ទស្សនកិច្ចប្រមុខរដ្ឋបារាំងនៅអាហ្វ្រិក៖ការប្រយុទ្ធប្រឆាំងនឹងភេរវកម្ម គឺជាសំណុំរឿងសំខាន់
ចុះផ្សាយនៅថ្ងៃ៖
ស្តាប់ - ០៧:៤៧
ប្រធានាធិបតីបារាំង លោកអេម៉ាណុយអែល ម៉ាក្រុងបានបិទបញ្ចប់ទស្សនកិច្ចចំនួន៣ថ្ងៃ ទៅកាន់តំបន់អាហ្វ្រិក។ ក្នុងដំណើរទស្សនកិច្ចទៅអាហ្វ្រិកលើកនេះ គឺគេសង្កេតឃើញថា ការប្រយុទ្ធប្រឆាំងនឹងភេរវកម្ម គឺជាសំណុំរឿងសំខាន់ជាង។ ក៏ប៉ុន្តែ ទាហានបារាំង មួយចំនួន ដែលឈរជើងនៅតំបន់សាហែល (Sahel)ត្រូវរងការប្រឈមនឹងការស្អប់ខ្ពើមប្រឆាំងបារាំង ដែលធ្លាប់តែជាម្ចាស់អាណានិគម ទៅលើប្រទេសជាច្រើននៅអាហ្វ្រិក។ ការវាយប្រយុទ្ធជាមួយក្រុមភេរវនិយម គឺជារឿងលំបាកខ្លាំងមួយទៅហើយ តែអារម្មណ៍ត្រូវគេរើសអើងក្នុងទឹកដីសមរភូមិដូច្នេះទៀត គឺជារឿងរឹងរឹតតែលំបាកខ្លាំងបន្ថែមទៀតចំពោះស្មារតីទាហានបារាំង។ ចំពោះបញ្ហានេះ ប្រធានាធិបតីបារាំងអេម៉ាណុយអែល ម៉ាក្រុង បានសម្រេចកោះអញ្ជើញប្រមុខរដ្ឋនិងប្រមុខរដ្ឋាភិបាលអាហ្វ្រិកទាំង៥ មកប្រទេសបារាំង នៅខែមករាខាងមុខនេះ ដើម្បីចាត់វិធានាថ្មី។
ដំណើរទស្សនកិច្ចបីថ្ងៃនៅអាហ្វ្រិករបស់ប្រមុខរដ្ឋបារាំង គឺ តើបានលទ្ធផលអ្វីខ្លះ គួរឱ្យកត់សម្គាល់?
លោក អេម៉ាណុយអែល ម៉ាក្រុង ទៅអាហ្វ្រិកលើកនេះ គឺបានផ្តល់ជំនួយដល់ប្រទេស កូឌីវ័រ សម្រាប់សាងសងមធ្យោបាយធ្វើដំណើរសាធារណៈ គឺ រថភ្លើងក្រោមដី។
លោក ម៉ាក្រុង ក៏បានប្រកាសលុបចោលរូបិយបណ្ណ France CFA ដោយដាក់ជំនួសមកវិញ រូបិយបណ្ណ លុយ ECO សម្រាប់ប្រើប្រាស់ក្នុងតំបន់នេះវិញ ដោយត្រូវគ្របគ្រងដោយ សហភាពសេដ្ឋកិច្ចនិងរូបិយវត្ថុតំបន់អាហ្វ្រិក។ ការប្រកាសរបស់លោកប្រធានាធិបតីបារាំងនេះ គឺត្រូវបានទទួលការសារទពីអង្គការរូបិយវត្ថុអន្តរជាតិ FMI និងពីអ្នកជំនាញសេច្ឋកិច្ច។ ពួកគេយល់ថាថា ការលុបចោលFrance CFA នេះគឺនឹងធ្វើឱ្យប្រទេសក្នុងតំបន់កាន់តែមានជំហររឹងមាំនិងឯករាជ្យភាពចំពោះសេដ្ឋកិច្ចរបស់ខ្លួន។ ពោលគឺវានឹងធ្វើឲ្យប្រទេសទាំងនោះមានជំនឿចិត្តលើខ្លួនឯង ហើយអាចផ្តល់សន្ទុះដល់ការវិនិយោគ និងកំណើនសេដ្ឋកិច្ច ថែមទៀតផង។
មួយវិញទៀត ដោយសារតែជិតដល់រដូវបុណ្យណូអែល និងបុណ្យឆ្លងឆ្នាំសកលផង លោកម៉ាក្រុង ក៏បានធ្វើពិធីជួបជុំទាហានបារាំង ដែលបំពេញទស្សនិច្ចកិចនៅអាហ្វ្រិក។ ប្រមុខរដ្ឋវ័យក្មេង បានធ្វើពិធីខួបកំណើរ៤២ឆ្នាំរបស់ខ្លួនជាមួយទាហានបារាំងនៅក្នុងជំរំយោធា ដោយធ្វើចូលរួមម្ហូបនិងដួលចំណីម្ហូបអាហារជូនទាហានបារាំងដោយផ្ទាល់ដៃទៀតផង។ កាយវិការនេះជាការផ្តល់កម្លាំងចិត្ត និងបង្ហាញស្មារតីរួបរួមជាមួយកម្លាំងកងទ័ព ខណៈដែលពួកគេធ្វើបេសកម្មឆ្ងាយស្រុក ឆ្ងាយគ្រួសារ។ ព្រោះថា ក្នុងឱកាសបុណ្យទានសំខាន់ៗដូច្នេះ ពួកគេគួរណាស់តែបានត្រូវនៅជួបជុំគ្រួសារដ៏កក់ក្តៅ។
ចំពោះរឿងទាហាននេះដែរ តែទាហានដែលបានបាត់បង់ជីវិតទៅ ប្រមុខរដ្ឋបារាំង បានចូលរួមពិធីឧទ្ទិសនិងគោរពវិញ្ញាណក្ខន្ធដល់កងទ័ពបារាំង១៣ដែលស្លាប់កាលពីពេលថ្មីៗនេះ ដោយគ្រោះថ្នាក់ធ្លាក់ឧទ្ធម្ភកចក្រ និងគោរពវិញ្ញាណក្ខន្ធទាហាននីហ្សេ ៧១នាក់ ដែលត្រូវពួកអង្គការរដ្ឋអ៊ីស្លាមសម្លាប់។ ក៏មានដែរ ការឱនក្បាលគោរពសពនៃវិញ្ញាណក្ខន្ធកងទ័ពបួគីណាហ្វាសូ ម៉ាលី និងកូឌីវ័រ ជាដើម។
ជារួម វត្តមានរបស់ប្រធានាធិបតីបារាំង នៅលើដីអាហ្វ្រិកលើកនេះ គឺចង់កសាងទំនុកបន្ថែមទៀត រវាងបារាំងនិងអាហ្វ្រិក ក្នុងភាពជាដៃគូយុទ្ធសាស្ត្រ មិនមែនក្នុងនាមជាចៅហ្វាយនាយ និងខ្ញុំបម្រើនោះទេ។
នៅប្រទេសអាហ្វ្រិក, ទាំងនៅក្នុងជួរកងទ័ពនិងមជ្ឈដ្ឋានពលរដ្ឋអាហ្វ្រិកមួយចំនួន គឺចាប់ផ្តើមកើនសន្ទុះនៃអារម្មណ៍ស្អប់ខ្អើមបារាំង។ ពួកគេទទួលអារម្មណ៍បែបនេះ ព្រោះតែបារាំងគឺជាអតីតម្ចាស់អាណានិគម។ ហេតុនេះហើយ វត្តមានរបស់ទាហានបារាំង ទាំងជាង៤ពាន់៥រយនាក់នៅតំបន់សាហែលនោះ គឺនាំឱ្យគេនឹកដល់ការមកដល់ជាថ្មីនៃម្ចាស់អាណានិគម។
ការលើកឡើងនេះ គឺមិនខុសឡើយ! ដូច្នេះហើយ ទើបប្រធានាធិបតីបារាំង ចង់បានការធានាឱ្យច្បាស់ពីសុវត្ថិភាពរបស់ទាហានបារាំងនៅអាហ្វ្រិក។ ក៏ប៉ុន្តែ ជាបឋម ដើម្បីបង្ហាញពីសុឆន្ទៈស្មោះសរបស់ខ្លួន និងដើម្បីលុបចោលរូបភាពជាម្ចាស់អាណានិគមដែលត្រួតត្រាគេលើវិស័យលុយកាក់ គឺដូចដែលយើងឃើញស្រាប់ លោក ម៉ាក្រុង បានសម្រេចលុបចោលរូបិយបណ្ណ France CFA។
មិនតែប៉ុណ្ណោះ លោក ម៉ាក្រុង ថែមទាំងមានប្រសាសន៍លួងចិត្តអាហ្រ្វិក ថា«អាណានិគមនិយម គឺជាកំហុងធ្ងន់ធ្ងរ ហើយលោកក៏ទទួលស្គាល់ដែរថានេះជាកំហុសមួយរបស់ប្រទេសបារាំងកាលពីអតីតកាល»។ ជាមួយគ្នានេះ លោកប្រធានាធិបតី កូឌីវ័រ ក៏បានកោតសរសើរចំពោះសេចក្តីក្លាហានសារភាពនេះ និងថា ប្រទេសអាហ្វ្រិកចង់បានដៃគូសហការដែលអាចគួរឱ្យគោរពគ្នាបានទៅវិញទៅមក។
ផ្ទុយទៅវិញ ប្រសាសន៍របស់ប្រមុខរដ្ឋបារាំងដូច្នេះ ត្រូវបក្សប្រឆាំងនៅស្រុកបារាំង បែរជាថ្កោលទោសទៅវិញ។ លោកស្រី Marine Le Pen ដែលជាគូប្រជែង បានវាយប្រហារលោកប្រមុខរដ្ឋបារាំងថា«ធ្វើឱ្យប្រឡាក់ល្អក់កករប្រវត្តិសាស្ត្ររបស់ខ្លួន ព្រមទាំងធ្វើឱ្យទាហានបារាំងកាន់តែធ្លាក់ក្នុងសភាពគ្រោះថ្នាក់នៅអាហ្វ្រិក»។
ក៏ប៉ុន្តែ ចំពោះ លោក អេម៉ាណុយម៉ាក្រុង! គឺលោកប្តេជ្ញាចិត្តហើយថា «លោកនឹងមិនឱ្យអារម្មណ៍ស្អប់ខ្ពើមបារាំងនៅអាហ្វ្រិករីករាលដាលកាន់តែខ្លាំងនោះឡើយ។ ហើយសុវត្ថិភាពទាហានបារាំង គឺត្រូវតែបានទទួលការធានាពីម្ចាស់ស្រុកផងដែរ»។
វត្តមានរបស់ទាហានបារាំងនៅអាហ្វ្រិក គឺគោលបំណងដើម្បី ប្រយុទ្ធប្រឆាំងភេរវនិយមនៅតំបន់សាហែល។ ក៏ប៉ុន្តែ អ្នកជំនាញមួយចំនួន និងអ្នកការទូតខ្លះផង យល់ថាបារាំងចេញមុខមាត់ច្រើនពេកហើយ។ ការចេញមុខជ្រុលដូច្នេះ គឺជាការបង្ហាញរូបភាពមួយ ឱ្យគេស្អប់បារាំង។
ចំពោះជំហរបារាំង គឺ សង្រ្គាមប្រយុទ្ធប្រឆាំងភេរវនិយមនៅតំបន់សាហែល គឺវាដូចជាសង្គ្រាមចំពោះមុខដូច្នោះដែរ។ ប្រមុខរដ្ឋបារាំង យល់ថា បើគេមិនជួយពួតដៃគ្នាវាយរំលំពួកភេរវជនជីហាតនៅអាហ្វ្រិកនេះទេ នៅថ្ងៃមុខ ពួកអស់នេះ នឹងមកធ្វើសង្គ្រាមជីហាតក្នុងទឹកដីអឺរ៉ុបតែម្តង។ ដូច្នេះហើយ ទើបជាថ្មីម្តងទៀត លោក ម៉ាក្រុង អំពាវវនាវឱ្យប្រទេសអឺរ៉ុបនិងសហគមអន្តរជាតិ ចូលរួមឱ្យសកម្មក្នុងសង្គ្រាមនេះ។
បើនិយាយថា បារាំងចេញមុខច្រើនជាងគេ និងច្រើនជ្រុល ក៏មិនត្រូវដែរ ពីព្រោះថា នៅតំបន់សាហែលនេះ ក៏មានកងទ័ពអន្តរជាតិផ្សេងៗដែរ។ ក្រៅពីទ័ពនៃប្រទេសទាំង៥គឺ បួគីណាហ្វាសូ ម៉ាលី ម៉ូរីតានី នីហ្សេនិង ឆាត ក៏មានដែរទ័ពអាមេរិក និងកងទ័ពរបស់អង្គការសហប្រជាជាតិ ដែលបំពេញបេសកម្មនៅម៉ាលីជាដើម។ ចំណែក ប្រទេសជប៉ុនក៏ធ្លាប់បានជួយគម្រោងថវិកា ជិត៦០លានដុល្លារដែលសម្រាប់ការប្រយុទ្ធប្រឆាំងភេរវនិយមនៅតំបន់សាហែលនេះ។ នេះនៅមិនទាន់រាប់ពីជំនួយរបស់ប្រទេសអឺរ៉ុបផ្សេងទៀតផងទេ។
ទោះយ៉ាងណាក្តី អ្នកជំនាញខ្លះ និងអ្នកការទូតមួយចំនួន គឺគេកំពុងតែចោទសំណួរថា វត្តមានអន្តរាគមន៍របស់ទាហានបារាំងនៅតំបន់សាហែលនេះ វាអាចដូចវត្តមានអន្តរាគមន៍របស់កងទ័ពអាមេរិកនៅអាហ្វហ្គានីស្ថាន ដែរទេ? កាសែត Washington Post របស់អាមេរិក បានបកអាក្រាតថា អន្តរាគមន៍របស់កងទ័ពអាមេរិកនៅអាហ្វហ្គានីស្ថាន ជារឿងបរាជ័យ។ ហើយរឿងនេះ ក៏ត្រូវគេចោទនិងយកមកគិតពីករណី វត្តមានអន្តរាគមន៍របស់ទាហានបារាំងនៅតំបន់សាហែលនេះដែរ។
មន្ត្រីទូតខាងកិច្ចការសន្តិភាពរបស់អង្គការការសហប្រជាជាតិ លោក Jean Marie Guéhenno បានឱ្យយោបល់ថា បារាំងគួរតែប្រគល់ភារកិច្ចនេះ ឱ្យអង្គការសហប្រជាជាតិវិញ ព្រោះបារាំងជាសមាជិកក្រុមប្រឹក្សាសន្តិសុខស្រាប់ គួរពន្យលសមាជិកទាំងឡាយហើយកៀងគរកម្លាំងអង្គការសហប្រជាជាតិ មកធ្វើយុទ្ធនាការនៅអាហ្វ្រិកវិញ។ ព្រោះថា នាពេលកន្លងមក មេបញ្ជាការបារាំង បានបញ្ជាផ្ទាល់ៗតែម្តង ទៅកូនទាហាននៅក្នុងស្រុក ជាហេតុនាំឱ្យគេថ្នាំងថ្នាក់ រង្គៀសចិត្ត និងនាំឱ្យចោទសួរពីឋាននុក្រមនៃទាហានបារាំងនិងទាហានក្នុងស្រុក។
ប្រឈមនឹងបញ្ហាដូច្នេះហើយ ទើបប្រមុខរដ្ឋបារាំង បានរៀបចំជំនួបកំពូលមួយ នៅស្រុកបារាំង ដោយត្រូវអញ្ជើញប្រមុខរដ្ឋនិងប្រមុខរដ្ឋាភិបាលនៃប្រទេសអាហ្វ្រិកដែលពាក់ព័ន្ធមកជជែកទល់មុខគ្នាលម្អិត នៅថ្ងៃទី១៣ ខែមករា ឆ្នាំ២០២០៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ