មរណៈភាពអតីតកីឡាករប្រដាល់ Mohamed Ali ក្លាយជាសារនយោបាយសំរាប់បេក្ខជនប្រជែងការបោះឆ្នោតប្រធានាធិបតី
ចុះផ្សាយនៅថ្ងៃ៖
ស្តាប់ - ០៤:២៨
កាលពីថ្ងៃសុក្រ ទី៣ មិថុនាសប្តាហ៍មុន នាទីក្រុង Phoenix រដ្ឋ Arizona អតីតជើងឯកប្រដាល់សកលពិភពលោក គឺលោក Mohamed Ali បានទទួលមរណៈភាពក្នុងអាយុ ៧៤ ឆ្នាំ ដោយសារអាការៈផ្លូវដង្ហើម។ និមិត្តរូបអាមេរិកក្នុងសតវត្សទី២០រូបនេះបានលាចាកលោក បន្ទាប់ពីទទួលយាយីដោយសារជម្ងឺ Parkinson អស់រយៈពេល ៣២ ឆ្នាំ។ ភ្លាមៗក្រោយការប្រកាសដំណឹងមរណៈភាពនេះ សារថ្លែងទុក្ខបានប្រកាសជាហូរហែពាសពេញសហរដ្ឋអាមេរិក និងពិភពលោកទាំងមូល។ ឆ្លៀតឱកាសនេះ បេក្ខជនប្រជែងក្នុងការបោះឆ្នោតជ្រើសរើសអ្នកតំណាងបក្សនៅសហរដ្ឋអាមេរិកក៏បានផ្ញើសារព្រមៗគ្នាតែម្តង។ ទន្ទឹមគ្នានេះ ខ្លឹមសារនយោបាយខ្លះក៏មានលក្ខណៈវាយប្រហារដោយប្រយោលលើគូបដិបក្ខរបស់ខ្លួនផងដែរ។
នៅសល់តែបេក្ខជនទាំងបីនាក់ប៉ុណ្ណោះ ដែលកំពុងបន្តយុទ្ធនាការឃោសនានៅឡើយ។ សំរាប់គណបក្សប្រជាធិបតេយ្យ គឺមានលោកស្រី Hillary Clinton និងលោក Bernie Sanders។ ចំណែកគណបក្សសាធារណរដ្ឋវិញ គឺមានតែលោក Donald Trump ម្នាក់ឯងតែប៉ុណ្ណោះ។ ភ្លាមៗក្រោយមរណៈភាពអតីតៈជើងឯកប្រដាល់សកលពិភពលោក គឺលោក Mohamed Ali បេក្ខជនម្នាក់ៗបានថ្លែងសាររំលែកទុក្ខ ដោយក្នុងនោះពួកគេបានបង្អប់អត្ថន័យនយោបាយតាមរបៀបរបស់ពួកគេ។
តាមរយៈគណនីបណ្តាញសង្គម Twitter លោក Donald Trump បានត្រឹមតែលើកយកចំណុចក្នុងវិស័យកីឡាប៉ុណ្ណោះ ដោយពុំមានពាក្យពេចន៍អ្វីក្បោះក្បាយលេចធ្លោដូចរាល់សព្វដងឡើយ។ លោក Trump បានសំដែងការសោកស្តាយចំពោះការបាត់បង់ឥស្សរជនជើងឯកកីឡាប្រដាល់ម្នាក់។ ហើយនេះជាការគួរឲ្យសោកស្តាយសំរាប់គ្រប់មនុស្សទូទៅ។ ចំណែកលោក Bernie Sanders វិញ គាត់បានលើកយកគំរូយុវភាពរបស់អតីតជើងឯកប្រដាល់សកលពិភពលោកផែ្នកទំងន់ធ្ងន់គឺលោក Mohamed Ali ដែលធ្លាប់បានចូលរួមសកម្មភាពតវ៉ាប្រឆាំងនឹងសង្គ្រាមវៀតណាមក្នុងទសវត្សរ៍ទី៦០។
ការថ្លែងសារនយោបាយបែបនេះរបស់លោក Sanders ព្រោះលោកចង់ទាក់ទាញសម្លេងយុវជនឲ្យបានច្រើនថែមទៀត។ បច្ចុប្បន្ននេះ លោកមានសំលេងគាំទ្រច្រើនពីយុវជនគាំទ្របក្សប្រជាធិបតេយ្យ ហើយលោកចង់ឲ្យយុវជនចូលប្រឡូកក្នុងការតស៊ូមតិក្នុងសង្គមបែបនេះកាន់តែច្រើនថែមទៀត។ ផ្ទុយពីបេក្ខជនទាំងពីរនាក់ លោកស្រី Hillary Clinton បានឆ្លៀតឱកាសនេះវាយប្រហារពាក្យសំដីដោយប្រយោលលើគូបដិបក្ខសាធារណរដ្ឋ គឺលោក Donald Trump។ មិនខុសពីសេចក្តីប្រកាសកាលពីប៉ុន្មានថ្ងៃមុន លោកស្រី Clinton បាននិយាយរំលឹកពីភាពវិជ្ជមានក្នុងសង្គមអាមេរិក។
លោកស្រីបានបង្ហាញជំហរមិនយល់ស្របចំពោះយុទ្ធនាការឃោសនាតាមបែបបំភ័យបន្លាចរបស់លោក Donald Trump។ សូមរំលឹកថាកន្លងមក លោក Trump តែងធ្លាប់បង្ហាញទស្សនៈបែបរើសអើងប្រកាន់ពូជសាសន៍ តួយ៉ាងដូចជាបំណងចង់បិទព្រំដែនមិនឲ្យអ្នកកាន់សាសនាអ៊ីស្លាមជាន់ទឹកដីអាមេរិក និងការសាងសង់ជញ្ជាំងតាមបណ្តោយព្រំដែនអាមេរិក-ម៉ិចស៊ិក ដើម្បីទប់ស្កាត់ជនអន្តោប្រវេសន៍ម៉ិចសិកខុសច្បាប់ជាដើម។ ក្នុងសារនយោបាយរបស់ខ្លួន លោកស្រី Hillary Clinton ក៏បានរំលឹកពីប្រវត្តិរបស់លោក Mohamed Ali ។
លោកស្រីចាត់ទុកអតីតជើងឯកប្រដាល់រូបនេះ គឺជាតំណាងការតស៊ូទាមទារយុត្តិធម៌ក្នុងសង្គម ជាពិសេសប្រឆាំងការរើសអើងពូជសាសន៍ពណ៌សម្បុរ និងសាសនា។ លោកស្រី Clinton បានសន្និដ្ឋានថា ទោះបីជា Mohamed Ali បានធំដឹងក្តីនៅក្នុងស្ថានភាពមួយប្រកបទៅដោយភាពវ៉ឹកវរ ប៉ុន្តែសហរដ្ឋអាមេរិកនៅតែជាសង្គមប្រកបដោយភាពសណ្តោសប្រណី និងតែងទុកជម្រើសឲ្យបុគ្គលម្នាក់ៗមានសិទ្ធិកាន់សាសនា និងផ្លាស់ប្តូរនាមត្រកូលតាមចំណង់ចិត្ត។
តើលោក Mohamed Ali ជានរណា? តើគាត់បានតស៊ូមតិលើបញ្ហាអ្វីខ្លះ?
Mohamed Ali បានចាប់កំណើតនាថ្ងៃទី ១៧ មករា ១៩៤២ នៅទីក្រុង Louisville រដ្ឋ Kentucky។ លោកមានឈ្មោះពីកំណើតថា Cassius Clay ក្នុងគ្រួសារអាមេរិកស្បែកខ្មៅដ៏ក្រីក្រមួយ។ លោកមានឱពុកឈ្មោះ Cassius Marcellus Clay Senior មានមុខរបរជាងគំនូរផ្ទាំងឃោសនាពាណិជ្ជកម្ម និងរូបព្រះយេស៊ូ ដែលជាញឹកញយលោកតែងគូរឲ្យដងខ្លួនពណ៌ ស និងភែ្នកពណ៌ខៀវ។ ចំណែកម្តាយរបស់លោកមានឈ្មោះថា Odessa ជាស្រ្តីបំរើកិច្ចការផ្ទះឲ្យពួកអ្នកមានស្បែកស។
អ្នកប្រដាល់រូបនេះត្រូវបានគេស្គាល់នាការប្រកួតអូឡាំពិកទីក្រុងរ៉ូម ប្រទេសអ៊ីតាលី នាឆ្នាំ១៩៦០។ ក្នុងអាយុ ១៨ កីឡាករពុំទាន់មានឈ្មោះបោះសម្លេងរូបនេះបានឈ្នះមេដាយមាស ក្នុងទម្ងន់ធ្ងន់មធ្យមដោយបានផ្តួលគូប្រកួតជាបន្តបន្ទាប់។ ជ័យជំនះអូឡាំពិកនេះបានបើកផ្លូវឲ្យកីឡាកររូបនេះចាប់យកកីឡាប្រដាល់ជាលក្ខណៈអាជីព។ បើទោះបីជាខ្លួនបាននាំមេដាយមាសជូនជាតិមាតុភូមិ គឺសហរដ្ឋអាមេរិក ប៉ុន្តែយុវជនរូបនេះនៅយល់ឃើញថា ខ្លួននៅតែទទួលរងការមើលងាយដោយសារការប្រកាន់ពូជសាសន៍ក្នុងសង្គម។
នាថ្ងៃទី២៥ កុម្ភៈ ១៩៦៤ កីឡាករ Cassius Clay បានក្លាយជាជើងឯកពិភពលោកទំងន់ធ្ងន់ ដោយបានផ្តួលម្ចាស់ខ្សែក្រវ៉ាត់ពិភពលោកគឺកីឡាករ Sonny Liston នាជុំទី៧ ដោយបានវាយបង្កឲ្យគូបដិបក្ខរងរបួសស្មាឆ្វេង ហើយបោះបង់ចោលការប្រកួត។ សំរាប់សារព័ត៌មានអាមេរិក ការប្រកួតនេះមិនត្រឹមតែជាប្រកួតប្រដាល់ធម្មតាប៉ុណ្ណោះទេ ប៉ុន្តែក៏ជាតស៊ូមតិផងដែរ។ ក្នុងឆ្នាំនោះផងដែរ ជើងឯកពិភពលោក Cassius Clay បានប្រកាសឈប់ប្រើនាមត្រកូលនេះ ដោយឲ្យគេហៅខ្លួនថា Cassius X។ កីឡាកររូបនេះយល់ឃើញថា Clay ជាមរតកបន្សល់ទុកពីសម័យទាសភាព ដែលម្ចាស់ស្បែក ស ដាក់នាមត្រកូលបែបនេះឲ្យទាសករស្បែកខ្មៅរបស់ខ្លួន។
ក្រោយពីបានជួបបុគ្គលមួយចំនួន ដែលមានឥទ្ធិពលដល់ការគិតពិចារណារបស់ខ្លួន ជាពិសេសការចូលរួមក្នុងនិកាយសាសនានយោបាយមួយឈ្មោះ Nation of Islam ដឹកនាំដោយបុគ្គលម្នាក់ឈ្មោះ Elijah Muhammad Cassius X បានប្រកាសប្រើឈ្មោះថ្មីផ្លូវការរបស់ខ្លួន គឺ Mohamed Ali ហើយបានតម្រូវអោយគេហៅឈ្មោះថ្មីនេះស្របទៅតាមសាសនាអ៊ីស្លាម ដែលខ្លួនទើបតែប្រកាន់ចាប់យក។ ក្រោយបានក្លាយជើងឯកពិភពលោកជាលើកដំបូងកាលពីឆ្នាំ ១៩៦៤ កីឡាករ Mohamed Ali បានការពារខ្សែក្រវ៉ាត់ជើងឯកដោយជោគជ័យបានចំនួន ៩ លើក។
ប៉ុន្តែ សង្រ្គាមវៀតណាមនាឆ្នាំ១៩៦៦ បានធ្វើឲ្យកីឡាកររូបនេះបាត់បង់ខ្សែក្រវ៉ាត់ជើងឯកពិភពលោក។ មូលហេតុ គឺ Mohamed Ali បានបដិសេធមិនចូលធ្វើទាហានធ្វើសង្គ្រាម ដោយបានលើកអំណះអំណាងថា សាសនាអ៊ីស្លាមហាមឃាត់មិនឲ្យធ្វើសង្គ្រាម។ គេនៅចាំឃ្លាមួយរបស់ Mohamed Ali ដែលបានថ្លែងថា ពួកវៀតកុង គឺជាអាស៊ីស្បែកខ្មៅ ដូចនេះ ខ្លួនមិនទៅធ្វើសង្គ្រាមប្រឆាំងពួកស្បែកខ្មៅឡើយ។ នាថ្ងៃទី ២១ មិថុនា ១៩៦៧ តុលាការបានកាត់ទោសអោយ Mohamed Aliជាប់ពន្ធនាគារចំនួន ៥ ឆ្នាំ និងបង់ប្រាក់ពិន័យ ១ ម៉ឺនដុល្លារ។ ទោះបីជា Mohamed Ali ពុំបានជាប់ឃុំក៏ដោយ ប៉ុន្តែអាជ្ញាធរបានដកខ្សែក្រវ៉ាត់ជើងឯក និងអាជ្ញាប័ណ្ណប្រកួតអាជីញរបស់កីឡាករជើងឯកពិភពលោករូបនេះ។
ដោយគ្មានភ័យខ្លាចទទួលរងសម្ពាធ Mohamed Ali នៅតែរ៉ឹងរូសបន្តការតស៊ូមតិដដែល។ នាឆ្នាំ ១៩៧០ តុលាការបានសម្រេចប្រគល់អាជ្ញាប័ណ្ណប្រកួតអាជីពវិញ។ នាឆ្នាំបន្តបន្ទាប់ កីឡាករ Mohamed Ali បានឡើងប្រកួតលើសៃវៀនប្រដាល់ជាថ្មី ដោយទទួលបានតំណែងជើកពិភពលោកខ្សែក្រវ៉ាត់ WBA និង WBC ជាដើម។ ក្រោយពីបានប្រឡូកប្រដាល់សកលអាជីពអស់រយៈពេល ២១ ឆ្នាំ Mohamed Ali បានប្រកាសចូលនិវត្តន៍ដកខ្លួនចេញពីការប្រកួតនាឆ្នាំ ១៩៨១។ ជាសរុប ក្នុងការប្រដាល់អាជីព Mohamed Ali បានឡើងប្រកួត ៦១ ដងដោយឈ្នះ ៥៦ ដង ក្នុងនោះវាយគូបដិបក្ខឲ្យសន្លប់ ៣៧ ដង ហើយចាញ់តែ ៥ ដងប៉ុណ្ណោះ។
ក្នុងការប្រកួតកីឡាអូឡាំពិកនាទីក្រុងអាត្លង់តា សហរដ្ឋអាមេរិក កាលពីឆ្នាំ១៩៩៦ លោក Mohamed Ali ត្រូវបានអញ្ជើញឲ្យឡើងអុជភ្លើងបើកការប្រកួតផ្លូវការ។ លោកអតីតប្រធានាធិបតីអាមេរិក Bill Clinton នឹងត្រូវអញ្ជើញអោយឡើងថ្លែងសុន្ទរកថានាថ្ងៃទី១០ មិថុនាខាងមុខនេះ ក្នុងពិធីបូជាសព្វលោក Mohamed Ali។ ពិធីនេះនឹងប្រព្រឹត្តទៅនៅស្រុកកំណើតរបស់គាត់នាទីក្រុង Louisville រដ្ឋ Kentucky៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ