ហេតុអ្វីបានជាការកែប្រែច្បាប់ថាមពលត្រូវគេចាត់ទុកជាការក្បត់ជាតិ នៅម៉ិចស៊ិក
ចុះផ្សាយនៅថ្ងៃ៖
ស្តាប់ - ០៤:៣៤
ប្រទេសម៉ិចស៊ិកបានធ្វើកំណែទម្រង់ជាប្រវត្តិសាស្រ្តមួយ។ កាលពីយប់ថ្ងៃពុធកន្លងទៅ សភាម៉ិចស៊ិកបានបោះឆ្នោតយល់ព្រមឲ្យគេកែប្រែច្បាប់គ្រប់គ្រងវិស័យថាមពលរបស់ប្រទេស ដែលនឹងបើកផ្លូវក្រុមហ៊ុនឯកជន និងបរទេសចូលវិនិយោគនៅក្នុងវិស័យប្រេង នៅម៉ិចស៊ិក។ បក្សឆ្វេងនិយមបានប្រឆាំង យ៉ាងដាច់ខាត មិនចង់ឲ្យគេសើរើច្បាប់ដ៏ចម្រូងចម្រាស។
នៅក្នុងប្រទេសម៉ិចស៊ិក អាជីវកម្មចម្រាញ់យកប្រេងធ្វើឡើងដោយក្រុមហ៊ុនរដ្ឋ។ តាំងពី៧៥ឆ្នាំមកហើយ រដ្ឋជាម្ចាស់គ្រប់គ្រង និងធ្វើអាជីវកម្មប្រេងតែម្នាក់ឯង ដោយមិនមានការចូលរួមពីវិស័យឯកជន ឬក្រុមហ៊ុនបរទេស។ ជាក់ស្តែងណាស់ កាលពីឆ្នាំ ១៩៣៨ រដ្ឋាភិបាលប្រទេសនេះ បានបណ្តេញក្រុមហ៊ុនបរទេសឯកជន ដូចជារបស់អាមេរិក និងអង់គ្លេស ឲ្យឈប់ធ្វើអាជីវកម្មប្រេង នៅម៉ិចស៊ិក។ នៅឆ្នាំនោះ រដ្ឋាភិបាលម៉ិចស៊ិកបានបង្កើតច្បាប់ ធ្វើជាតូបនីយកម្មលើវិស័យថាមពលទាំងមូល នៅម៉ិចស៊ិក ដោយមកពីខ្លាចថា ជនបរទេសលួចយកប្រេង និងឧស្ម័នរបស់ប្រជាជនម៉ិចស៊ិក។
ប៉ុន្តែ ជាង៧០ឆ្នាំ ស្ថានភាពបានប្រែប្រួល។ ប្រធានាធិបតីម៉ិចស៊ិកបច្ចុប្បន្ន គឺលោកEnrique Pena Nieto ចង់ធ្វើកំណែទម្រង់សេដ្ឋកិច្ច របស់ប្រទេស ដើម្បីឈានទៅរកការស្មើមុខ ស្មើមាត់ជាមួយប្រេស៊ីល ដែលជាធំទីមួយ នៅអាមេរិកឡាទីន។ ដើម្បីធ្វើកំណែទម្រង់សេដ្ឋកិច្ច លោកបានផ្តួចផ្តើមគំនិតគេកែប្រែជំពូកជាច្រើននៅក្នុងច្បាប់គ្រប់គ្រងថាមពល ដែលជាគន្លឹះសំខាន់សម្រាប់អភិវឌ្ឍន៍សេដ្ឋកិច្ច។ គណបក្សធំៗបី ដែលនៅក្នុងនោះ មានគណបក្សកាន់អំណាចបានគំាទ្រការផ្តួចផ្តើមរបស់លោកប្រធានាធិបតី បន្ទាប់ពីគេបានធ្វើការសង្កេតឃើញដូចគ្នាមួយ។ នោះ គឺម៉ិចស៊ិកមិនបានកេងចំណេញឲ្យអស់លទ្ធភាពពីប្រេង និងឧស្ម័នដែលខ្លួនមាន។
មួយវិញទៀត បើទោះបីជារដ្ឋបានបង្កើនថវិការហូតដល់២០ពាន់លានដុល្លារ ក្នុងមួយឆ្នាំ ដើម្បីធ្វើអាជីវកម្មប្រេង ក៏ក្រុមហ៊ុនប្រេងរដ្ឋ Pemexមិនអាចរកប្រាក់ចំណេញបាន។ ផ្ទុយទៅវិញ ក្នុងរយៈពេល៥ឆ្នាំចុងក្រោយនេះ រដ្ឋបានខាតបង់លុយអស់៣០ពាន់លានដុល្លារ។ ខាតបង់ ដោយសារតែមកពីក្នុងរយៈពេល១០ឆ្នាំចុងក្រោយនេះ ការផលិតប្រេងបានធ្លាក់ចុះគួរឲ្យកត់សំគាល់។ កាលពីឆ្នាំ ២០០៤ ម៉ិចស៊ិកអាចផលិតប្រេងបាន៣លាន ៥សែនធុងក្នុងមួយថ្ងៃ ប៉ុន្តែ បច្ចុប្បន្ននេះ មានតែប្រេងប្រមាណតែ ជាង២លានធុងប៉ុណ្ណោះ ដែលម៉ិចស៊ិកផលិតបានក្នុងមួយថ្ងៃ។
តាមរដ្ឋាភិបាល ម៉ិចស៊ិកនៅមានសំបូរមាសខ្មៅច្រើនដែលគេមិនទាន់បានធ្វើអាជីវកម្ម។ ក្រុមហ៊ុនរដ្ឋPemex តែឯងគ្មានលទ្ធភាព និងសមត្ថភាពដើម្បីស្រូបយកឲ្យអស់ធនធានដែលម៉ិចស៊ិកមានទេ។ តាមរដ្ឋមន្រ្តីថាមពលម៉ិចស៊ិក ការរុករកអណ្តូងប្រេងថ្មីៗ និងប្រតិបត្តិការបូមយកប្រេងពីបាតសមុទ្រដ៏ជ្រៅ នៅសមុទ្រម៉ិចស៊ិក មានតម្លៃថ្លៃ និងប្រថុយប្រថានខ្លាំងណាស់។ ដូច្នេះ ជាចាំបាច់ គេត្រូវការការចូលរួមវិនិយោគពីឯកជន និងក្រុមហ៊ុនបរទេស ដែលនឹងនាំមកឲ្យម៉ិចស៊ិកទាំងទុន និងបច្ចេកវិទ្យា។ ប្រសិនបើ អ្វីៗប្រព្រឹត្តទៅដោយរលូន ទៅតាមផែនការរបស់រដ្ឋាភិបាល នោះ គេសង្ឃឹមថា ម៉ិចស៊ិកនឹងអាចផលិតប្រេងបានច្រើនដូចមុន ពោលគឺត្រលប់ទៅអាចផលិតបានជាង៣លាន ៥សែនធុង ក្នុងមួយថ្ងៃ គឺដូចកាលពីឆ្នាំ ២០០៤វិញ។
មតិភាគច្រើន គាំទ្រ ឲ្យមានការកែប្រែច្បាប់ដើម្បីអនុញ្ញាត បើកដៃឲ្យក្រុមហ៊ុនឯកជន និងបរទេសចូលលូកដៃក្នុងអាជីវកម្មប្រេង ព្រោះគេបានឃើញប្រយោជន៍ ក្រោយកំណែទម្រង់លើកនេះ។ ម៉ិចស៊ិកជាប្រទេសធំទីពីរនៅអាមេរិកឡាទីន និងជាប្រទេសធំទី១០ក្នុងពិភពលោកខាងផលិតប្រេង ប៉ុន្តែ ម៉ិចស៊ិកមានប្រជាជនពាក់កណ្តាលដែលស្គាល់គ្រោះអត់ឃ្លាន។ កំណែទម្រង់រំញោចសេដ្ឋកិច្ច ជារឿងខានមិនបាន សម្រាប់រដ្ឋាភិបាល ប៉ុន្តែ យ៉ាងណាក៏ដោយ កំណែទម្រង់ដែលបើកដៃឲ្យក្រុមហ៊ុនឯកជន និងបរទេសចូលធ្វើអាជីវកម្មប្រេង នៅតែជាគ្រាប់ស្លែងដែលពិបាកសម្រាប់អ្នកជាតិនិយមម៉ិចស៊ិក ជាពិសេស បក្សប្រឆាំង។ សម្រាប់ប្រជាជនម៉ិចស៊ិក វាជាមោទនភាពជាតិមួយខ្ពស់ ដែលអាជីវកម្មប្រេង និងឧស្ម័នស្ថិតនៅក្រោមការគ្រប់គ្រងរបស់រដ្ឋ។ ក្រុមបក្សប្រឆាំងបានប្តេជ្ញាហើយថា នឹងបន្តប្រមូលប្រជាជនឲ្យធ្វើបាតុកម្ម ប្រឆាំងមិនឲ្យច្បាប់នេះចេញរួចទេ។
លោកប្រធានាធិបតីវិញបានខំប្រឹងបញ្ចុះបញ្ចូលប្រជាជនម៉ិចស៊ិក ដោយបញ្ជាក់ថា ក្រុមហ៊ុនឯកជន និងក្រុមហ៊ុនបរទេសមានសិទ្ធិត្រឹមចូលរួមបូមប្រេង និងលក់ចែកប្រាក់ចំណេញរួម ជាមួយរដ្ឋាភិបាល ប៉ុន្តែ ក្រុមហ៊ុនឯកជនទាំងនោះ គ្មានសិទ្ធិគ្រប់គ្រង និងយកចំណែកប្រេងទៅធ្វើជាកម្មសិទ្ធិផ្តាច់មុខទេ។
កំណែទម្រង់វិស័យថាមពលរបស់ម៉ិចស៊ិកនៅមានដំណើរវែងឆ្ងាយទៀត។ សភាទាំងពីរថ្នាក់បានបោះឆ្នោតឲ្យគេកែប្រែច្បាប់ឡើងវិញ ប៉ុន្តែ ដើម្បីអាចចេញជារូបរាង ជាផ្លូវការ គេចាំបាច់ត្រូវការសំឡេងគំាទ្រពី ថ្នាក់ដឹកនាំសហព័ន្ធចំនួន ១៧ ក្នុងចំណោមសហព័ន្ធ៣២ នៅម៉ិចស៊ិក។ ប្រសិនបើរដ្ឋាភិបាលម៉ិចស៊ិកសម្រេចបានជោគជ័យក្នុងការកែប្រែច្បាប់ថាមពល នោះ គេវាយតម្លៃថា ម៉ិចស៊ិកនឹងទាញផលចំណេញបានច្រើនពីប្រេង និងឧស្ម័ន។ ប្រាក់ចំណេញពីវិស័យនេះនឹងមានចំនួនលើសទុនវិនិយោគបរទេស និងជំរុញសេដ្ឋកិច្ចម៉ិចស៊ិកឲ្យបោះលឿនទៅមុខ ទៅប្រជែងជាមួយប្រេស៊ីល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ