ប៉ុនប៉ងធ្វើរដ្ឋប្រហារយោធានៅប៊ូរុនឌី៖ស្ថានការណ៍កំពុងបន្តច្របូកច្របល់ និងស្រពិចស្រពិល
នៅក្នុងប្រទេសប៊ូរុនឌី បន្ទាប់ពីមានព័ត៌មានលេចឮជុំវិញការប៉ុនប៉ងធ្វើរដ្ឋប្រហារយោធាទម្លាក់លោកប្រធានាធិបតី Pierre Nkurunziza កាលពីរសៀលថ្ងៃពុធ ទី១៣ ឧសភាមក គេពិបាកនឹងស្វែងយល់ឲ្យបានច្បាស់ពីស្ថានការណ៍ដែលកំពុងកើតមានពេលនេះ។ អ្វីដែលគេដឹង គឺមានការផ្ទុះអាវុធយ៉ាងទ្រហឹងអឺងកងនៅក្នុងទីក្រុងប៊ូយុំាប៊ូរ៉ា ចំណែករូបលោកប្រធានាធិបតី Nkurunziza ដែលបានចេញទៅចូលរួមជំនួបកំពូលក្នុងតំបន់នៅប្រទេសតង់សានីស្តីពីវិបត្តិក្នុងប្រទេសលោកក៏នៅមិនអាចវិលចូលស្រុកវិញបានដែរនៅថ្ងៃនេះ។ តើដំណើរដើមទងនៃវិបត្តិនយោបាយក្នុងប្រទេសប៊ូរុនឌីបានកើតឡើងយ៉ាងដូចម្តេច?
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៤
រហូតមកដល់ពេលនេះ ស្ថានការណ៍នៅក្នុងប្រទេសប៊ូរុនឌីកំពុងបន្តច្របូលច្របល់ និងស្រពិចស្រពិលខ្លំាង។ ច្របូកច្របល់ និងស្រពិចស្រពិល ក្រោយពីមានព័ត៌មានផ្ទុយគ្នាជុំវិញការប៉ុនប៉ុងធ្វើរដ្ឋប្រហារយោធាទម្លាក់លោកប្រធានាធិបតី Pierre Nkurunziza ចេញពីអំណាចក្នុងពេលដែលលោក Nkurunziza បានអវត្តមានពីប្រទេស។ អ្វីៗបានចាប់ផ្តើមនៅរសៀលថ្ងៃពុធ ទី១៣ ឧសភាម្សិលមិញ ដោយលោកឧត្តមនីយ Godefroid Niyombaré អតីតនាយសេនាធិការបានប្រកាសតាមវិទ្យុពីការធ្វើរដ្ឋប្រហារយោធាទម្លាក់លោកប្រធានាធិបតី Nkurunziza និងបានប្រកាសឲ្យដឹងពីការគ្រប់គ្រងស្ថានការណ៍ទំាងស្រុង។ តែស្របពេលគ្នានោះ លោកនាយសេនាធិការបច្ចុប្បន្នក៏បានចេញមុខប្រកាសតាមវិទ្យុពីការធ្វើរដ្ឋប្រហារមិនបានសម្រេចរបស់លោកអតីតនាយសេនាធិការ។
នៅម៉ោងនេះ ស្ថានការណ៍ទូទៅនៅក្នុងទីក្រុងប៊ូយុំាប៊ូរ៉ាកំពុងតានតឹងខ្លំាងដោយមានការផ្ទុះអាវុធដាក់គ្នាយ៉ាងហិង្សារវាងកម្លំាងរដ្ឋាភិបាល និងកម្លំាងរបស់អតីតនាយសេនាធិការដែលប៉ុនប៉ងធ្វើរដ្ឋប្រហារ។ មួយវិញទៀត ក៏គេមិនដឹងច្បាស់ថា តើអំណាចកំពុងស្ថិតក្នុងដៃអ្នកណាពិតប្រាកដទេ។ លោកនាយសេនាធិការបច្ចុប្បន្នបានប្រកាសថា កងទ័ពរដ្ឋាភិបាលកំពុងកាន់កាប់ស្ថានការណ៍បានមួយភាគធំ ពិសេសតំបន់យុទ្ធសាស្រ្តជាច្រើនកន្លែងក្នុងទីក្រុង ព្រមទំាងប្រកាសជាថ្មីពីបរាជ័យនៃការប៉ុនប៉ងធ្វើរដ្ឋប្រហាររបស់អតីតនាយសេនាធិការ Niyombaré ។ លោក Niyombaré ដែលបានឆ្លៀតធ្វើរដ្ឋប្រហារក្នុងពេលអវត្តមានលោកប្រធានាធិបតី Nkurunziza ដែលចេញទៅចូលរួមជំនួបកំពូលតំបន់ក្នុងប្រទេសតង់សានីដើម្បីនិយាយពីវិបត្តិនយោបាយរបស់ប្រទេសប៊ូរុនឌីនោះឯង។
គួររម្លឹកជូនថា វិបត្តិនយោបាយនៅប៊ូរុនឌីបានផ្ទុះឡើងដំបូងនៅក្នុងខែមេសា បន្ទាប់ពីគណបក្សរបស់លោកប្រធានាធិបតី Nkurunziza បានសម្រេចឲ្យលោកឈរឈ្មោះជាបេក្ខជនប្រធានាធិបតីសម្រាប់អាណត្តិទី៣។ តំាងពីពេលនោះមក កម្លំាងប្រឆំាងក៏បានរៀបចំក្បួនបាតុកម្មជាហូរហែប្រឆំាងនឹងបេក្ខជនរបស់លោក Nkurunziza សម្រាប់អាណត្តិទី៣។ ពីមួយថ្ងៃទៅមួយថ្ងៃ ក្បួនបាតុកម្មកាន់តែរីកធំទៅៗរហូតដល់មានការប៉ុនប៉ងធ្វើរដ្ឋប្រហារពីអតីតនាយសេនាធិការរបស់លោក Nkurunziza និងដែលបានជម្រុញប្រទេសប៊ូរុនឌីឲ្យធ្លាក់ក្នុងភាពវឹកវរពេលនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ