អាមេរិក៖ក្រុមសាធារណរដ្ឋបន្តខ្ទាស់ជើងក្រុមប្រជាធិបតេយ្យជុំវិញថវិកា និងពន្យារការអនុវត្តន៍ច្បាប់ « Obamacare »
ចុះផ្សាយនៅថ្ងៃ៖
ស្តាប់ - ០៦:០៥
នៅសហរដ្ឋអាមេរិក សង្រ្គាមប៉ាកកាកំពុងបន្តមានរវាងគណបក្សសាធារណរដ្ឋ និងគណបក្សប្រជាធិបតេយ្យរបស់លោកប្រធានាធិបតីអូបាម៉ាជុំវិញច្បាប់ថវិកា និងច្បាប់ស្តីពីកំណែទម្រង់ប្រព័ន្ធសុខាភិបាលក្រោមឈ្មោះថា « Obamacare »។ នៅរាត្រីយប់ថ្ងៃសៅរ៍ ទី២៨ ឆ្លងចូលថ្ងៃអាទិត្យ ទី២៩ កញ្ញានេះ សភាបានបោះឆ្នោតច្បាប់ថវិកាបណ្តោះអាសន្នមួយដោយអនុញ្ញាតឲ្យរដ្ឋបាលរបស់លោកអូបាម៉ាអាចបន្តការងាររហូតដល់ថ្ងៃទី១៥ ខែធ្នូ។ ទន្ទឹមគ្នានេះ សភាក៏បានបោះឆ្នោតពន្យារពេល ១ឆ្នំា សម្រាប់ការអនុវត្តន៍ច្បាប់កំណែទម្រង់ប្រព័ន្ធសុខាភិបាល « Obamacare » ព្រមទំាងលុយចោលការយកពន្ធថ្មីលើគ្រឿងបរិក្ខារពេទ្យ។
ច្បាប់ថវិកានៅអាមេរិក ក៏មិនខុសពីច្បាប់ថវិកានៅក្នុងប្រទេសផ្សេងទេ។ ដើម្បីឲ្យរដ្ឋាភិបាលអាចធ្វើការចំណាយលើសេវាផ្សេងៗរបស់ខ្លួនបាន ដូចជាការបើកប្រាក់ខែឲ្យមន្រ្តីរដ្ឋការ រដ្ឋាភិបាលត្រូវតែរៀបចំកញ្ចប់ថវិកាមួយ រួចដាក់ឲ្យសភាអនុម័ត។ បើគណបក្សកាន់អំណាចមានសម្លេងភាគច្រើននៅក្នុងសភា ការបោះឆ្នោតអាចនឹងធ្វើឡើងដោយរលូន ដោយគ្មានឧបសគ្គ។ តែបើសម្លេងភាគច្រើនជារបស់គណបក្សប្រឆំាង វានឹងអាចជួបបញ្ហា ដោយចៀសមិនរួច។
នេះជាអ្វីដែលបាននឹងកំពុងកើតមាននៅសហរដ្ឋអាមេរិក ព្រោះចូរកុំភ្លេចថា គណបក្សប្រជាធិបតេយ្យរបស់លោកអូបាម៉ាមានសម្លេងភាគច្រើននៅព្រឹទ្ធសភា តែមានសម្លេងភាគតិចនៅរដ្ឋសភា។ ថវិកាបានក្លាយជារឿងមួយដែលរដ្ឋបាលរបស់លោកអូបាម៉ាបានជួបម្តងហើយកាលពី ២ឆ្នំាមុន ដែលហៀបនឹងធ្វើឲ្យអាមេរិកក្ស័យធន។ ការប្រទាញប្រទង់គ្នារវាងគណបក្សកាន់អំណាច និងគណបក្សប្រឆំាងជុំវិញរឿងថវិកាបានជាប់ទាក់ទងខ្លំាងនឹងរឿងកម្រិតប្រាក់បំណុល។ លោកអូបាម៉ាបានសុំឲ្យតម្លើងកម្រិតប្រាក់បំណុលដើម្បីអាចឲ្យអាមេរិកអាចខ្ចីលុយគេចាយបន្ថែមទៀត តែបក្សប្រឆំាងមិនព្រម ដោយបានស្នើឲ្យលោកអូបាម៉ាកាត់បន្ថយការចំណាយលើផ្នែកដែលមិនចំាបាច់។
គួរជម្រាបជូនថា អាមេរិក ក៏មិនខុសពីប្រទេសផ្សេងដែរ គឺមានជាប់ជំពាក់បំណុលគេដូចគ្នា តែជាបំណុលមួយដែលច្បាប់បានអនុញ្ញាត មានន័យថា រដ្ឋបាលរបស់លោកអូបាម៉ាអាចបន្តខ្ចីលុយគេមកចាយបន្ថែម ដោយបង្កើតប្រាក់បំណុលបាន តែមិនត្រូវឲ្យប្រាក់បំណុលនោះកើនលើសចំនួនអនុម័តដោយច្បាប់ទេ ពោលមិនលើសពីចំនួន ១៦ ៧០០ ០០០លានដុល្លារ។
រដ្ឋបាលលោកអូបាម៉ាមានលុយចាយត្រឹមថ្ងៃទី១៥ ធ្នូ ឆ្នំា ២០១៣
កញ្ចប់ថវិកាចាស់នឹងត្រូវចប់ត្រឹមថ្ងៃទី១ តុលាខាងមុខ មានន័យថា បើគ្មានច្បាប់ថវិកាថ្មីទេ រដ្ឋបាលរបស់លោកអូបាម៉ានឹងត្រូវអស់លុយចាយត្រឹមថ្ងៃទី១ តុលាម៉ោង ១២អាធ្រាត្រ។ តែនៅយប់មិញ សភាបានអនុម័តកញ្ចប់ថវិកាថ្មីមួយបណ្តោះអាសន្នដែលនឹងអនុញ្ញាតឲ្យរដ្ឋបាលអាមេរិកអាចបន្តការចំណាយរបស់ខ្លួនរហូតដល់ទៅថ្ងៃទី១៥ ធ្នូ ឆ្នំា ២០១៣។ តែនៅក្រោយថ្ងៃទី១៥ ធ្នូ បើគណបក្សប្រជាធិបតេយ្យ និងគណបក្សសាធារណរដ្ឋនៅតែនិយាយមិនចុះសម្រុងគ្នាជុំវិញច្បាប់ថវិកាថ្មីទេ អាមេរិកនឹងអស់លុយចាយ ព្រមទំាងឈានដល់ការក្ស័យធន។
ក្នុងករណីនេះ ក្រសួងរបស់រដ្ឋមួយចំនួនត្រូវបិទទ្វារបណ្តោះអាសន្ន និងអាចមានបុគ្គលិករដ្ឋប្រមាណជា ៨០០ ០០០នាក់ផ្អាកធ្វើការងារមួយរយៈ។ កន្លែងសាធារណៈដែលនឹងអាចប៉ះពាល់មានដូចជាសារៈមន្ទីរ សួនឧទ្យាន។ នេះជារូបភាពមួយដែលនឹងធ្វើឲ្យអាមេរិកបាក់មុខ បាក់មាត់យ៉ាងខ្លំាងនៅចំពោះមុខអ្នកទេសចរបរទេស។ មានតែការចំណាយលើផ្នែកខ្លះទេដែលនឹងអាចមានបន្ត ដូចជាសេវាសន្តិសុខជាតិ សវាធានារ៉ាប់រងសង្គម ឬមួយក៏ប្រាក់ខែសម្រាប់អ្នកចូលនិវត្តជាដើម។ លោករដ្ឋមន្រ្តីការពារជាតិ Chuck Hagel ដែលកំពុងធ្វើដំណើរតាមយន្តហោះទៅកូរ៉េខាងជើងបានថ្លែងទិតៀនរិះគន់ទង្វើគ្មានការទទួលខុសត្រូវរបស់ក្រុមអ្នកសាធារណរដ្ឋ និងព្រមានថា នឹងអាចមានបុគ្គលិកស៊ីវិលក្នុងក្រសួងការពារជាតិ ៤០០ ០០០នាក់នឹងត្រូវផ្អាកការងារបណ្តោះអាសន្ន បើមានការបិទក្រសួងមួយចំនួនមែន។
ក្រុមអ្នកសាធារណរដ្ឋបន្តខ្ទាស់ជើងលោកអូបាម៉ាពាក់ព័ន្ធនឹង « Obamacare »
ក្រៅពីរឿងថវិកា គណបក្សប្រឆំាងក៏បានបោះឆ្នោតលុបចោលការយកពន្ធថ្មីលើគ្រឿងបរិក្ខាពេទ្យ និងមិនផ្តល់ថវិកា ព្រមទំាងពន្យារពេលការអនុវត្តន៍ច្បាប់ស្តីពីកំណែទម្រង់ប្រព័ន្ធសុខាភិបាលរបស់លោកអូបាម៉ាដែលមានឈ្មោះថា « Obamacare »។ គម្រោងច្បាប់មួយនេះត្រូវបានលោកអូបាម៉ាសន្យាតំាងតែពីយុទ្ធនាការបោះឆ្នោតលើកដំបូងមកម្ល៉េះ។ ម្យ៉ាងទៀត ច្បាប់នេះក៏បានបង្កឲ្យមានសង្រ្គាមប៉ាកកាយ៉ាងខ្លំាងរវាងរវាងគណបក្សប្រជាធិបតេយ្យ និងគណបក្សសាធារណរដ្ឋ។ កាលពីឆ្នំា ២០១០ ច្បាប់នេះត្រូវបានសភាអនុម័ត និងគ្រោងដាក់ឲ្យអនុវត្តពីថ្ងៃទី១ តុលាខាងមុខនេះទៅ។ តែស្រាប់នៅយប់មិញ សភាបានធ្វើវិសោធនកម្មដោយបានបោះឆ្នោតពន្យារពេល ១ឆ្នំា សម្រាប់ការអនុវត្តន៍។ តែព្រឹទ្ធសភា និងរូបលោកអូបាម៉ាផ្ទាល់បានព្រមានទុកជាមុនរួចជាស្រេចថា នឹងបោះឆ្នោតប្រឆំាងមិនទទួលយកទេ។
សូមជម្រាបជូនថា កម្មវត្ថុរបស់លោកអូបាម៉ាក្នុងការបង្កើតឲ្យមានច្បាប់នេះឡើង គឺដើម្បីអនុញ្ញាតឲ្យពលរដ្ឋអាមេរិកំាងរាប់លាននាក់អាចទទួលបានសេវាធានាសុខភាពពីរដ្ឋ។ បច្ចុប្បន្ននៅអាមេរិក មានពលរដ្ឋពី៤៨ ទៅ ៥០លាននាក់ ពោលគឺជិត ១៦% នៃពលរដ្ឋសរុប មិនបានទទួលសេវាធានាសុខភាពពីរដ្ឋទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ