ទ្វីបអាហ្រ្វិកបោះជំហានឆ្ពោះទៅបង្កើតសហគមន៍សេដ្ឋកិច្ចនៅក្នុងតំបន់
នៅថ្ងៃអាទិត្យ ទី៧ មិថុនា មន្រ្តីជាន់ខ្ពស់មកពី ២៦ប្រទេសអាហ្រ្វិកនៅតំបន់ប៉ែកខាងត្បូង និងខាងកើតបានបើកកិច្ចប្រជុំក្នុងទីក្រុងឆាកមែលឆែក (Charm El-Cheikh) ប្រទេសអេហ្ស៊ីប។ កម្មវត្ថុនៃកិច្ចប្រជុំ គឺដើម្បីត្រៀមរៀបចំជំនួបកំពូលថ្នាក់ប្រមុខរដ្ឋ និងប្រមុខរដ្ឋាភិបាលនៅថ្ងៃពុធ ទី១០ មិថុនាខាងមុខដើម្បីចុះហត្ថលេខាលើកិច្ចព្រមព្រៀងដោះដូរដោយសេរី មុននឹងឈានទៅបង្កើតទីផ្សាររួមនៅក្នុងតំបន់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៥
កិច្ចប្រជុំថ្នាក់មន្រ្តីជាន់ខ្ពស់មកពី ២៦ប្រទេសអាហ្រ្វិកក្នុងទីក្រុងឆាកមែលឆែក (Charm El-Cheikh) ប្រទេសអេហ្ស៊ីប គឺជាសក្ខីកម្មមួយដែលបញ្ជាក់ពីលទ្ធផលទទួលបានពីកិច្ចចរចាយ៉ាងតានតឹងអស់រយៈពេល ៥ឆ្នំាកន្លងទៅ។ ហើយគឺនៅក្នុងទីក្រុងឆាកមែលឆែក (Charm El-Cheikh) ប្រទេសអេហ្ស៊ីបដដែលនេះឯងដែលនៅថ្ងៃពុធ ទី១០ មិថុនាខាងមុខ ប្រមុខរដ្ឋ និងប្រមុខរដ្ឋាភិបាលទំាង ២៦ប្រទេសអាហ្រ្វិកក្នុងចំណោមប្រទេសអាហ្រ្វិកទំាង ៥៤ ក្នុងតំបន់ត្រូវចុះហត្ថលេខាលើកិច្ចព្រមព្រៀងដោះដូរដោយសេរីរវាងគ្នា មុននឹងឈានទៅបង្កើតទីផ្សាររួមមួយរវាងរដ្ឋអាហ្រ្វិកប៉ែកខាងត្បូង និងរដ្ឋអាហ្រ្វិកប៉ែកខាងកើត។ គឺជាទីផ្សាររួមមួយដែលមានប្រជាជនសរុបជាង ៦២៥លាននាក់ និងមានផលិតសរុបក្នុងស្រុកជាង ១ ០០០ ០០០លានដុល្លារ។
អ្វីជាការកត់សម្គាល់ អនាគតសហគមន៍សេដ្ឋកិច្ចរវាង ២៦ប្រទេសអាហ្រ្វិកក្នុងតំបន់មានបញ្ចូលដោយប្រទេសអាហ្រ្វិកចំនួនពីរដែលមានការអភិវឌ្ឍន៍ខ្លំាងជាងគេ គឺអេហ្ស៊ីប និងអាហ្រ្វិកខាងត្បូង និងបណ្តាប្រទេសមានសក្តានុពល ដូចយ៉ាងអេត្យូពី និងកេនយ៉ា។ តែមិនមានវត្តមានប្រទេសអ្នកមាន ដូចយ៉ាងនីហ្សេរីយ៉ាទេ។ កម្មវត្ថុរបស់ក្រុមប្រទេសហត្ថលេខីលើកិច្ចព្រមព្រៀងដោះដូរដោយសេរី គឺចង់សម្រួលការដោះដូរពាណិជ្ជកម្មរវាងប្រទេសសមាជិកផង និងចង់ក្លាយជាតួអង្គមានទម្ងន់ក្នុងតំបន់ដើម្បីជជែកជាមួយស្ថាប័នសេដ្ឋកិច្ចផ្សេង ដូចយ៉ាងជាមួយសហភាពសេដ្ឋកិច្ចអឺរ៉ុបជាដើម។
គួរជម្រាបជូនថាមកដល់ពេលនេះ មានប្រទេសអាហ្រ្វិកតិចតួចណាស់ ពោលមានប្រមាណតែ ១២% ប៉ុណ្ណោះដែលបានរកស៊ីដោះដូរពាណិជ្ជកម្មរវាងប្រទេសអាហ្រ្វិកគ្នាឯង គឺមិនដូចប្រទេសអាស៊ីដែលមានជាង ៥០% បានរកស៊ីដោះដូរពាណិ្ជកម្មរវាងគ្នា និងជាង ៧០% សម្រាប់ប្រទេសអឺរ៉ុប។ ភាពយឺតយ៉ាវរវាងប្រទេសអាហ្រ្វិកគ្នាឯង គឺភាពសំាញំាច្បាប់ពន្ធគយ និងពេលវេលានៅតាមព្រំដែន ព្រមទំាងតម្លៃពន្ធលើទំនិញនំាចេញ នំាចូល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ