រដ្ឋាភិបាលបន្ទន់ជំហរ ចលនាបាតុកម្មរបស់មហាជនប្រេស៊ីល កាន់តែឡើងដៃ
ចុះផ្សាយនៅថ្ងៃ៖
ទោះបីជា រដ្ឋាភិបាលបានព្រមព្រៀងលុបចោលការដំឡើងថ្លៃមធ្យោបាយធ្វើដំណើរហើយក៏ដោយ ក៏ចលនាបាតុកម្មតាំងពីជាង១០ថ្ងៃមកនោះ មិនព្រមបំបែកហ្វូងដែរ។ ផ្ទុយទៅវិញ ការប្រកូកប្រកាសតាមប្រព័ន្ធសង្គម មានលក្ខណៈកាន់តែដាត់ខាតឡើងៗ ល្ងាចមិញបណ្តាជនប្រេស៊ីលជិតមួយលាននាក់ បាននាំគ្នាចុះថ្នល់ នៅតាមខេត្តក្រុងជាង៨០ពេញទូទាំងប្រទេស និងបានរាលដាលជាអំពើហិង្សា មានស្លាប់យ៉ាងហោចណាស់ម្នាក់។ លោកស្រីប្រធានាធិបតីប្រេស៊ីល ឌីលម៉ា រ៉ូសេហ្វ ត្រូវបង្ខំចិត្តលុបចោលទស្សនកិច្ចនៅប្រទេសជប៉ុន និងកោះប្រជុំរដ្ឋមន្ត្រីជាបន្ទាន់ នៅថ្ងៃនេះ។
រលកចលនាមនុស្សធ្វើបាតុកម្ម មានទំហំធំធេងជាង កាលពី១០ថ្ងៃមុនទៀត ! នៅល្ងាចមិញនេះ ហ្វូងបាតុករនាំគ្នាចុះថ្នល់ ដើម្បីអបអរជ័យជំនះរបស់ពួកគេ ព្រោះ រដ្ឋាភិបាលប្រេស៊ីល បានលុបចោល ការដំឡើងថ្លៃមធ្យោបាយ តាមការទាមទាររបស់បាតុករ។ ប៉ុន្តែជាមួយនឹងការអបអរ នេះក៏ជាឱកាសមួយសម្រាប់មហាជនប្រេស៊ីល ឆ្លៀតនាំគ្នាទាមទាររដ្ឋាភិបាលបន្ថែមទៀត។ សារអំពាវនាវតាមប្រព័ន្ធសង្គមមានកាន់ច្រើនឡើងៗ ឱ្យប្រមូលគ្នាធ្វើបាតុកម្ម ដើម្បីបង្ខំឱ្យរដ្ឋាភិបាល លើកតម្កើង វិស័យសាធារណៈ មានជាអាទិ៍វិស័យអប់រំ និង សុខភាព។
ថ្វីដ្បិតតែប្រេស៊ីល លូតលាស់ខ្លាំង ក្លាយជាប្រទេសស្ថិតក្នុងចង្កោមអ្នកមានសេដ្ឋកិច្ចរស់រវើក២០ប្រទេសដំបូងក៏ដោយ ក៏វិស័យធំពីរ អប់រំ និងសុខាភិបាលមានលក្ខណៈទន់ខ្សោយខ្លាំង ជាពិសេសសម្រាប់បណ្តាជនក្រីក្រ។ បាតុករដែលជានិស្សិត ជាមន្ត្រីបុគ្គលិក រដ្ឋការ ចម្រុះគ្នា យល់ថាដល់វេលាដែលប្រេស៊ីល ត្រូវធ្វើបដិវត្ត ! ធ្វើបដិវត្តដើម្បីការប្តូរផ្លាស់ប្រទេសជាតិឱ្យ វិស័យអប់រំនិងសុខភាពនេះ បានប្រសើរឡើង !
គេពិតជាមិនអាចអត់គិតបានឡើយថា រលកចលនាបាតុកម្មក្នុងទ្រង់ទ្រាយធំបែបនេះ គ្មានមេ គ្មានកើយ គ្មានពណ៌សម្បុរនយោបាយ ឬ សហជីព ជួយគាំទ្រនៅពីក្រោយនោះ។ នៅថ្ងៃព្រហស្បតិ៍ម្សិលមិញ ជាលើកទីមួយ សហជីពជាច្រើន មានជាអាទិ៍ សហជីពកសិករគ្មានដី សហជីពសហភាពនិស្សិតជាតិ សហជីពពលករ និងគណបក្សនយោបាយឆ្វេងនិយម គណបក្សកុម្មុយនិស្តប្រេស៊ីល ព្រមទាំងអង្គការសង្គមស៊ីវិល ក៏បានបង្ហាញចេតនាចូលលើកបដា ក្នុងក្បួនបាតុកម្មដែរ។ ប៉ុន្តែតំណាងក្រុមយុវជនអ្នកផ្តួចផ្តើមបាតុកម្ម បានអះអាងថាពួកគេជាក្រុមឯករាជ្យ ផ្ទុះចេញស្ម័គ្រ ដូច្នេះនឹងគ្មានការចរចាសម្រុះសម្រួលណាមួយ ជាមួយរដ្ឋាភិបាល ដូចចលនាបាតុកម្មរៀបចំដោយបក្សនយោបាយ ឬសហជីពទេ។ ប៉ុន្តែចលនានេះនឹងចប់ប្រសិនបើរដ្ឋាភិបាលឆ្លើយតបទៅនឹងសំណើច្បាស់លាស់របស់ពួកគេ។
លោកស្រីប្រធានាធិបតី ឌីលម៉ា រ៉ូសេហ្វ (Dilma Rousseff) បានកោះប្រជុំគណៈរដ្ឋមន្ត្រីជាបន្ទាន់នៅថ្ងៃនេះ និងបានសម្រេចលុបចោលដំណើរទស្សនកិច្ច ជាផ្លូវការនៅប្រទេសជប៉ុនសប្តាហ៍ក្រោយ ដើម្បីពិចារណានិងវិភាគអំពីការទាមទាររបស់បាតុករប្រេស៊ីលនេះ។ រដ្ឋាភិបាលរបស់លោកស្រី រ៉ូសេហ្វ ពិតជាមិនអាចឆ្លើយតបទៅនឹងការទាមទារដ៏ច្រើន ក្នុងពេលភ្លាមៗដូច្នេះបានឡើយ។ រដ្ឋាភិបាល សឹងថាកំពុងស្លុតចិត្តខ្លាំង ព្រោះម្យ៉ាងត្រូវ ទប់ស្កាត់កុំឱ្យបាតុកម្មរាលដាលជាអំពើហិង្សា ដោយបញ្ចៀសមិនប្រើកម្លាំង បង្ក្រាប ព្រោះខ្លាចកំហឹងកាន់តែឆាបឆេះខ្លាំងផង និងត្រូវរក្សាសណ្តាប់ធ្នាប់សាធារណៈផង។
សូមបញ្ជាក់ថា នៅល្ងាចមិញ ស្ថាប័នរដ្ឋ មានជាអាទិ៍ វិមានប្រធានាធិបតី សភាជាតិ ក្រសួងការបរទេស បានរងការវាយងុតបំផ្លាញ។ ក្រុមអ្នកលួចបន្លំបានចូលបំផ្លាញ លួចតាមហាង។ ជាងនេះទៅទៀត មានបាតុករម្នាក់បានស្លាប់ ដោយរថយន្តកិន។ រដ្ឋមន្ត្រីក្រសួងយុត្តិធម៌ ដែល ត្រូវចូលរួមប្រជុំបន្ទាន់នេះដែរ បានប្រាប់អះអាងថា អាជ្ញាធរប្រេស៊ីលព្រួយបារម្ភយ៉ាងខ្លាំងចំពោះសន្ធឹកនៃបាតុកម្ម ដែលអាចចាត់ទុកបានថា ជាការធ្វើបដិវត្តមួយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ