ប្រជាជនអាមេរិកាំងបែកបាក់គ្នា ក្នុងរឿងObamacare
ចុះផ្សាយនៅថ្ងៃ៖
ស្តាប់ - ០៥:៣១
នៅអាមេរិក សេវាសាធារណៈជាប់គាំងជិតមួយសប្តាហ៍មកហើយ។ មនុស្សជិតមួយលាននាក់ត្រូវបានបង្ខំឲ្យឈប់សម្រាកពីការងារ និងគ្មានបានទទួលបា្រក់ខែ បន្ទាប់ពីបក្សសាធារណរដ្ឋ នៅរដ្ឋសភាបដិសេធមិនបោះឆ្នោតថវិកា ដោយសារលោកប្រធានាធិបតីអាមេរិកមិនព្រមលុបចោល ឬពន្យារពេលអនុវត្តច្បាប់ធានារ៉ាប់រ៉ងសុខភាព Obamacare។ មនុស្សជិតមួយលានគ្មានការងារធ្វើដោយសារតែច្បាប់Obamacare ប៉ុន្តែ ចាប់តាំងពីថ្ងៃអង្គារទី ១ តុលា ដើមសប្តាហ៍មុន មនុស្សជាង ១០លាននាក់ បានចូលមើលវិបសៃតិ៍ (តែក្នុងរដ្ឋញូវយ៉ក) ដើម្បីចង់ដឹងថា តើពួកគេអាចទទួលប្រយោជន៍ពីសេវាធានារ៉ាប់រ៉ងសុខភាពរបស់លោកអូបាម៉ាដែរឬទេ។
កំណែទម្រង់ច្បាប់លើសេវាធានារ៉ាប់រងសុខភាពមានទិសដៅបី។ ទិសដៅចំបងរបស់Obamacare គឺគ្រប់ពលរដ្ឋអាមេរិកាំងត្រូវមានប័ណ្ណធានារ៉ាប់រងសុខភាព ជាចាំបាច់ ដោយមិនថា ពួកគេជា អ្នកក្រ ឬអ្នកមានទេ។ បច្ចុប្បន្ននេះ មានតែពលរដ្ឋអាមេរិកាំងដែលមានលុយច្រើន ឬអ្នកដែលមានការងារល្អទេ ដែលអាចទ្រាំទ្របង់ថ្លៃសេវាធានារ៉ាប់រងសុខភាព ដែលលក់ដោយក្រុមហ៊ុនឯកជន និងមានតម្លៃ ថ្លៃកប់ពពក។
ជាមួយនឹងកំណែទម្រង់ច្បាប់សុខភាព រដ្ឋាភិបាលលោកអូបាម៉ាអាចសម្រេចទិសដៅទីមួយដោយលំបាក ព្រោះថា មនុស្សជិត៥០លាននាក់នឹងត្រូវគ្របដណ្តប់ដោយច្បាប់នេះ។ ជារួម ពលរដ្ឋអាមេរិកាំងមានពេលវេលាចុះឈ្មោះស្វែងរកទិញប័ណ្ណធានារ៉ាប់រងសុខភាព រហូតដល់ចុងឆ្នាំ ២០១៣ ហើយគេរំពឹងថា ចាប់តាំងពីខែមីនា ឆ្នាំ ២០១៤ទៅ នៅពេលកិច្ចសន្យាចាប់ផ្តើមមានសុពលភាព នឹងមានពលរដ្ឋអាមេរិកាំងថ្មី ៣២លាននាក់ ដែលនឹងទទួលបានសេវាធានារ៉ាប់រងសុខភាព។
ជាក់ស្តែង ពួកគេនឹងមានសិទ្ធិទៅពិគ្រោះជម្ងឺ និងទទួលការព្យាបាល វះកាត់ ដោយមិនបារម្ភថា ពួកគេនឹងត្រូវចំណាយលុយបន្ថែមទេ។ តាមលោកអូបាម៉ា ច្បាប់សុខភាពរបស់លោកបានបោះជំហានទៅមុខ និងគ្មានអ្វីមករារាំង។ តាមលោកប្រធានាធិបតី អាមេរិក រហូតមក មនុស្សរាប់សែននាក់ស្លាប់ក្នុងមួយឆ្នាំៗ នៅអាមេរិក ដោយសារតែមិនអាចទទួលការព្យាបាល ដោយសារពួកគេគ្មានសេវាធានារ៉ាប់រងសុខភាព។ មនុស្សជាច្រើនលាននាក់ផ្សេងទៀត រស់នៅក្នុងភាពភ័យខ្លាចថា នឹងត្រូវរលាយទ្រព្យសម្បត្តិនៅថ្ងៃណាដែលពួកគេធ្លាក់ខ្លួនឈឺ។ តាមច្បាប់ Obamacare ក្រុមគ្រូពេទ្យត្រូវហាមឃាត់មិនឲ្យបដិសេធព្យាបាលអ្នកជម្ងឺ ដោយយកលេសលើហេតុផលជម្ងឺធ្ងន់ធ្ងរ ឬអាយុរបស់អ្នកជម្ងឺដូចមុនទៀតហើយ។
ទិសដៅទីពីរនៃObamacare គឺកែលម្អប្រព័ន្ធព្យាបាលអ្នកជម្ងឺ និងចុងក្រោយ គឺកាត់បន្ថយចំណាយរបស់រដ្ឋទៅលើវិស័យសុខាភិបាល។ រដ្ឋាភិបាលអាមេរិកបានចំណាយថវិកាប្រមាណ១៨ភាគរយនៃផលិតផលក្នុងស្រុកសរុប គឺច្រើនទ្វេដង បើប្រៀបធៀបនឹងប្រទេសដែលមានទំហំ និងប្រជាជនស្មើអាមេរិក ប៉ុន្តែ សេវាសុខភាពសាធារណៈរបស់អាមេរិកនៅតែអន់ខ្សោយ។ គេសង្ឃឹមដែរថា ច្បាប់ធានារ៉ាប់រងសុខភាព Obamacareនឹងជួយឲ្យរដ្ឋាភិបាលសន្សំសំចៃថវិកាប្រមាណ៣ពាន់លានដុល្លារ ពីពេលនេះ ដល់ឆ្នាំ ២០២០។
ប្រសិនបើ Obamacare នឹងផ្តល់ប្រយោជន៍ច្រើន ដល់ប្រជាជនអាមេរិកាំង និងរដ្ឋាភិបាលក្នុងការកាត់បន្ថយចំណាយ ហេតុអ្វី បានជាក្រុមសាធារណរដ្ឋប្រឆាំង ? ហើយប្រជាជនអាមេរិកាំងជាច្រើនទៀតខកចិត្ត មិនពេញចិត្តនឹងច្បាប់ធានារ៉ាប់រងជម្ងឺរបស់លោកអូបាម៉ា ?
សូមបញ្ជាក់ថា សេវាធានារ៉ាប់រងសុខភាពមិនមែនធ្វើឡើងដោយឥតគិតថ្លៃសម្រាប់មនុស្សគ្រប់រូបទេ។ អ្នកដែលមានសិទ្ធិទទួលជំនួយពីរដ្ឋ ដោយបានទទួលការព្យាបាល ដោយមិនចាំបាច់ចេញលុបហោប៉ៅ សូម្បីមួយសេន គឺអ្នកដែលបានប្រាក់ចំណូលតិច ឬអ្នកក្រតែម្តង។ ប៉ុន្តែ ក្រៅពីនោះ គឺអ្នកដែលមានប្រាក់ខែមធ្យម រដ្ឋនឹងជួយបង្រ្គប់បន្ថែមការខ្វះខាត នៅពេលគេទិញប័ណ្ណធានារ៉ាប់រងសុខភាព។ សម្រាប់អ្នកមានប្រាក់ចំណូលខ្ពស់ គេនឹងមិនបានទទួលជំនួយពីរដ្ឋទេ និងត្រូវទិញសេវាធានារ៉ាប់រងតាមទម្លាប់ចាស់។
ច្បាប់បានតម្រូវឲ្យប្រជាជនអាមេរិកាំងទាំងអស់ត្រូវតែចុះឈ្មោះទិញសេវាធានារ៉ាប់រងសុខភាពជាចាំបាច់ បើមិនដូច្នោះទេ ពួកគេនឹងប្រឈមការបង់ប្រាក់ពិន័យ។ ការតម្រូវឲ្យប្រជាជនគ្រប់រូបទិញប័ណ្ណធានារ៉ាប់រងជម្ងឺមិនត្រឹមតែជួយឲ្យពួកគេផ្ទាល់បានទទួលសេវាសុខភាពប្រកបដោយគុណភាព និងទាន់ពេលប៉ុណ្ណោះទេ ប៉ុន្តែ វានឹងធ្វើឲ្យរដ្ឋអាចកាត់បន្ថយបន្ទុកចំណាយរបស់ខ្លួនលើវិស័យសុខាភិបាល ជាពិសេស នៅពេលមានការចូលរួមកាន់តែច្រើនរបស់ក្រុមហ៊ុនធានារ៉ាប់រងសុខភាព។
ប៉ុន្តែ គឺការតម្រូវដោយច្បាប់នេះហើយ ដែលកំពុងធ្វើឲ្យប្រជាជនអាមេរិកាំងមួយចំនួនមិនសប្បាយចិត្ត។ អ្នកទាំងនោះ គឺគ្រួសារមធ្យម និងក្រុមអ្នកនយោបាយមកពីបក្សសាធារណរដ្ឋ។ អ្នកមានជីវភាពមធ្យម មើលឃើញថា ចំណាយលើសុខភាពដែលពួកគេមិនដែលបានធ្វើកន្លងមកនោះ នឹងក្លាយជាបន្ទុកថ្មីសម្រាប់ពួកគេ។
មួយវិញទៀត ច្បាប់ធានារ៉ាប់រងសុខភាពចែងផងដែរថា ក្រុមហ៊ុនដែលមានបុគ្គលិកបម្រើការពេញម៉ោង ចាប់ពី៥០នាក់ឡើងទៅ ត្រូវទិញសេវាសុខភាពឲ្យគ្រប់បុគ្គលិករបស់ខ្លួន។ ក្រុមហ៊ុនដែលល្មើសមិនគោរពតាម នឹងត្រូវទទួលការផាកពិន័យ។ តាមការបកស្រាយរបស់អ្នកនយោបាយមកពីបក្សសាធារណរដ្ឋ បុគ្គលិកមួយចំនួនដែលមានថៅកែទិញសេវាសុខភាពឲ្យរួចហើយនោះ នឹងត្រូវប្រឈមបាត់បង់ការធានារ៉ាប់រងសុខភាពនេះទៅវិញ ដោយសារតែពួកគេត្រូវបានថៅកែកាត់បន្ថយម៉ោងធ្វើការ ឬក៏មិនត្រូវបានរើសចូលជាបុគ្គលិកដោយសារតែថៅកែខ្លាចបង់ថ្លៃច្រើនលើសេវាធានារ៉ាប់រងសុខភាពឲ្យបុគ្គលិក។
តាមពិតទៅ ជំពូកដែលតម្រូវឲ្យក្រុមហ៊ុនដែលទិញប័ណ្ណធានារ៉ាប់រងជម្ងឺឲ្យបុគ្គលិក ត្រូវបានពន្យារទៅឲ្យអនុវត្តនៅឆ្នាំ ២០១៥ ដោយសារលោកអូបាម៉ាមើលឃើញថា ក្រុមហ៊ុននៅអាមេរិកនៅមិនទាន់អាចទទួល អនុវត្តបាន។ ប៉ុន្តែ បក្សសាធារណរដ្ឋ ជាពិសេសក្រុមមកពីអភិរក្សនិយម Tea Party បានស្បថហើយថា នឹងបន្តប្រឆាំងមិនឲ្យច្បាប់ទាំងមូលអាចចេញបាន។ ក្រុមសាធារណរដ្ឋប្រចាំរដ្ឋខ្លះបានបដិសេធហើយថា នឹងមិនពង្រីកជំនួយMedicaid ទៅតាមការស្នើក្នុងច្បាប់នោះទេ។ Medicaid ដែលចេញមកពីថវិការបស់រដ្ឋនីមួយៗ សំដៅជួយផ្នែកសុខភាពរបស់ប្រជាជនក្រីក្រ ដែលពួកគេមានចំនួនប្រមាណ៨លាននាក់ នៅក្នុងរដ្ឋដែលកាន់កាប់ដោយក្រុមសាធារណរដ្ឋ។
មួយវិញទៀត ដោយសារតែច្បាប់សុខភាពរបស់លោកអូបាម៉ា ពួកក្រុមបក្សប្រឆាំង ដែលមានសំឡេងភាគច្រើន នៅរដ្ឋសភា ថែមទាំងបានបដិសេធមិនធ្វើច្បាប់ផ្តល់ថវិកាដល់រដ្ឋាភិបាល។ ការខ្ទាស់ជើងរបស់បក្សប្រឆាំងបានធ្វើឲ្យនយោបាយថវិការបស់រដ្ឋាភិបាលជាប់គាំង។ បុគ្គលិករដ្ឋត្រូវផ្អាកព្យួរពីការងារដោយគ្មានបានទទួលប្រាក់ខែ។
តាមក្រុមប្រជាធិបតេយ្យ មើលពីសំបកក្រៅ ក្រុមសាធារណរដ្ឋហាក់យកចិត្តទុកដាក់លើសេដ្ឋកិច្ច ប៉ុន្តែ តាមពិត គឺគេចង់វាយបំបាក់នយោបាយរបស់លោកអូបាម៉ាឲ្យចុះទន់ខ្សោយទៅវិញទេ។ មានន័យថា បើគេអាចទាមទារឲ្យលោកអូបាម៉ាបោះបង់ចោល ច្បាប់ធានារ៉ាប់រងសុខភាព នោះពួកគេនឹងមានជ័យជំនះក្នុងការបំបាក់មុខលោកអូបាម៉ា ដែលមិនអាចធានាធ្វើតាមការសន្យារបស់លោក។ ប៉ុន្តែ ក្រុមសាធារណរដ្ឋហាក់កំពុងជាន់កែងខ្លួនឯង ព្រោះថា លោកអូបាម៉ាមិនត្រឹមតែមិនព្រមលះបង់ចោលច្បាប់សុខភាពរបស់លោកទេ ប៉ុន្តែ ថែមទាំងទម្លាក់កំហុស ទៅលើក្រុមប្រឆាំងថា ជាអ្នកធ្វើឲ្យជាប់គាំងថវិកាលើកនេះ។ ប្រជាជនអាមេរិកភាគច្រើនក៏ចែករំលែកគំនិតជាមួយលោកប្រធានាធិបតីដែរ។ ដូច្នេះ មើលទៅ ក្រុមប្រឆាំងដែលទទួលអប្រជាប្រិយភាព អាចនឹងបាត់បង់សំឡេង នៅក្នុងការបោះឆ្នោតជ្រើសតាំងសមាជិករដ្ឋសភា នៅឆ្នាំក្រោយនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ