ទស្សនកិច្ចរបស់លោកអូបាម៉ានៅម៉ិចស៊ិកផ្តោតសំខាន់លើពាណិជ្ជកម្ម
លោកប្រធានាធិបតីអាមេរិកអូបាម៉ាផ្តើមទស្សនកិច្ចរយៈពេល ២៤ម៉ោងនៅក្នុងប្រទេសម៉ិចស៊ិកក្នុងថ្ងៃព្រហស្បតិ៍ ទី២ ឧសភានេះ។ លោកអូបាម៉ានឹងត្រូវទទួលជួបដោយលោកប្រធានាធិបតីម៉ិចស៊ិក Enrique Pena Nieto ដែលទើបឡើងកាន់តំណែងនាពេលថ្មីៗនេះ។ ប្រមុខរដ្ឋម៉ិចស៊ិកដែលបានទុកយុទ្ធនាការប្រឆំាងឧក្រិដ្ឋកម្មរៀបចំទុកមុនថា ជាអាទិភាពមួយក្នុងចំណោមអាទិភាពផ្សេងទៀតក្នុងអណត្តិរបស់លោក។ ជាការកត់សម្គាល់ ទស្សនកិច្ចរបស់លោកប្រធានាធិបតីអាមេរិកលើកនេះផ្តោតសំខាន់លើកិច្ចសហប្រតិបត្តិការសេដ្ឋកិច្ច និងអន្តោប្រវេសន៍រវាងប្រទេសទំាងពីរ ក្រោយពីបានគិតគូរខ្លំាងពីយុទ្ធនាការប្រយុទ្ធប្រឆំាងនឹងការជួញដូរគ្រឿងញានក្នុងរយៈពេលប៉ុន្មានឆ្នំាចុងក្រោយនេះ។
ចុះផ្សាយនៅថ្ងៃ៖
ស្តាប់ - ០២:៣៤
នេះជាដំណើរទស្សនកិច្ចលើកទី៤ហើយរបស់លោកប្រធានាធិបតីអាមេរិកបារ៉ាក់ អូបាម៉ានៅក្នុងប្រទេសម៉ិចស៊ិក តែជាលើកទី១សម្រាប់លោកប្រធានាធិបតីម៉ិចស៊ិក Enrique Pena Nieto ដែលទើបឡើងកាន់តំណែងនាពេលថ្មីៗនេះ។ អនុរដ្ឋមន្រ្តីនៃទំនាក់ទំនងបរទេសរបស់ម៉ិចស៊ិកទទួលបន្ទុកសំណុំរឿងអាមេរិកខាងជើងបានបញ្ជាក់ថា សហរដ្ឋអាមេរិក និងម៉ិចស៊ិកបានព្រមព្រៀងគ្នាក្នុងការធ្វើឲ្យមានសមភាពនៅលើគ្រប់វិស័យទំាងអស់នៃទំនាក់ទំនងរវាងគ្នា។
តំាងពីឆ្នំា ១៩៩៤ មក ម៉ិចស៊ិក គឺជាប្រទេសដៃគូរបស់សហរដ្ឋអាមេរិក និងប្រទេសកាណាដាក្នុងក្របខណ្ឌនៃកិច្ចព្រមព្រៀងដោះដូរពាណិជ្ជកម្មដោយសេរីនៅអាមេរិកខាងជើង។ ម៉ិចស៊ិក គឺជាអតិថិជនសំខាន់ជាងគេ និងជាប្រទេសផ្គត់ផ្គង់ទី៣របស់សហរដ្ឋអាមេរិក។ ជារៀងរាល់ឆ្នំា ការដោះដូរពាណិជ្ជកម្មរវាងទីក្រុងវ៉ាស៊ីនតោន និងម៉ិចស៊ិកកូមានទឹកប្រាក់ប្រមាណជា ៥០០ ០០០លានដុល្លារ។ តែលោកអូបាម៉ា និងលោក Enrique Pena Nieto មានបំណងចង់បង្កើនបន្ថែមទៀតនូវទំនាក់ទំនងរវាងគ្នា។
លោកប្រធានាធិបតីអាមេរិកបានបញ្ជាក់ថា នៅក្នុងអតីតកាល អាមេរិក និងម៉ិចស៊ិកបានផ្តោតសំខាន់តែបញ្ហាសន្តិសុខរវាងគ្នាតែប៉ុណ្ណោះ និងបានភ្លេចចោលទំាងស្រុងពីសក្តានុពលសេដ្ឋកិច្ចដែលមានរវាងគ្នា។ យោងតាមលោកអូបាម៉ា នៅមានវិស័យជាច្រើនទៀតដែលប្រទេសទំាងពីរអាចធ្វើការដោះដូរជាមួយគ្នាបាន ពិសេសគឺការងារ។ ក៏ប៉ុន្តែ មានក្រុមអង្គការការពារសិទ្ធិមនុស្សក្នុងស្រុកជាច្រើនមិនបានយល់ឃើញយ៉ាងដូច្នេះទេ។ អាទិភាពទីមួយដែលពួកគេ គឺបញ្ហាអសន្តិសុខនៅតាមបណ្តាយព្រំដែនរវាងប្រទេសទំាងពីរ។
យោងតាមតួលេខផ្លូវការផ្តល់ដោយអង្គការការពារសិទ្ធិមនុស្ស Amnesty International នៅម៉ិចស៊ិកឲ្យដឹងថា ក្នុងរយៈពេលប៉ុន្មានឆ្នំាចុងក្រោយនេះ ការរត់ពន្ធគ្រឿងសព្វាវុធប្រមាណជា ៧០% ដែលរដ្ឋអំណាចម៉ិចស៊ិកបានរឹបអូសបាន គឺមកពីសហរដ្ឋអាមេរិក។ សម្រាប់ Amnesty International គឺអាវុធទំាងអស់នេះហើយដែលបានបង្កឲ្យមានអំពើហិង្សា និងអសន្តិសុខជារៀងរាល់ថ្ងៃនៅក្នុងប្រទេសម៉ិចស៊ិក។
ក្រៅពីលើកឡើងនូវបញ្ហាការជួញដូរអាវុធ លោកប្រធានាធិបតីអាមេរិកក៏ចង់ដឹងអំពីយុទ្ធសាស្រ្តរបស់លោកប្រធានាធិបតីម៉ិចស៊ិកក្នុងការប្រយុទ្ធប្រឆំាងនឹងការជួញដូរគ្រឿងញានដែរ។ លោកប្រធានាធិបតីម៉ិចស៊ិកបច្ចុប្បន្នធ្លាប់បានបង្ហាញភាពមិនសប្បាយចិត្តចំពោះយុទ្ធសាស្រ្តប្រឆំាងនឹងការជួញដូរគ្រឿងញានរបស់អតីតប្រធានាធិបតី។ យុទ្ធសាស្រ្តដែលរៀបចំ និងចំណាយមួយភាគធំដោយក្រសួងស៊ើបការសំងាត់អាមេរិកំាង CIA ឬមួយក៏ DEA តែទទួលបានលទ្ធផលគួរឲ្យខកចិត្ត។ គ្រាន់តែក្នុងរយៈពេល ៦ឆ្នំា សង្រ្គាមប្រឆំាងនឹងការជួញដូរគ្រឿងញានបានបណ្តាលឲ្យស្លាប់មនុស្សប្រមាណជា ៧០ ០០០នាក់។ នេះហើយគឺជាក្តីបារម្ភរបស់លោកអូបាម៉ា ដោយលោកបារម្ភខ្លាចបញ្ហាអសន្តិសុខឆ្លងរាលដាល់ដល់ទឹកដីអាមេរិកំាង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ