Washington Post ផ្សាយថា លោកអូបាម៉ា ដឹងមុនជាច្រើនខែ ថារុស្ស៊ីមានគំរោងលុកលុយការបោះឆ្នោត
ចុះផ្សាយនៅថ្ងៃ៖
ស្តាប់ - ០៦:២៥
កាលពីថ្ងៃសុក្រ ទី ២៣ មិថុនា កាសែត Washington Post បានចុះផ្សាយថា CIA ធ្លាប់បានផ្តល់ដំណឹង ដល់រដ្ឋាភិបាលលោកអូបាម៉ា តាំងតែពាក់កណ្តាលឆ្នាំ២០១៦ អំពីលទ្ធភាពនៃការវាយប្រហារតាមប្រព័ន្ធព័ត៌មានវិទ្យា ពីសំណាក់ចារកិច្ចរុស្ស៊ី។ បើតាមការចុះផ្សាយរបស់សារព័ត៌មាននេះ លោកអូបាម៉ា បានដឹងថារុស្ស៊ីមានគំរោងលុកលុយការបោះឆ្នោត ប្រធានាធិបតីអាមេរិក តែលោកអូបាម៉ា បានសម្រេចចិត្តមិនវាយបកវិញភ្លាមៗ ដោយរងចាំឲ្យការបោះឆ្នោតរំលងផុតសិន។
រឿងរ៉ាវ ដែលថារុស្ស៊ីបានបញ្ជារ ឲ្យមានការលុកលុយតាមប្រព័ន្ធព័ត៌មានវិទ្យា ដើម្បីបំផ្លាញការបោះឆ្នោតប្រធានធិបតីអាមេរិកនោះ គឺត្រូវបានគេដឹងសុះសាយ តាំងតែពីចុងឆ្នាំ២០១៦ម្លេះ។ តែថ្ងៃ ទី២៣ មិថុនា នេះ កាសែត Washington Post បានចុះផ្សាយលំអិតបន្ថែមទៀត។ ជារួម គឺលោកអូបាម៉ា បានដឹងរឿងនេះ តាំងតែពីពាក់កណ្តាលឆ្នាំ២០១៦ម្លេះ ដោយ មានការផ្តល់ដំណឹងពី ក្រុមការងាររបស់ CIA។
CIA បានប្រាប់លោកអូបាម៉ា យូរខែមកហើយ
ខែ កក្កដា ២០១៦ មួយថ្ងៃមុនបោះឆ្នោតរើសបេក្ខជនតំណាងបក្សប្រជាធិបតេយ្យ គណនីអ៊ីម៉ែល របស់គណបក្សនេះ ត្រូវបានចោរចូលមកលួចយកទិន្ន័យ ហើយផ្សាយតាមWikileaks។ កាលនោះ គេគ្រាន់តែសង្ស័យ ថាអាចជាអំពើរបស់ចារកិច្ចរុស្ស៊ី។ ជាផ្លូវការ ថាជាការសង្ស័យ តែធាតុពិត បើតាមការចុះផ្សាយរបស់ Washington Post គឺ រដ្ឋាភិបាលលោកអូបាម៉ា បានទទួលដំណឹងពី CIA ហើយ ដឹងច្បាស់ថាជាទង្វើរបស់រុស្ស៊ី។
Washington Post ផ្សាយថា នៅថ្ងៃទី ៤ សីហា ២០១៦ លោក John Brennan នាយក CIA បានទូរស័ព្ទទៅនិយាយជាមួយនាយកការិយាល័យសន្តិសុខរុស្ស៊ី ដើម្បីនិយាយពីបញ្ហានេះ។ ក្រោយមក នៅខែកញ្ញា លោកអូបាម៉ា បានជួបនិយាយដោយផ្ទាល់មាត់ ជាមួយលោកពូទីន នៅឯជំនួបកំពូលនៅចិន។ ក្នុងពេលនោះ លោកអូបាម៉ា បានប្រាប់ទៅប្រធានាធិបតីពូទីនថា បើសិនជារុស្ស៊ី ជាអ្នកធ្វើមែន រុស្ស៊ីត្រូវតែបញ្ឈប់ជាបន្ទាន់។ ហើយក្រោយមកទៀត នៅថ្ងៃទី ៣១ តុលា រដ្ឋាភិបាលលោកអូបាម៉ា បានផ្ញើរសារសំងាត់មួយ ទៅកាន់រុស្ស៊ី ដើម្បីរំលឹកថា បើសិនជារុស្ស៊ី មានបំណងមកបំផ្លាញការបោះឆ្នោតនៅអាមេរិកមែននោះ នោះជារឿងមួយ ដែលអាមេរិកមិនអាចទទួលយកបានទេ ហើយនឹងវាយបកវិញ។
បើតាមការចុះផ្សាយរបស់ Washington Post នេះ គឺលោកអូបាម៉ា ដឹងថារុស្ស៊ីនៅពីក្រោយការចូលវាយលុកតាមបណ្តាញព័ត៌មានវិទ្យា តាំងតែពីខែកក្កដា ម្លេះ។ តែរហូតដល់ថ្ងៃទី ៧ តុលា ២០១៦ ទើបរដ្ឋាភិបាលលោកអូបាម៉ា បានចោទប្រកាន់ជាផ្លូវការ ថាមន្ត្រីចារកិច្ចរុស្ស៊ី ជាអ្នកនៅពីក្រោយសកម្មភាព វាយប្រហារព័ត៌មានវិទ្យា ទៅលើគណបក្សប្រជាធិបតេយ្យ។ លោកអូបាម៉ា បានបង្អង់ រហូតទាល់តែដល់ ខែមករា ឆ្នាំ២០១៧ មុននឹងនិយាយដោយចំៗ ថាលោកពូទីន ជាអ្នកនៅពីក្រោយសកម្មភាពទាំងអស់នេះ ដើម្បីធ្វើយ៉ាងណា រារាំងកុំឲ្យលោកស្រីហ៊ីលឡារី គ្លីនតុន ឈ្នះឆ្នោត។
លោកអូបាម៉ា រារែក មិនចង់វាយបកវិញ មុនពេលបោះឆ្នោត
កន្លងមក ធ្លាប់មានការចុះផ្សាយជាច្រើន របស់បណ្តាញព័ត៌មានអាមេរិក ដែលពន្យល់ពីមូលហេតុ ដែលលោកអូបាម៉ា នៅអែរអង់។ ហេតុផលនោះគឺថា លោកអូបាម៉ា មិនចង់វាយបកទៅរុស្ស៊ីវិញ មុនថ្ងៃបោះឆ្នោតមកដល់។ លោក អូបាម៉ា ខ្លាចក្រែងថា បើវាយបកទៅវិញ គឺមិនខុសពីរុញរុស្ស៊ី ឲ្យធ្វើផ្គើនរឹតតែខ្លាំង នៅថ្ងៃបោះឆ្នោតតែម្តង។ ពោលគឺ លោកអូបាម៉ា ចង់ប្រើធម៌ត្រជាក់ ជាមួយរុស្ស៊ីសិន។
យ៉ាងណាមិញ មានអ្នកជំនាញខ្លះ គេបានលើកឡើងថា ជំរើសរបស់លោកអូបាម៉ា នេះ បានធ្វើឲ្យរុស្ស៊ី ដកថយទៅវិញដែរ ព្រោះថា បើពិនិត្យលើលទ្ធភាពជាក់ស្តែង ក្រុមចោរព័ត៌មានវិទ្យារុស្ស៊ី អាចធ្វើផ្គរធ្វើភ្លៀងបានយ៉ាងងាយ នៅថ្ងៃបោះឆ្នោតធំ ថ្ងៃទី ៨ វិច្ឆិកា។
លោក អូបាម៉ា បញ្ជារឲ្យបង្កើត កម្មវិធី “គ្រាប់បែកបរមាណូឌីជីថល”
ប៉ុន្តែយ៉ាងណា មិនមែនមានន័យថា លោកអូបាម៉ា អង្គុយឱបដៃចាំមើល មិនធ្វើអ្វីសោះនោះទេ ក្នុងកំឡុងពេលនោះ។ ចុងខែធ្នូ លោកអូបាម៉ា បានបញ្ជារឲ្យមានការដាក់ទណ្ឌកម្ម ទៅលើរុស្ស៊ី ដូចជាការបណ្តេញចេញ នូវភ្នាក់ងារសំងាត់របស់ចារកិច្ចរុស្ស៊ី៣៥នាក់ ព្រមទាំងទណ្ឌកម្មសេដ្ឋកិច្ចមួយចំនួនទៀត ទៅលើបណ្តាញចារកិច្ចរុស្ស៊ី។
បើតាមការចុះផ្សាយ របស់ Washington Post គឺតាំងតែពីខែសីហា ឆ្នាំ២០១៦ លោកអូបាម៉ា បានរៀបចំក្រុមការងារ ឲ្យត្រៀមខ្លួនវាយបក ទៅលើរុស្ស៊ីវិញ តាមប្រព័ន្ធបចេ្ចកវិទ្យាព័ត៌មាន រួចជាស្រេច។ លោកអូបាម៉ា បានបញ្ជារដោយសំងាត់ ឲ្យCIA និង NSA រួមគ្នា ធ្វើការបង្កើតកម្មវិធីវាយលុកពិសេសមួយ ទៅក្នុងប្រព័ន្ធព័ត៌មានវិទ្យារបស់រុស្ស៊ី។ កម្មវិធីវាយបំផ្លាញតាមប្រព័ន្ធព័ត៌មានវិទ្យានេះ កំពុងស្ថិតក្នុងដំណាក់កាលស្ថាបនា ដើម្បីអាចដាក់ឲ្យអនុវត្តនាពេលខាងមុខ។ មានអ្នកជំនាញខ្លះគេហៅកម្មវិធីនេះថា ជា “គ្រាប់បែកបរមាណូ ឌីជីថល” ទៀតផង។
កាសែត Washington Post បានសរសេរថា រហូតមកដល់ពេលនេះ គ្មានអ្វីសំអាងទេ ថាកម្មវិធីវាយបកទៅវិញនេះ ស្ថិតនៅជាធរមានដដែល រឺមួយក៏ត្រូវបានលោកដូណាល់ ត្រាំ បញ្ជារឲ្យបិទទៅវិញហើយ។ ដូច្នេះ វាយបកទៅរុស្ស៊ីវិញ ឬយ៉ាងណា ចាប់ពីពេលនេះទៅ គឺស្ថិតក្នុងកណ្តាប់ដៃរបស់លោកដូណាល់ ត្រាំ តែម្នាក់គត់។
លោក ត្រាំ និយាយទំលាក់កំហុស លើលោកអូបាម៉ា
ដូចយើងដឹង ទំលាប់លោក ដូណាល់ ត្រាំរួចហើយ គឺគាត់តែងតែសរសេរបញ្ចេញយោបល់ នៅលើ Twitter។ ក្រោយពេល Washington Post ចុះផ្សាយរឿងនេះ លោកត្រាំ បានធ្វើសារមួយភ្លាម នៅលើទំព័រ Twitter របស់គាត់ថា “រដ្ឋាភិបាលអូបាម៉ា ដឹងរឿងច្បាស់ ថារុស្ស៊ី ចូលមកលុកលុយការបោះឆ្នោត តាំងតែពីមុនថ្ងៃ៨ វិច្ឆិកា តែមិនបានធ្វើអ្វីសោះ។ ព្រោះហេតុអ្វី?”
ពិតណាស់ គឺក្នុងសារនេះ លោកដូណាល់ ត្រាំ ចង់ទំលាក់កំហុសទៅលើលោកអូបាម៉ា ថាដឹងរឿង តែបណ្តោយមិនព្រមវាយបកទៅខាងរុស្ស៊ីវិញ។
ទាក់ទងទៅនឹងរឿងរ៉ាវនេះដែរ លោកត្រាំ បានផ្តល់បទសម្ភាសន៍នៅទូរទស្សន៍ Fox News កាលពីថ្ងៃ សុក្រទី២៣ មិថុនា ដែលក្នុងនោះ លោកត្រាំ បានបន្ទោសបណ្តាញព័ត៌មាន ថាហេតុអ្វីមិនបាននាំគ្នាផ្អើល ចាប់អារម្មណ៍ពីរឿងនេះ។ លោកត្រាំ ថា លោកអូបាម៉ា ដឹងរឿង ចុះហេតុម្តេចមិនធ្វើអ្វីសោះ។ នៅក្នុងបទសម្ភាសន៍នេះ លោកត្រាំ ថែមទាំងនិយាយក្នុងន័យបញ្ឆិតបញ្ឆៀង ថា លោកអគ្គនាយក FBI ថ្មីដែលទទួលបន្ទុកស៊ើបអង្កេតរឿងនេះ អាចជាមនុស្សលំអៀង ព្រោះថាលោកនាយកFBI ថ្មី គឺជាមិត្តភ័ក្ត នឹងលោក James Comey ដែលលោកត្រាំបានដកចោល។ សម្រាប់លោកត្រាំ ការនេះវាអាចប៉ះពាល់ ដល់ការស៊ើបអង្កេត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ