណរដ្ឋអ៊ីស្លាម » Imbaba៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ