ប្រទេសចំនួន៦ នៅអាមេរិកឡាទីនមានមេដឹកនាំជាមនុស្សស្រី
ចុះផ្សាយនៅថ្ងៃ៖
ស្តាប់ - ០៤:១៦
ឈីលីបានក្លាយជាប្រទេសទី៦ នៅអាមេរិកឡាទីន ដែលមានមេដឹកនាំជាមនុស្សស្រី។ កាលពីថ្ងៃអង្គារសប្តាហ៍មុន លោកស្រី Michelle Bachelet បានស្បថចូលកាន់តំណែងជាប្រធានាធិបតីឈីលី បន្ទាប់ពីបានឈ្នះឆ្នោត កាលពីពាក់កណ្តាលខែធ្នូកន្លងទៅ។ ឈីលី ប្រេស៊ីល អាហ្សង់ទីន ដែលមានសេដ្ឋកិច្ចលូតលាស់ជាងគេ នៅអាមេរិកឡាទីនសុទ្ធតែមានមេដឹកនាំជាមនុស្សស្រី។ តើមេដឹកនាំជាស្រ្តី នឹងជួយធ្វើឲ្យស្ថានភាពស្រ្តីនៅអាមេរិកឡាទីនបានល្អប្រសើរដែរឬទេ?
ប្រេស៊ីល និងអាហ្សង់ទីន ដែលមានសេដ្ឋកិច្ចរីកលូតលាស់ជាងគេនៅតំបន់អាមេរិកឡាទីន កំពុងស្ថិតនៅក្រោមការដឹកនាំរបស់ប្រធានាធិបតីស្រី។ ឈីលីក្នុងនាមជាប្រទេសដែលមានសេដ្ឋកិច្ចរីកលូតលាស់ទី៦ ទើបបានចូលរួមជាថ្មី ជាមួយប្រេស៊ីល និងអាហ្សង់ទីន និងប្រទេសបីផ្សេងទៀត នៅអាមេរិកឡាទីន។ ប៉ុន្តែ គេមិនត្រូវភ័ន្តច្រលំ ចាញ់បោករូបភាពបន្លំភ្នែកទេ។ នៅពីក្រោយរូបភាពល្អៗ ដែលបង្ហាញថា មនុស្សស្រីបានឈានចូលកាន់តំណែងជាប្រមុខរដ្ឋ ចំនួនមនុស្សស្រី តែមានតិចនៅឡើយ នៅក្នុងឆាកនយោបាយ និងក្នុងតំណែងគន្លឹះ សំខាន់ៗ ទាំងនៅក្នុងរដ្ឋាភិបាល និងតាមក្រុមហ៊ុនឯកជន។
យោងតាមគណៈកម្មការសេដ្ឋកិច្ចដើម្បីអាមេរិកឡាទីន របស់អង្គការសហប្រជាជាតិ ស្រ្តីសមាជិកសភា ជារដ្ឋមន្រ្តី និងជាចៅក្រម តំណាងឲ្យ២៦ភាគរយប៉ុណ្ណោះ នៅពេលតំណែងសល់ពីនេះ ត្រូវកាន់កាប់ដោយមនុស្សប្រុស។
រហូតមកដល់ពេលនេះ មានប្រទេស១៣ នៅក្នុងតំបន់ដែលបង្កើតច្បាប់ កំណត់ចំនួនចូលរួមរបស់មនុស្សស្រី នៅក្នុងបក្សនយោបាយ។ ការខ្វះឆន្ទះនយោបាយ លាយផ្សំនឹងលេសគោរពទំនៀមទម្លាប់ប្រពៃណីរបស់ថ្នាក់ដឹកនាំបុរស ធ្វើឲ្យមនុស្សស្រីនៅតែស្ថិតនៅក្រៅសៃង្វៀននយោបាយ។ ឧទាហរណ៍ នៅប្រទេសពេរ៉ូ រដ្ឋាភិបាលនៅតែគិតថា តំណែងរដ្ឋមន្រ្តីសេដ្ឋកិច្ច ដែលជាហោប៉ៅរបស់ប្រទេស ត្រូវតែកាន់កាប់ដោយមនុស្សប្រុស។
នៅអាមេរិកឡាទីន មនុស្សស្រី៥នាក់ ក្នុងចំណោម១០នាក់ត្រូវរស់នៅក្រៅរង្វង់ទីផ្សារការងារ។ នៅពេលបានចូលក្នុងទីផ្សារការងារហើយ ចំនួន មនុស្សស្រីរងគ្រោះបាត់បង់ការងារធ្វើទៅវិញ ច្រើនជាងមនុស្សប្រុស។
បើសិនអាមេរិកឡាទីនមិនសូវអំណោយផលដល់ស្រ្តី ហេតុអ្វីបានជាប្រទេសកាន់តែច្រើន នៅអាមេរិកឡាទីនអាចចូលកាន់តំណែងជាប្រមុខដឹកនាំប្រទេសយ៉ាងដូច្នេះ? តាមអ្នកជំនាញ ស្រ្តីមេដឹកនាំខាងលើអាចចូលដឹកនាំប្រេស៊ីល អាហ្សង់ទីន ហ្សាម៉ាអ៊ីក ឬឈីលីបាន មិនមែនមកពីគេប្រើហេតុផលថា ពួកគេជាមនុស្សស្រី ដែលអ្នកនយោបាយលើកស្ទួយនោះទេ ប៉ុន្តែ មកពីកេរ្តិ៍ឈ្មោះ វង្សត្រកូលគ្រួសារ ដែលជាអ្នកនយោបាយ និងមកពីលក្ខណៈសម្បត្តិដឹកនាំផ្ទាល់របស់ពួកគេ។ លោកស្រីប្រធានាធិបតីប្រេស៊ីល ឌីលម៉ា រ៉ូស្សែហ្វ ធ្លាប់ជាប់ពន្ធនាគារ និងធ្លាប់ចូលរួមក្នុងចលនាទ័ពព្រៃ ប្រឆាំងរបបផ្តាច់ការ។ លោកស្រីប្រធានាធិបតីMichelle Bachelet ក៏ធ្លាប់ចូលរួមចលនារំដោះជាតិដើម្បីប្រឆាំងនឹងរបបផ្តាច់ការពីណូស្ហេនៅឈីលី។ លើកលែងតែលោកស្រីប្រធានាធិបតីអាហ្សង់ទីន ដែលចូលកាន់តំណែង បន្ទាប់ពីស្វាមីលោកស្រី ដែលធ្លាប់ជាប្រធានាធិបតីអាហ្សង់ទីនទទួលមរណភាព។ ប៉ុន្តែ ដោយមកពីចរិក និងលក្ខណៈបុគ្គលរឹងមាំដែលធ្វើឲ្យលោកស្រី Cristina Kirchner ជាប់ឆ្នោតធ្វើជាប្រធានាធិបតីសម្រាប់អាណត្តិទីពីរ។
ម្យ៉ាងទៀត គេមិនត្រូវគិតថា នៅពេលស្រ្តីដឹកនាំប្រទេសមួយ នោះ ស្ថានភាព លក្ខខណ្ឌរបស់មនុស្សស្រី នឹងល្អប្រសើរ។ គេរឹតតែមិនប្រាកដទៅទៀតថា មនុស្សស្រ្តីចូលកាន់អំណាចដើម្បីកែលម្អ ទាមទារសិទ្ធិឲ្យមនុស្សស្រ្តីនោះ។ មិនមែនគ្រប់មេដឹកនាំស្រីទាំងអស់សុទ្ធតែគាំទ្របុព្វហេតុមនុស្សស្រីទេ។ ជាក់ស្តែង នៅក្នុងករណីអាហ្សង់ទីន។ លោកស្រីប្រធានាធិបតីCristina Kirchner ជាមេដឹកនាំអភិរក្សនិយម ដែលប្រឆាំងដាច់ខាត មិនឲ្យមនុស្សស្រីពន្លូតកូន។ នៅឈីលី រដ្ឋាភិបាលក៏ធ្វើច្បាប់ហាមឃាត់ការពន្លូតកូននេះដែរ ដែលតាមពិត ជាការទាមទាររបស់ស្រ្តីឈីលី ដើម្បីជៀសវាងការលួចធ្វើដោយខុសច្បាប់។ ប៉ុន្តែ ផ្ទុយទៅវិញ នៅប្រទេសបុរសនិយម ដែលដឹកនាំដោយមនុស្សប្រុស ដូចជានីការ៉ាហ្គ័រ ការពន្លូតកូន និងការរៀបអាពាហ៍ ពិពាហ៍រវាងមនុស្សភេទដូចគ្នា ត្រូវបានអនុញ្ញាតធ្វើដោយច្បាប់។
យ៉ាងណាក៏ដោយ គេមិនត្រូវមានគំនិតទុទ្ធិដ្ឋិនិយមពេកទេទៅលើការដឹកនាំរបស់មនុស្សស្រី។ នៅអាមេរិកឡាទីន មេដឹកនាំស្រ្តីទាំងអស់មិនប្រាកដថា នឹងមានអំណាចពេញក្នុងដៃទេ។ រដ្ឋាភិបាលជាច្រើន នៅតំបន់អាមេរិកឡាទីន ស្ថិតនៅក្រោមឥទ្ធិពលរបស់វិហារគ្រិស្តសាសនា ដែលភាគច្រើន បានដាក់គំនាបទៅលើរដ្ឋាភិបាល មិនឲ្យធ្វើនយោបាយផ្តល់ប្រយោជន៍ដល់មនុស្សស្រី។
មនុស្សស្រីចូលធ្វើជាមេដឹកនាំប្រទេស កាន់តួនាទីធំដំនៅក្នុងជួររដ្ឋាភិបាល និងបក្សនយោបាយ គឺជាដំណឹងល្អមួយ និងបញ្ជាក់ពីការបោះជំហានទៅមុខរបស់មនុស្សស្រី នៅក្នុងឆាកនយោបាយ ដែលធ្លាប់តែដឹកនាំដោយមនុស្សប្រុស។ វត្តមានរបស់មនុស្សស្រី ក្នុងជួរថ្នាក់ដឹកនាំ គ្រាន់តែជាការចាប់ផ្តើម និងត្រូវការពេលវេលាវែងតទៅទៀត ដើម្បីកែលម្អស្ថានភាពមនុស្សស្រី នៅអាមេរិកឡាទីន ដែលធ្លាប់តែកាន់កាប់ដោយមេដឹកនាំផ្តាច់ការ។ មេដឹកនាំជាមនុស្សស្រី ក៏ជាលទ្ធផលនៃលទ្ធិប្រជាធិបតេយ្យ ដែលអាមេរិកឡាទីនទើបស្គាល់ ក្នុងរយៈពេល៣០ឆ្នាំចុងក្រោយនេះ។ មេដឹកនាំស្រ្តីទាំងនោះ នៅត្រូវការពេលវេលា និងខិតខំប្រឹងប្រែងបន្តទៀត ដើម្បីផ្តល់សំឡេង និងអំណាចដល់មនុស្សស្រីផ្សេងទៀត ដើម្បីឲ្យស្រ្តីចូលរួមកាន់តែច្រើន នៅក្នុងឆាកនយោបាយ ក្នុងតំណែងដែលពួកគេអាចសម្រេចចិត្តដើម្បីផលប្រយោជន៍របស់ស្រ្តី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ