អាមេរិកនឹងបញ្ជូនយន្តហោះចម្បាំងទៅឲ្យអេហ្ស៊ីប
ចុះផ្សាយនៅថ្ងៃ៖
វិបត្តិនៅអេហ្ស៊ីបកាន់តែធ្លាក់ចុះដុនដាប ដោយអន្តរាគមន៍របស់កងទ័ពទៅលើក្រុមបាតុករ បានបណ្តាលឲ្យមនុស្សស្លាប់ ជាង ៥០នាក់ និងរបួសជិត ៥០០នាក់ កាលពីថ្ងៃចន្ទកន្លងទៅ។ យោងតាមមន្រ្តីយោធាអាមេរិក អាមេរិកនឹងបញ្ជូនយន្តហោះចម្បាំង៤គ្រឿង ទៅឲ្យអេហ្ស៊ីប នៅខែសីហា ខាងមុខ។
អាមេរិកបានសម្រេចបញ្ជូនយន្តហោះតាំងពីយូរមកហើយ គ្រាន់តែ ការបញ្ជូនយន្តហោះចម្បាំងទៅឲ្យអេហ្ស៊ីប ត្រូវធ្វើនៅពេលនេះ គឺវាចំជួនពេលដែលវិបត្តិកំពុងផ្ទុះឡើង នៅអេហ្ស៊ីបនេះតែម្តង។ គម្រោងផ្តល់យន្តហោះ របស់អាមេរិកទៅឲ្យកងទ័ពអេហ្ស៊ីប ជាផ្នែកមួយនៃផែនការផ្តល់ជំនួយរបស់អាមេរិកទៅឲ្យអេហ្ស៊ីប ដែលក្នុងមួយឆ្នាំៗ អាមេរិកផ្តល់ប្រាក់ជំនួយ ប្រមាណ១ពាន់ ៥រយលានដុល្លារដល់ប្រទេសអេហ្ស៊ីប។ ជំនួយរបស់អាមេរិកផ្តោតសំខាន់ ទៅលើកងទ័ព ដែលទទួលបានដល់ទៅ ១ពាន់ ៣រយលានដុល្លារ ក្នុងពេលដែលជំនួយអាមេរិកសម្រាប់សេដ្ឋកិច្ចអេហ្ស៊ីបមានប្រមាណតែ ២៥០លានដុល្លារតែប៉ុណ្ណោះ។
ក្នុងកញ្ចប់ ផ្តល់ជំនួយយោធា សម្រាប់អេហ្ស៊ីប អាមេរិកសន្យាផ្តល់យន្តហោះចម្បាំង ២០គ្រឿង ដល់ប្រទេសនេះ។ យន្តហោះ ៨គ្រឿង ត្រូវគេបញ្ជូនរួចហើយ ទៅអេហ្ស៊ីប។ តាមគម្រោង លើកនេះ យន្តហោះ៤គ្រឿងត្រូវបញ្ជូន ទៅដល់ទីក្រុងគែរ នៅខែសីហា។ បន្ទាប់មកយន្តហោះ ចម្បាំង ៨គ្រឿងទៀត នឹងត្រូវបញ្ជូនទៅឲ្យអេហ្ស៊ីបនៅចុងឆ្នាំ ២០១៣នេះ។
ទីក្រុងវ៉ាស៊ីនតោន និយាយថា គេត្រូវការពេលវេលា ដើម្បីវាយតម្លៃថា តើអ្វីដែលកើតឡើងនៅអេហ្ស៊ីប គឺ ជារដ្ឋប្រហារ។ តាំងពីដំបូងទីមក រដ្ឋាភិបាលអាមេរិកទើសទាល់មែនទែន ពីអ្វីដែលកំពុងកើតឡើង នៅអេហ្ស៊ីប ព្រោះថា បើតាមច្បាប់ របស់អាមេរិក ដែលបង្កើតឡើង នៅឆ្នាំ ១៩៨០ រដ្ឋាភិបាលអាមេរិកត្រូវផ្តាច់ជំនួយដល់រដ្ឋាភិបាលណា ដែលបានធ្វើរដ្ឋប្រហារទម្លាក់រដ្ឋាភិបាលស្របច្បាប់។
សមាជិកព្រឹទ្ធសភា មកពីគណបក្សសាធារណរដ្ឋដែលចាត់ទុកថា មានរដ្ឋប្រហារ នៅអេហ្ស៊ីប កំពុងទាមទារឲ្យផ្អាកជំនួយទៅរដ្ឋាភិបាលបណ្តោះអាសន្ន នៅអេហ្ស៊ីប។ ប្រសិនបើក្រុមសាធារណរដ្ឋទាមទារបានសម្រេច នោះ អាមេរិកនឹងត្រូវផ្អាកជំនួយ នៅសល់ ដែលអាមេរិកមិនទាន់បានផ្តល់ទៅឲ្យអេហ្ស៊ីប សម្រាប់ឆ្នាំ ២០១៣។ អ្វីដែលធ្ងន់ធ្ងរ គឺជំនួយសម្រាប់សេដ្ឋកិច្ច។ ប្រសិនបើអាមេរិកផ្អឹបជំនួយមែន គឺប្រជាជនអេហ្ស៊ីប ដែលជាជនរងគ្រោះ ព្រោះថា ជំនួយ សម្រាប់សេដ្ឋកិច្ចអេហ្ស៊ីប សឹងទាំងអស់ ប្រមាណ២៥០លានអាមេរិកមិនទាន់បញ្ជូនទៅ បន្តិចណានៅឡើយទេ។ មួយវិញទៀត អាមេរិកនៅមិនទាន់បញ្ជូនជំនួយ ដែលនៅសល់មួយភាគបី នៃជំនួយសរុបទៅឲ្យកងទ័ព។
ម្យ៉ាងវិញទៀត នៅចុងខែកក្កដា ក្រុមព្រឹទ្ធសភាអាមេរិកកំពុងចង់ពិចារណាទៅលើវិធានការពន្ធដារបស់លោកអូបាម៉ាសម្រាប់ឆ្នាំ ២០១៤ ដែលក្នុងនោះ លោកអូបាម៉ា បានសម្រេចផ្តល់ជំនួយ ១ពាន់ ៥រយលានដុល្លារ ដល់អេហ្ស៊ីប សម្រាប់ឆ្នាំ ២០១៤។ តាមសមាជិកព្រឹទ្ធសភា អ្វីៗ គឺអាស្រ័យលើជំហររបស់លោកអូបាម៉ា។
ចាប់តាំងពីព្រឹត្តិការណ៍ទម្លាក់ប្រធានាធិបតីអេហ្ស៊ីបស្របច្បាប់ចេញពីតំណែង លោកប្រធានាធិបតីបារ៉ាក់ អូបាម៉ា មិនបានរិះគន់ ទៅលើសកម្មភាព របស់កងទ័ពអេហ្ស៊ីបទេ។ ប្រមុខដឹកនាំអាមេរិកតមសំដី មិនទាន់និយាយពាក្យថា រដ្ឋប្រហាររបស់កងទ័ពអេហ្ស៊ីប ដែលជាដៃគូសំខាន់របស់អាមេរិក។ កាលណោះ លោកគ្រាន់តែបានត្រឹមអំពាវនាវឲ្យកងទ័ពឆាប់ រៀបចំរដ្ឋាភិបាល និងឈប់បង្រ្កាបលើអ្នកប្រឆាំង។ ប៉ុន្តែ ដោយសារតែស្ថានការណ៍ចេះតែធ្លាក់ធ្ងន់ធ្ងរ នៅអេហ្ស៊ីប លោកប្រធានាធិបតីអាមេរិក ទើបបានបញ្ជាឲ្យគេសើរើ ពិនិត្យមើលឡើងវិញ កម្មវិធីផ្តល់ជំនួយ របស់អាមេរិក ទៅឲ្យរដ្ឋាភិបាលអេហ្ស៊ីប។ នេះបើតាមសេចក្តីប្រកាសព័ត៌មានក្រសួងការពារជាតិអាមេរិក។
ហេតុអ្វី បានជាអាមេរិកត្រូវខ្វល់ ការពារកងទ័ពអេហ្ស៊ីប?
អេហ្ស៊ីប ជាពិសេស គឺកងទ័ពអេហ្ស៊ីបតែម្តង គឺជាសម្ព័ន្ធមិត្តសំខាន់ជាងគេរបស់អាមេរិក នៅតំបន់ដើមបូព៌ា។ នៅតំបន់ដើមបូព៌ា គឺមានតែអេហ្ស៊ីប និងហ្សកដានីទេ ដែលបានចុះសន្ធិសញ្ញាសន្តិភាពជាមួយអ៊ីស្រាអែល ដែលជាសម្ព័នមិត្តរបស់អាមេរិក។ បន្ទាប់ពីអ៊ីស្រាអែល ប្រទេសអេហ្ស៊ីបជាប្រទេសទីពីរ ដែលបានទទួលជំនួយសន្ធឹកសន្ធាប់ពីទីក្រុងវ៉ាស៊ីនតោនក្នុងរយៈពេល៣០ឆ្នាំចុងក្រោយនេះ។ ជំនួយអាមេរិក ទៅឲ្យអេហ្ស៊ីបទាក់ទងនឹងស្ថិរភាពនយោបាយ នៅតំបន់ដើមបូព៌ា។ ប្រសិនបើគេដកជំនួយពីអេហ្ស៊ីប នោះ សន្តិភាព រវាងប្រទេសអារ៉ាប់ ជាមួយអ៊ីស្រាអែល នៅដើមបូព៌ា នឹងត្រូវរង្គោះរង្គើជាមិនខាន។
កងទ័ពអេហ្ស៊ីបដែលចុះសន្ធិសញ្ញាសន្តិភាពជាមួយអ៊ីស្រាអែល។ អាមេរិកមិនសូវជាគាំទ្ររដ្ឋាភិបាល មកពីក្រុមអ៊ីស្លាមនិយមប៉ុន្មានទេ ព្រោះថា រដ្ឋាភិបាលទាំងនេះប្រាកដជាលែងគោរពសន្ធិសញ្ញាជាមួយអាមេរិក ហើយងាកទៅរកក្រុមអ៊ីស្លាម ដែលជាសត្រូវរបស់អាមេរិក ដូចជាអ៊ីរ៉ង់ ឬពួកហាម៉ាសរបស់ចលនាប៉ាឡេស្ទីនជាដើម។
មួយវិញទៀត រដ្ឋាភិបាលអាមេរិកដែល មិនទាន់ដាក់សម្ពាធ ឬរិះគន់សកម្មភាពរដ្ឋប្រហាររបស់កងទ័ព អេហ្ស៊ីប ព្រោះចេះតែពន្យាពេល មិនចង់ផ្តាច់ជំនួយដល់កងទ័ពអេហ្ស៊ីប។ គឺកងទ័ពអេហ្ស៊ីបដែលរក្សាធានាសន្តិសុខ ដល់ដំណើរចរដឹកប្រេង តាមព្រែកជែក សុយអេ ដែលជាច្រកដឹកប្រេងដ៏សំខាន់មួយ របស់អាមេរិក ចេញពីតំបន់ដើមបូព៌ា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ