ស៊ីមបាវ៉េ ៖ បាតុកម្មទ្រង់ទ្រាយធំមិនធ្លាប់មាន ស្រែកបណ្តេញលោក ម៉ូហ្កាបេ ពីតំណែង
សម្រែកទាមទារឱ្យលោកមូហ្កាបេ ប្រធានាធិបតីស៊ីមបាវ៉េ តាំងពីឆ្នាំ១៩៨០ ចុះចេញពីតំណែងមានកាន់តែខ្លាំងឡើងៗ។ នៅថ្ងៃសៅរ៍នេះ ជាសម្រែកពលរដ្ឋ ! បាតុកររាប់សិបពាន់នាក់បាននាំគ្នាចុះថ្នល់ ដង្ហែក្បួន អមដោយកងកម្លាំងយោធា សំដៅវិមានប្រធានាធិបតី។ ជាការប្រមូលផ្តុំដ៏ច្រើនសន្ធឹកសន្ធាប់ និងសឹងពុំធ្លាប់មានពីមុនមកទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០១
បន្ទាប់ស្ថិតក្នុងស្ថានភាពស្រពិចស្រពិលអស់មួយសប្តាហ៍ ពេញមួយថ្ងៃសៅរ៍ទី ១៨វិច្ឆិកា ការប្រមូលផ្តុំធ្វើបាតុកម្មមួយបានរៀបចំឡើង នៅកណ្តាលរដ្ឋធានីហារ៉ារ៉េ Harare ដើម្បីទាមទារឱ្យប្រធានាធិបតីចំណាស់ ៩៣ឆ្នាំ កាន់អំណាចតាំងពី៣៧ឆ្នាំ លោក ម៉ូហ្កាបេ ចាកចេញពីតំណែង។
បាតុកម្មចាប់ផ្តើមតាំងពីព្រលឹម ដោយសន្តិវិធី ដល់រសៀលក្រុមយោធា ប្រដាប់ដោយអាវុធធុនធ្ងន់ផង បានមកបញ្ឈប់ និងឃុំគ្រងរបស់ហ្វូងបាតុករ ដែលកំពុងធ្វើដំណើរឆ្ពោះទៅវិមានប្រធានាធិបតី ឱ្យបន្តធ្វើសកម្មភាព តវ៉ា ដោយស្ងប់ស្ងាត់ អង្គុយត្រៀមត្រា មុខវិមានប្រធានាធិបតីប្រមាណជា ២០០ម៉ែត្រ។
នេះជាការរៀបចំរបស់ក្រុមអតីតយុទ្ធជន ដែលជាមានតួនាទីសំខាន់ក្នុងនយោបាយស៊ីមបាវ៉េ និងសង្គមស៊ីវិលដែលជាក៏តំណាងចរន្តប្រឆាំងលោកមូហ្កាបេដ៏សំខាន់។ ដូច្នេះវត្តមានរបស់យោធាថ្ងៃនេះ មិនមែនមកបង្ក្រាបបាតុករឡើយ ! យោធាដែលបានគ្រប់គ្រងប្រទេសមួយសប្តាហ៍កន្លងមកនេះ បានទទួលការគាំទ្រជាផ្លូវការពី ប្រជាពលរដ្ឋស៊ីមបាវ៉េ។
កម្មវត្ថុចំបងបំផុតនៃការប្រមូលផ្តុំគ្នា បានបង្ហាញយ៉ាងច្បាស់ថា គ្មានថ្ងៃដែលពលរដ្ឋស៊ីមបាវ៉េ បកក្រោយទេ ! ពួកចង់សម្រេចជោគវាសនាអនាគតប្រទេស ដោយខ្លួនឯង និងដោយចង់ឃើញលោកម៉ូហ្កាបេ ចាកចេញពីតំណែង។
សូមបញ្ជាក់ថា កាលពីយប់ថ្ងៃអង្គារឆ្លងចូលថ្ងៃពុធ យោធាស៊ីមបាវ៉េ បានចេញធ្វើអន្តរាគមន៍ ក្នុងទម្រង់ដូចធ្វើរដ្ឋប្រហារ ដើម្បីការពារអនុប្រធានាធិបតីដែលលោកម៉ូហ្កាបេ បានដកចេញពីតំណែងកាលពីសប្តាហ៍មុន ហើយបានចាប់លោកប្រធានាធិបតីឃុំនៅក្នុងគេហដ្ឋាន។
នៅថ្ងៃសុក្រទី ១៧វិច្ឆិកា លោក ម៉ូហ្កាបេ បានបង្ហាញខ្លួនជាសាធារណៈក្នុងពិធីប្រគល់សញ្ញាប័ត្រដល់និស្សិតនៅមហាវិទ្យាល័យហារ៉ារ៉េ តែមិនធ្វើសុន្ទរកថាអ្វីទេ និងដោយអង្គុយងោកដូចទម្លាប់ជាញឹកញយ។
ពេលនេះការចរចាមិនទៅមុខមែន លោក មូហ្កាបេ នៅតែតោងអំណាចជាប់ ប៉ុន្តែខាងយោធាបានព្រលយថាមានភាពប្រសើរច្រើន ដោយអាចបោសសម្អាតក្រុមជំនិតប្រធានាធិបតី ហើយក៏មានអ្នកចាប់ដោះដៃពីលោកម៉ូហ្កាបេបណ្តើរៗដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ