លោកស្រី Dilma Rousseff ជាប់ឆ្នោតជាប្រធានាធិបតីប្រេស៊ីល
លោកស្រីDilma Rousseff អាយុ៦២ឆ្នាំជាបេក្ខនារីនៃគណបក្សពលករ ជាអ្នកស្នងតំណែងបន្តពីលោកប្រធានាធិបតីផុតអាណត្តិ Lula បានទទួលសន្លឹកឆ្នោតគាំទ្រចំនួន៥៦% ឈ្នះលើគូប្រជែងគឺលោកJosé Serra អាយុ៦៨ឆ្នាំនៃគណបក្សសង្គម-ប្រជាធិបតេយ្យដែលបានទទួលសន្លឹកឆ្នោត គាំទ្រចំនួនតែ៤៤%។តុលាការឆ្នោតកំពូលប្រេស៊ីលបានបញ្ជាក់អះអាង តាំងពីល្ងាចថ្ងៃអាទិត្យម្សិលមិញ៣១តុលា ការជ្រើសតាំងស្ត្រីដែលមានភ័ព្វច្រើនណាស់នឹងជាប់ឆ្នោត ប្រធានាធិបតីនៅវគ្គទី២។
ចុះផ្សាយនៅថ្ងៃ៖
សេចក្តីរាយការណ៍របស់ François CARDONA ពីទីក្រុង Rio de Janeiro ប្រែសម្រួលដោយវីនស្តុនរតនា
ជាអតីតយុទ្ធនារីនៃគណបក្សឆ្វេងនិយមជ្រុល លោកស្រីDilma Rousseffអាយុ៦២ឆ្នាំជាស្ត្រីទី១ដែលត្រូវដឹកនាំប្រទេសប្រេស៊ីលក្លាយជាមហាអំណាចសេដ្ឋកិច្ចទី៨លើពិភពលោក។បេក្ខនារីនៃគណបក្សពលករជាគណបក្សឆ្វេងនិយមខ្វះសន្លឹកឆ្នោតតែបន្តិចបន្តួច កាលបោះឆ្នោតនៅវគ្គទី១ថ្ងៃ៣តុលា គឺបានសន្លឹកឆ្នោតគាំទ្រចំនួនតែ៤៧% កុំអីជាប់ឆ្នោតនៅវគ្គទី១ទៅហើយ រីឯគូប្រជែងគាត់នៅវគ្គទី១គឺលោកJosé Serraអាយុ៦៨ឆ្នាំជាអតីតទេសាភិបាលរដ្ឋSao Pauloបានទទួលសន្លឹកឆ្នោតគាំទ្រតែ៣៣%ប៉ុណ្ណោះ។
នៅក្នុងអំឡុងយុទ្ធនាការឃោសនាបោះឆ្នោតជ្រើសរើសប្រធានាធិបតី លោកស្រីDilma Rousseff បានឆ្លៀតឱកាសទាញយកចំណេញពីការគាំទ្រនិងពីប្រជាប្រិយភាពរបស់លោកប្រធានាធិបតីផុតអាណត្តិ Lula da Silva។ អ្នកបោះឆ្នោតសញ្ជាតិប្រេស៊ីលចំនួន១៣៦លាននាក់ត្រូវជ្រើសរើសអ្នកស្នងតំណែងបន្តពីលោកLula ដើម្បីដឹកនាំប្រទេសជាតិតទៅទៀត។
ជាអ្នកទទួលកេរ្តិ៍មរតកបន្តពីលោកLula ជួនកាលត្រូវគេឱ្យឈ្មោះក្រៅថាជាលោកស្រីកណ្តាប់ដៃដែក លោកស្រី Dilma Rousseff បានសន្យាថានឹងផ្តល់កិត្តិយសចំពោះសន្លឹកឆ្នោតជនជាតិប្រេស៊ីលបោះឱ្យគាត់ហើយនិងប្រយុទ្ធកំចាត់ភាពក្រីក្រ។ លោកស្រី Dilma រំភើបចិត្តខ្លាំងណាស់ ក្នុងឋានៈជាស្ត្រីទី១ជាប់ឆ្នោតជាប្រធានាធិបតីប្រេស៊ីល។សកម្មជននៃគណបក្សពលករសប្បាយរីករាយខ្លាំងណាស់ទទួលអបអរសាទរជ័យជំនះ នៅឆ្នេរជលសា Copacabana។
នេះជាសម្រែកអបអរសាទរលោកស្រីប្រធានាធិបតី Dilma របស់បក្សព័ន្ធគាត់ពេញមួយរាត្រីម្សិលមិញ ស្របតាមចង្វាក់របាំប្រជាប្រិយ samba នៅពេលដែកគេចាក់ស្រាផឹកហូរដូចទឹក។លោកស្រី Dilma Rousseff ជាអ្នករដ្ឋការអាយុ៦២ឆ្នាំ ជាស្ត្រីប្រធានាធិបតីប្រេស៊ីលទីមួយ មុនហ្នឹង គាត់ពុំដែលបានជាប់ឆ្នោតសោះ។
ការនេះពុំធ្វើឲ្យនារី victoria ព្រួយបារម្ភទេ victoria បានរាំ samba ជាមួយមិត្រប្រុសខ្លួននៅពីក្រោមដើមត្នោត៖” អំណោយទាននិងសមត្ថភាព គឺជារបស់លោកLula ដែលស្ថិតនៅពីក្រោយលោកស្រី Dilma។ ប្រាកដហើយ លោកស្រី Dilmaពុំដែលបានជាប់ឆ្នោតទេ ប៉ុន្តែគាត់បានធ្វើការនៅក្នុងក្រសួងរដ្ឋមន្ត្រីជាច្រើន។ គាត់មានបទពិសោធន៍ក្នុងជីវិតសាធារណៈ។ គាត់បានប្រុងប្រៀបខ្លួនខ្លាំងណាស់។"
នៅក្នុងហ្វូងមនុស្ស មានយុទ្ធិកជនខ្លះ ដែលការពារពួកអ្នកស្រឡាញ់ភេទដូចគ្នាក៏រាំគ្រវីចង្កេះញ័រញាក់ទទ្រើតដែរ។ ទោះបីជាលោកស្រី Dilma Rousseff ថ្លែងប្រឆាំងនឹងការរំលូតកូនចោលហើយនឹងអាពាហ៍ពិពាហ៍រវាងពួកអ្នកស្រឡាញ់ភេទដូចគ្នាក្តី ក៏នារី Virginia នៅតែមានទំនុកទុកចិត្ត៖” គាត់បានធ្វើការនេះដើម្បីបានជាប់ឆ្នោតហើយក៏បានទទួលសន្លឹកឆ្នោតរបស់អ្នកទាំងអស់គ្នា ទាំងពួកកាតូលិក ទាំងពួកអ្នកអភិរក្សនិយមជ្រុល ប៉ុន្តែគឺលោកស្រី Dilma។ ក៏គឺជាស្រ្តីម្នាក់ដែរ។ ខ្ញុំមានទំនុកទុកចិត្តលើរូបគាត់ ប៉ុន្តែខ្ញុំនឹងពុំរួញរាទេក្នុងការទៅធ្វើបាតុកម្មគាំទ្រពួកអ្នកស្រឡាញ់ភេទដូចគ្នា។"
ទោះជាយ៉ាងណាក្តី គេមានគ្នាច្រើនណាស់ នៅទីនេះក្នុងការនឹកស្តាយស្រណោះលោក Lula ដោយអះអាងថា គេប្រាកដក្នុងចិត្តថា លោក Lulaដាច់ខាតនឹងពុំស្ថិតនៅឆ្ងាយពីលោកស្រីប្រធានាធិបតីថ្មីឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ