ប៊ូរុនឌី៖ឧត្តមសេនីយម្នាក់ត្រូវបានជនមិនស្គាល់មុខបាញ់សម្លាប់
នៅក្នុងប្រទេសប៊ូរុនឌី លោកឧត្តមសេនីយ Jean Bikomagu អតីតអគ្គមេបញ្ជាការកងទ័ពត្រូវបានជនមិនស្គាល់មុខបាញ់សម្លាប់នៅកណ្តាលទីក្រុងប៊ូយុំាប៊ូរ៉ានាថ្ងៃសៅរ៍ ទី១៥ សីហា។ មានប្រភពដើមជាជាតិពិន្ធុទូតស៊ី ឧត្តមសេនីយ Bikomagu ជាមេទ័ពនៅក្នុងសម័យ សង្រ្គាមស៊ីវិលប្រឆំាងនឹងចលនាឧទ្ទាមនៃកម្លំាងការពារលទ្ធិប្រជាធិបតេយ្យដែលកំពុងកាន់អំណាចនាពេលបច្ចុប្បន្ន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៥
យោងតាមសាក្សីមួយចំនួនឲ្យដឹងថា លោកឧត្តមសេនីយចូលនិវត្តន៍ Jean Bikomagu ត្រូវបានជនមិនស្គាល់មុខមួយក្រុមបាញ់រះទៅលើឡានដែលលោកកំពុងជិះជាមួយកូនស្រីម្នាក់ និងដែលឡានរបស់គាត់ទើបឈប់ចតនៅពីមុខខ្លោងទ្វារផ្ទះ។ ឧត្តមសេនីយ Jean Bikomagu បានស្លាប់ភ្លាមនៅនឹងកន្លែង ចំណែកកូនស្រីរបស់គាត់ត្រូវបានក្រុមគ្រួសារបញ្ជាក់ថា រងរបួសធ្ងន់។ ក្រោយការបាញ់ប្រហារភ្លាម ក្រុមឃាតករក៏បានរត់ភៀសខ្លួនបាត់អស់។
គួររម្លឹកជូនថា ឧត្តមសេនីយ Jean Bikomagu ជានិមិត្តរូបតំណាងឲ្យអតីតកងទ័ពប៊ូរុនឌីដែលភាគតិចមានប្រភពពីជាតិពិន្ធុទូតស៊ី និងដែលរូបឧត្តមសេនីយផ្ទាល់ក៏មានជាតិពិន្ធុទូតស៊ីដែរ។ គឺលោកឧត្តមសេនីយ Jean Bikomagu រូបនេះឯងដែលបានដឹកនំាកងទ័ពធ្វើសង្រ្គាមប្រឆំាងនឹងចលនាឧទ្ទាមជាតិពិន្ធុហ៊ូទូនៃកម្លំាងការពារប្រជាធិបតេយ្យពីឆ្នំា ១៩៩៣ ដល់ឆ្នំា ២០០៦។ សង្រ្គាមដែលកាលណោះបានបណ្តាលឲ្យមានមនុស្សស្លាប់ជិត ៣០០ ០០០នាក់។
បច្ចុប្បន្ននេះ គឺអតីតចលនាឧទ្ទាមនៃកម្លំាងការពារប្រជាធិបតេយ្យដែលកំពុងកាន់អំណាចនៅប៊ូរុនឌី ហើយមេបញ្ជាការកងទ័ពសព្វថ្ងៃមានឈ្មោះ Adolphe Nshimirimana ដែលជាមនុស្សជំនិតនឹងរូបប្រធានាធិបតី។ តែកាលពី ២សប្តាហ៍មុននេះ រូបមេបញ្ជាការ Adolphe ក៏ត្រូវបានគេធ្វើឃាតសម្លាប់ចោលដែរ។ ដោយឡែក នៅមុនឃាតកម្មសម្លាប់ឧត្តមសេនីយ Adolphe ក៏មានការប៉ុនប៉ុងសម្លាប់សកម្មជនសិទ្ធិមនុស្សដ៏ល្បីម្នាក់ គឺលោក Pierre Claver Mbonimpa។ លោក Mbonimpa ដែលគេស្គាល់ថា បានធ្វើការរិះគន់ឧត្តមសេនីយ Adolphe ជាសាធារណៈពីបទបានសម្លាប់សកម្មជនប្រឆំាងជាច្រើននាក់។ បន្ទាប់ពីត្រូវរបួស លោក Mbonimpa បានចាកចេញពីប្រទេសទៅជ្រកកោណក្នុងប្រទេសបែលហ្ស៊ិក។
រូបភាពទំាងអស់នេះបានស បញ្ជាក់ឲ្យឃើញពីការផ្ទុះចេញនូវវប្បធម៌សងសឹកដែលនឹងធ្វើឲ្យប៊ូរុនឌីធ្លាក់ទៅក្នុងវិបត្តិនយោបាយយ៉ាងជ្រៅ។ វិបត្តិនយោបាយដែលលោកប្រធានាធិបតី Pierre Nkurunziza ហាក់ដូចជាគ្មានសមត្ថភាពដោះស្រាយ តែបានព្យាយាមតោងអំណាចសម្រាប់អាណត្តិទី៣ ទោះបីជាមានការប្រឆំាងជំទាស់ពីបក្សប្រឆំាង ពីសង្គមស៊ីវិល និងពីសហគមន៍អន្តរជាតិក៏ដោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ