សត្វព្រៃក្នុងតំបន់អភិរក្សនៅអាហ្វ្រិក ត្រូវនាំចេញយ៉ាងគំហុក ទៅកាន់អាស៊ី
សត្វព្រៃនៅក្នុងតំបន់អភិរក្សក្នុងទ្វីបអាហ្រិក ត្រូវនាំចេញយ៉ាងគំហុសទៅកាន់ទ្វីបអាស៊ី នារយៈពេលប៉ុន្មានឆ្នាំចុងក្រោយនេះ។ សត្វព្រៃទាំងនោះ មានអណ្តើក ពស់ថ្លាន់ សត្វសេក និងក្រពើ។ នេះបើតាមរបាយការណ៍សិក្សាមួយ របស់ក្រុមអង្គការការពារសត្វព្រៃ ចេញផ្សាយពីថ្ងៃអង្គារម្សិលមិញ។
ចុះផ្សាយនៅថ្ងៃ៖
ស្តាប់ - ០១:៥៥
នៅក្នុងរបាយការណ៍ អង្គការការពារសត្វព្រៃ (ONG Trafic) បានប្រាប់ឲ្យដឹងថា ចាប់តាំងពីឆ្នាំ២០០៦មក សត្វព្រៃប្រមាណ១លាន៣សែនក្បាល ស្បែកសត្វ១លាន៥សែន និងសាច់សត្វព្រៃ២ពាន់តោន ត្រូវនាំចេញពីទ្វីបអាហ្វ្រិក ទៅកាន់ទ្វីបអាស៊ី គឺពិសេសទៅកាន់អាស៊ីបូព៌ា និងអាស៊ីអគ្នេយ៍។
អ្នកស្រាវជ្រាវរឿងនេះ ពន្យល់ទៀតថា កំណើននៃការនាំចេញសត្វព្រៃពីអាហ្រ្វិកនេះ គឺដោយសារមានតម្រូវការបញ្ជាទិញរបស់ក្រុមហ៊ុនកែច្នៃផលិតផលពីស្បែកសត្វ និងក្រុមហ៊ុនខាងចំណីអាហារ ហើយក៏មានដែរ ការបញ្ជាទិញសត្វព្រៃដើម្បីយកទៅចិញ្ចឹម។ សព្វព្រៃពេញនិយមនាំចេញទាំងនោះ មានដូចជាពស់ថ្លាន់ សេក អណ្តើក ក្រពើ ភេសមុទ្រ ជាដើម។
ចំពោះសត្វពស់ថ្លាន់និងអណ្តើក គឺមានការនិយមទិញយកទៅចិញ្ចឹមនៅអាស៊ី ពិសេសនៅហុងកុង ព្រោះថា សត្វទាំងនេះ ឆាប់ស៊ាំនឹងបរិស្ថានក្នុងស្រុក ហើយនិងមិនសូវត្រូវការទីជម្រកធំនោះទេ។ បើសរុបចំនួន អណ្តើកនិងពស់ថ្លាន់ ដែលបានត្រូវនាំចេញពីអាហ្វ្រិក គឺមានជិត៩ពាន់ក្បាល នៅឆ្នាំ២០០៦ តែចំនួននេះ វាបានកើនឡើងរហូតដល់ទៅ ៨ម៉ឺនក្បាល ឆ្នាំ២០១៥។
ចំណែកសត្វសេកពណ៌ប្រផេះត្រូវនាំចេញពីប្រទេសហ្គាប៉ុង ប្រមាណ១០ម៉ឺនក្បាល ទៅកាន់អតិថិជននៅអាស៊ី។ ហ្គាប៉ុក ត្រូវគេដាក់បញ្ចូលក្នុងតំបន់រងហានិភ័យ ដែលធ្វើជំនួញសត្វសេកខុសច្បាប់។
ក្រៅពីទិញលក់សត្វព្រៃរស់ ស្បែកសត្វក៏រឹតតែពេញនិយមណាស់ដែរ គឺពិសេសស្បែកភេសមុទ្រដែលប្រមាញ់ចេញពីប្រទេស ណាមីប៊ី យកទៅលក់នៅស្រុកចិន និងហុងកុង។ ស្បែកសត្វត្រូវគេប៉ាន់ប្រមាណថា នាំចេញពីអាហ្វ្រិក ចំនួនជិត២ពាន់ស្បែក នៅឆ្នាំ២០០៧ តែចំនួននេះ បានកើនឡើង ដល់ជាង២ម៉ឺនស្បែក នៅឆ្នាំ២០១២។ រីឯចរាចរណ៍ស្បែកក្រពើវិញ ក៏ត្រូវគេកត់សម្គាល់ថា មានការកើតឡើងខ្លាំងដែរ សម្រាប់នាំចេញទៅកាន់ប្រទេស ជប៉ុន និងសីង្ហបុរី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ