អាមេរិក៖លោកស្រីគ្លីនតុនកំពុងស្ទះកណ្តាលផ្លូវ តែលោកត្រាំបានដល់គោលដៅ
នៅសហរដ្ឋអាមេរិក យុទ្ធនាការឃោសនារបស់បេក្ខជនប្រធានាធិបតីតំណាងឲ្យគណបក្សសាធារណរដ្ឋ និងគណបក្សប្រជាធិបតេយ្យសម្រាប់ការបោះឆ្នោតជ្រើសរើសប្រធានាធិបតីនាខែវិច្ឆិកាខាងមុខកំពុងឈានចូលដល់ទីបញ្ចប់។ លោកដូណាល់ ត្រាំបានប្រាប់ឲ្យដឹងនៅថ្ងៃព្រហស្បតិ៍ ទី២៦ ឧសភាថា លោកទទួលបាន ១ ២៣៧ប្រតិភូដែលជាចំនួនគ្រប់គ្រាន់សម្រាប់ឈរឈ្មោះជាបេក្ខជនតំណាងឲ្យគណបក្សសាធារណរដ្ឋ។ តែនៅខាងគណបក្សប្រជាធិបតេយ្យឯណោះវិញ លោកស្រីហ៊ីលឡារី គ្លីនតុនកំពុងជួបឧបសគ្គកណ្តាលផ្លូវ ដោយសារតែរបាយការណ៍របស់ក្រសួងការបរទេសទាក់ទងនឹងរឿងអាស្រូវអ៊ីមែលរបស់លោកស្រី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥០
ប្រហែលជាគ្មានអ្វីអាចរារាំងដំណើរផ្លូវរបស់លោកដូណាល់ ត្រាំឆ្ពោះទៅឈរឈ្មោះជាបេក្ខជនប្រធានាធិបតីតំណាងឲ្យគណបក្សសាធារណរដ្ឋទៀតឡើយ។ លោកដូណាល់ ត្រាំដែលបានកំចាត់គូប្រជែងម្តងម្នាក់ៗទាំង ១៦នាក់នៅក្នុងបក្សបានប្រកាសធានានៅថ្ងៃព្រហស្បតិ៍ ទី២៦ ឧសភាថា លោកទទួលបាន ១ ២៣៧ប្រតិភូដែលជាចំនួនគ្រប់គ្រាន់សម្រាប់ឈរឈ្មោះជាបេក្ខជនប្រធានាធិបតីតំណាងឲ្យគណបក្សសាធារណរដ្ឋសម្រាប់ការបោះឆ្នោតជ្រើសរើសប្រធានាធិបតីថ្មីនាខែវិច្ឆិកាខាងមុខ។
ដោយឡែក និងក្នុងពេលដែលអ្វីៗហាក់ដូចជាមានដំណើរទៅមុខយ៉ាងរលូនសម្រាប់លោកដូណាល់ ត្រាំមកពីគណបក្សសាធារណរដ្ឋ លោកស្រីហ៊ីលឡារី គ្លីនតុនមកពីគណបក្សប្រជាធិបតេយ្យកំពុងជាប់ស្ទះកណ្តាលផ្លូវទៅវិញ។ ជាប់ស្ទះដោយសារតែរឿងរ៉ាវទាក់ទងនឹងអ៊ីមែលផ្ទាល់ខ្លួនដែលលោកស្រីបានប្រើសម្រាប់ទំនាក់ទំនងផ្លូវការក្នុងពេលលោកស្រីកាន់តំណែងជារដ្ឋមន្រ្តីការបរទេស។ បន្ទាប់ពីរបាយការណ៍របស់ក្រសួងការបរទេស រឿងអាស្រូវមួយនេះកំពុងស្ថិតក្រោមការស៊ើបអង្កេតរបស់ក្រសួងស៊ើបការណ៍សម្ងាត់ FBI។
តែលោកស្រីគ្លីនតុនបានថ្លែងថា រឿងអាស្រូវនេះមិនបានធ្វើឲ្យប៉ះពាល់ដល់យុទ្ធនាការឃោសនារបស់លោកស្រីទេ និងថា បណ្តារដ្ឋមន្រ្តីការបរទេសមុនៗក៏ធ្លាប់បានប្រើអ៊ីមែលផ្ទាល់ខ្លួនសម្រាប់កិច្ចការរដ្ឋដែរ។ ក៏ប៉ុន្តែ រឿងអាស្រូវមួយនេះកំពុងធ្វើឲ្យលោកស្រីបាត់បង់ប្រជាប្រិយភាពប្រឈមនឹងគូប្រជែង ពិសេសលោកប៊ែរនី សេនដឺ។ ជាក់ស្តែងនៅក្នុងរដ្ឋ Californie សម្លេងគាំទ្រលោកស្រីគ្លីនតុន និងលោកសេនដឺមានប្រហាក់ប្រហែលគ្នា។
យ៉ាងណាក៏ដោយ ទោះបីជាលោកសេនដឺឈ្នះលោកស្រីគ្លីនតុនក្នុងរដ្ឋ Californie ក៏គ្មានអ្វីអាចរារាំងលោកស្រីឲ្យឈរឈ្មោះជាបេក្ខជនប្រធានាធិបតីសម្រាប់គណបក្សប្រជាធិបតេយ្យទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ