Ticad៖ ជប៉ុនសង្ឃឹមវិនិយោគនៅអាហ្វ្រិក ប្រកបដោយ“គុណភាព” ខុសពីចិន
ចុះផ្សាយនៅថ្ងៃ៖
ស្តាប់ - ០៧:៤០
ចាប់ពីថ្ងៃពុធទី២៨សីហា នៅទីក្រុងយ៉ូកូហាម៉ា ប្រទេសជប៉ុន មានការរៀបចំវេទិកាសន្និសីទអន្តរជាតិដើម្បីការអភិវឌ្ឍន៍នៅទ្វីបអាហ្វ្រិកលើកទី៧ ក្រោមការផ្តួចផ្តើមរបស់រដ្ឋាភិបាលជប៉ុន អង្គការសហប្រជាជាតិ សហព័ន្ធអាហ្វ្រិក និងធនាគារអភិវឌ្ឍន៍អាស៊ី។ សន្និសីទរយៈពេល៣ថ្ងៃនេះ មានការចូលរួម ពីតំណាងរដ្ឋាភិបាល តំណាងវិស័យឯកជនប្រទេសអាហ្វ្រិក ព្រមទាំងតំណាងក្រុមហ៊ុននិងអ្នកវិនិយោគជប៉ុនជាច្រើន ដើម្បីជជែកពិភាក្សាគ្នា លើគម្រោងវិនិយោគ និងគម្រោងអភិវឌ្ឍន៍នានា នៅទ្វីបអាហ្វ្រិក។ វេទិកានេះ ក៏ជាឱកាសសម្រាប់ជប៉ុនផងដែរ ក្នុងការរំលេចវត្តមានរបស់ខ្លួន នៅលើទ្វីបអាហ្វ្រិក ខណៈដែលបច្ចុប្បន្ននេះ កម្ចីអភិវឌ្ឍន៍ ឬគម្រោងរបស់ចិន តម្លៃរាប់ពាន់លានដុល្លារ បានសម្រុកចូលយ៉ាងខ្លាំង នៅតាមប្រទេសអាហ្រ្វិក។
សន្និសីទអន្តរជាតិដើម្បីការអភិវឌ្ឍន៍ទ្វីបអាហ្វ្រិក ហៅកាត់ថា Ticad លើកទី៧នេះ គឺធ្វើឡើងក្រោមប្រធានបទ “ពន្លឿនការអភិវឌ្ឍន៍នៅទ្វីបអាហ្វ្រិក តាមរយៈធនធានមនុស្ស បច្ចេកវិទ្យាទំនើប និងគំនិតបង្កើតថ្មី”។ បើពិនិត្យលើពាក្យក្នុងប្រធានបទផ្លូវការនេះ គឺយើងអាចដឹងថា ជប៉ុនក្នុងនាមជាម្ចាស់សន្និសីទនេះ មានចេតនា យកវេទិកានេះ ជាការផ្ញើរសារទៅកាន់ទ្វីបអាហ្វ្រិក ស្តីពីកម្មវត្ថុនៃវត្តមានរបស់ជប៉ុន នៅទ្វីបអាហ្វ្រិក ដែលផ្តោតសំខាន់ ទៅលើការអភិវឌ្ឍន៍ បណ្តុះបណ្តាលធនធានមនុស្ស ការផ្ទេរចំណេះដឹងនឹងបច្ចេកវិទ្យា ព្រមទាំងការជួយជម្រុញ លើកទឹកចិត្ត នូវគំនិតបង្កើតថ្មីផ្សេងៗ នៅតាមប្រទេសអាហ្វ្រិក។
លោកស៊ិនហ្សូ អាបូ ក្រើនរំលឹកប្រទេសអាហ្វ្រិក អំពីបំណុលសន្ធិកសន្ធាប់របស់ចិន
នៅក្នុងសន្ទរកថា បើកទ្វារសន្និសីទនេះកាលពីថ្ងៃទី២៨សីហា លោកស៊ិនហ្សូ អាបេ នាយករដ្ឋមន្ត្រីជប៉ុន បានថ្លែងថា៖ វាពិតជាមានការបន្ទាន់ណាស់ ដែលត្រូវតែវិនិយោគនៅអាហ្វ្រិក ហើយជាការវិនិយោគដែលមានគុណភាព។ លោកបន្ថែមថា៖ ប្រទេសអាហ្វ្រិកមួយចំនួនធំ មានកម្រិតបំណុលសាធារណៈធ្ងន់ធ្ងរណាស់ ដែលបញ្ហានេះ គឺជាឧបសគ្គដល់ការវិនិយោគពីបរទេស។ សម្តីនេះ ទោះបីជាលោក នាយករដ្ឋមន្ត្រីជប៉ុនមិនថាឲ្យចំ ក៏យើងអាចដឹងដែរ ថាលោកសំដៅទៅដល់ចិន ដែលបានជះប្រាក់រាប់សិបពាន់លានដុល្លារ ទៅឲ្យប្រទេសនៅអាហ្វ្រិកខ្ចី។
ក្នុងន័យនេះ ជប៉ុនមានបំណងបង្ហាញឲ្យឃើញថា ខ្លួនខុសពីចិន ដែលមានតែប្រាក់យកទៅជះឲ្យខ្ចី ដើម្បីធ្វើនេះធ្វើនោះ។ តែផ្ទុយទៅវិញគឺក្រុមហ៊ុនចិនទេ ដែលជាអ្នកចំណេញ ហើយថែមទាំងប្រើប្រាស់បុគ្គលិកជនជាតិចិន និងផលិតផលចិនទៀតផង។ រីឯប្រទេសអាហ្វ្រិកវិញ ទីបំផុត ត្រូវជាប់បំណុលចិនវ័នក សងមិនរួច។ លោក ស៊ិនហ្សូ អាបេ បានសង្កត់ធ្ងន់បន្ថែមថា រដ្ឋាភិបាលជប៉ុន និងជម្រុញឲ្យមានការវិនិយោគ ទាំងវិស័យសាធារណៈ ទាំងវិស័យឯកជននៅអាហ្វ្រិក ដែលជាការវិនិយោគប្រកបដោយគុណភាព និងមានការតាមដានច្បាស់លាស់យូរអង្វែង មិនមែនជាការវិនិយោគសម្លឹងតែផលចំណេញ រយៈពេលខ្លីនោះទេ។
គម្រោងវិនិយោគរបស់ជប៉ុនមាន “គុណភាព” ជាងរបស់ចិន
បើនិយាយពីតួលេខទឹកលុយ គម្រោងវិនិយោគរបស់ជប៉ុននៅអាហ្វ្រិក មានតិចជាងចិនដល់ទៅពាក់កណ្តាល។ កាលពីឆ្នាំ២០១៨ នៅក្នុងវេទិកាកំពូលចិន-អាហ្វ្រិក ចិនបានសន្យាវិនិយោគ ដល់ទៅ៦ម៉ឺនលានដុល្លារ។ គម្រោងរបស់ចិន ភាគច្រើនគឺធ្វើក្រោមរូបភាពជាកម្ចីអភិវឌ្ឍន៍ជាមួយនឹងការប្រាក់ទាប។ តែជាទូទៅ ជាការសាងសង់ហេដ្ឋារចនាសម្ព័ន្ធ ដែលប្រើប្រាស់ផលិតផលចិន បុគ្គលិកចិន ហើយអាចគ្មានការតាមដានគុណភាពត្រឹមត្រូវ ឬក៏មិនឆ្លើយតបទៅនឹងតម្រូវការជាក់ស្តែងផង ក៏មាន។
សម្រាប់ជប៉ុនវិញ គេមិនប្រកួតប្រជែងបែបនេះទេ តែគេប្រកួតប្រជែងលើគុណភាព នៃគម្រោងនីមួយៗ។ វត្តមានរបស់ជប៉ុន ចាប់ផ្តើមមានច្រើននៅតាមប្រទេសដូចជាកេនយ៉ា អេហ្ស៊ីប ហ្កាណា និងនីហ្សេរីយ៉ាជាដើម។ ពីដើមមក ជប៉ុនវិនិយោគច្រើន តែក្នុងវិស័យសាធារណៈ ដើម្បីលើកកំពស់គុណភាពនៃសេវាសាធារណៈ ដូចជា ការរៀបចំពង្រាយបណ្តាញចរន្តអគ្គីសនី ការអភិវឌ្ឍន៍សេវាកម្មសុខាភិបាលរដ្ឋ ព្រមទាំងការវិនិយោគលើហេដ្ឋារចនាសម្ព័ន្ធ ដឹកជញ្ជូនរួមសាធារណៈ។ យ៉ាងណាមិញ ក្នុងសន្និសីទលើកនេះ ជប៉ុនមានគម្រោងផ្តល់វិនិយោគចំនួន ៤ពាន់លានដុល្លារ ក្នុងវិស័យថាមពលអគ្គីសនី នៅអេហ្ស៊ីប នៅកេនយ៉ា និងជីប៊ូទី។
ក្រៅពីការវិនិយោគ ដែលលើកកំពស់សមត្ថភាពសេវាសាធារណៈ ជប៉ុនមានបំណងលើកចេញជាគម្រោងផ្សេងៗ ដែលជំរុញការអភិវឌ្ឍន៍សមត្ថភាពធនធានមនុស្ស តាមរយៈការបណ្តុះបណ្តាល។ ជាក់ស្តែង ក្នុងរវាង៣ឆ្នាំទៅមុខទៀតនេះ ជប៉ុននឹងបណ្តុះបណ្តាលអ្នកជំនាញនៅតាមប្រទេសអាហ្វ្រិកប្រហែលជា៣០ប្រទេស ឲ្យមានជំនាញគ្រប់គ្រងហានិភ័យ ផ្នែកហិរញ្ញវត្ថុសាធារណៈ និងបំណុលរដ្ឋ។
បន្ថែមពីនេះ គឺនៅមានសមត្ថភាពធនធានមនុស្ស និងបច្ចេកវិទ្យា នៅក្នុងវិស័យឯកជនទៀត។ លោក Amadou Hott រដ្ឋមន្ត្រីក្រសួងសេដ្ឋកិច្ច ប្រទេសសេណេហ្កាល់ ដែលមានវត្តមាននៅក្នុងសន្និសីទនោះ បានលើកឡើងថា ជប៉ុនអាចជួយបណ្តុះបណ្តាលយុវជនអាហ្វ្រិក ហើយជួយនាំមកនូវចំណេះដឹងបច្ចេកទេស បច្ចេកវិទ្យា និងគំនិតបង្កើតថ្មី នៅក្នុងវិស័យឯកជន។ ដូចគ្នាដែរ រដ្ឋមន្ត្រីក្រសួងសេដ្ឋកិច្ចប្រទេសបេណាំង បានផ្តោតការសង្ឃឹមច្រើន លើគម្រោងវិនិយោគក្នុងវិស័យឯកជនជាមួយជប៉ុន។ លោកថា ជប៉ុននឹងជួយឲ្យប្រទេសវិស័យឯកជនរបស់ប្រទេសលោក អាចមានលទ្ធភាពផលិតនិងកែឆ្នៃវត្ថុធាតុដើមនៅនឹងកន្លែងផ្ទាល់ ដោយឈប់លក់ចេញនូវវត្ថុធាតុដើមទាំងដុល ទៅឲ្យបរទេស។
ប្រទេសអាហ្វ្រិកខ្លះ លែងទុកចិត្តចិន
ជាទូទៅ ជប៉ុនមិនសូវជាចូលចិត្ត ប្រមូលក្តោបក្តាប់គំរោងធំៗមហិមា ដូចចិនទេ។ ជប៉ុនមានគំនិតសម្លឹងផលចំណេញតិចតួច ស្ងាត់ស្ងៀម ហើយមានសមភាពជាមួយប្រទេសម្ចាស់ស្រុក។ គម្រោងវិនិយោគរបស់ជប៉ុន តែងតែ មានភ្ជាប់ជាមួយការបណ្តុះបណ្តាលបុគ្គលិក ដែលជាប្រជាជនម្ចាស់ស្រុក ហើយមានការតាមដានច្បាស់លាស់។
ផ្ទុយទៅវិញ គម្រោងរបស់ចិនភាគច្រើន មិនបានហុចផលវិជ្ជមានយូរអង្វែង ដល់សេដ្ឋកិច្ចប្រទេសម្ចាស់ផ្ទះទេ ហើយថែមទាំងបានបំផ្លាញធនធានធម្មជាតិ បរិស្ថានទៀតផង។ គេសង្កេតឃើញថា ប្រទេសអាហ្វ្រិកមួយចំនួន ចាប់ផ្តើមស្វែងយល់ពីហានិភ័យ និងផលអវិជ្ជមាននៃបំណុលយ៉ាងគំហុករបស់ចិន។ ជាក់ស្តែង ប្រទេសតង់ហ្សានី ទើបតែបានសម្រេចលប់ចោល នូវគម្រោងវិនិយោគរបស់ចិន ក្នុងតម្លៃ១ម៉ឺនលានដុល្លារ នៅក្នុងការជួសជុល និងសាងសង់កំពង់ផែសមុទ្រនៅBayamago។
លោកស្រី Akiko Suwa-Eisenmann អ្នកស្រាវជ្រាវនៅវិទ្យាស្ថានជាតិស្រាវជ្រាវសេដ្ឋកិច្ចកសិកម្ម បានលើកឡើងថា កម្ចីរបស់ចិនមានការប្រាក់តិចនៅលើក្រដាសមែន តែធាតុពិតទៅថ្ងៃក្រោយ ប្រទេសជាប់បំណុលនិងវ័នក។ ឧទាហរណ៍ប្រទេសជីប៊ូទី ដែលបានខ្ចីលុយចិនយ៉ាងច្រើននៅឆ្នាំ២០១៥ ពេលនេះ មានបំណុលសាធារណៈសរុបដល់ទៅ៨៩% នៃទិន្នផលដុលក្នុងស្រុក។
បន្ថែមពីនេះទៀត វត្តមានរបស់ចិន នៅតាមប្រទេសអាហ្វ្រិកខ្លះ បានចាប់ផ្តើមបង្កឲ្យមានការតវ៉ា ដោយសារប្រជាជន ព្រមទាំងអ្នកដឹកនាំខ្លះ គេចាប់ផ្តើមលែងទុកចិត្តចិន។ ការចូលលុកលុយរបស់ចិន ត្រូវបានគេចាត់ទុក ប្រៀបបីដូចជាការចូលទៅកើបប្រមូលយកធនធានធម្មជាតិ ព្រៃឈើ រ៉ែមានតម្លៃជាដើម ដោយមិនខ្វល់ពីប្រជាជនម្ចាស់ស្រុកទេ។ ជាក់ស្តែងដូចជានៅប្រទេសហ្កាបុង និងកាំម៉េរូន ដែលព្រៃឈើមួយ និងរ៉ែ ចំនួនធំ ត្រូវបានក្រុមហ៊ុនចិនកាប់ ជីកប្រមូលនាំចេញ។
ដូច្នេះ ជាមួយនឹងគម្រោងវិនិយោគ ដែលមានគុណភាព និងមានការទទួលខុសត្រូវរបស់ជប៉ុន គឺជប៉ុនមានសង្ឃឹមច្រើន ថាប្រទេសអាហ្វ្រិក អាចងាកមករកខ្លួន ជាជាងទៅរកចិន។ ក្រុមហ៊ុនជប៉ុនរកស៊ីនៅអាហ្រ្វិក បានកើនឡើងគួរសម។ ឆ្នាំ២០១០ មាន២៥០ក្រុមហ៊ុន តែបច្ចុប្បន្ន មានដល់ទៅជិត៨០០ក្រុមហ៊ុន។
ជប៉ុនចង់ឲ្យប្រទេសអាហ្វ្រិកជួយខ្លួន ក្លាយជាសមាជិកអចិន្ត្រៃយ៍ នៃក្រុមប្រឹក្សាសន្តិសុខ
បើផ្អែកតាមការវិភាគ របស់លោកស្រី Akiko Suwa-Eisenmann ជប៉ុនចង់ជួយទ្វីបអាហ្វ្រិក ហើយជប៉ុនក៏ចង់ឲ្យប្រទេសអាហ្វ្រិកជួយខ្លួនវិញដែរ។ នោះគឺបំណងរបស់ជប៉ុន ដែលចង់ក្លាយជាសមាជិកអចិន្ត្រៃយ៍ នៃក្រុមប្រឹក្សាសន្តិសុខ របស់អង្គការសហប្រជាជាតិ។ បើបានមែន នោះមានន័យថា វាជាជោគជ័យការទូតដ៏ធំ របស់ជប៉ុន ក្នុងនាមជាមហាអំណាចប្រចាំអាស៊ី ស្មើភាពគ្នាជាមួយចិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ