អាមេរិក៖លោកស្រីគ្លីនតុនកំពុងមានសុទិដ្ឋិនិយម លោកត្រាំកំពុងត្រូវបានថ្នាក់ដឹកនាំបក្សមួយចំនួនរត់ចោល
ចុះផ្សាយនៅថ្ងៃ៖
ស្តាប់ - ០៦:៤២
នៅសហរដ្ឋអាមេរិក ការបោះឆ្នោតជ្រើសរើសប្រធានាធិបតីថ្មីនឹងចាប់ផ្តើមនៅថ្ងៃទី៨ វិច្ឆិកាខាងមុខ។ ខណៈនេះ និងក្រោយពីបានជជែកដេញដោលគ្នាជាលើកទី២ នាថ្ងៃអាទិត្យ ទី៩ តុលាមក បេក្ខជនប្រធានាធិបតីទាំងពីររូប គឺលោកស្រីគ្លីនតុនមកពីគណបក្សប្រជាធិបតេយ្យ និងលោកត្រាំមកពីគណបក្សសាធារណរដ្ឋបាន និងកំពុងបន្តយុទ្ធនាការរបស់ខ្លួនយ៉ាងសកម្ម។ តាមលទ្ធផលស្ទង់មតិ លោកស្រីគ្លីនតុនទទួលបានសម្លេងគាំទ្រលើសលោកត្រាំដល់ទៅ ១១%។ ទន្ទឹមគ្នានេះ ក៏មានថ្នាក់ដឹកនាំម្តងម្នាក់ៗក្នុងគណបក្សសាធារណរដ្ឋបានប្រកាសឈប់គាំទ្រលោកត្រាំ។
គិតត្រឹមថ្ងៃចន្ទ ទី១១ តុលានេះ មានសមាជិកសភា និងសមាជិកព្រឹទ្ធសភាក្នុងគណបក្សសាធារណរដ្ឋជិត ៥០រូបបានប្រកាសជាសាធារណៈឈប់គាំទ្រលោកដូណាល់ ត្រាំ ក្នុងនោះ មានទាំងឥស្សរជនកំពូល និងល្បីៗ ដូចយ៉ាងលោក Mitt Romney លោកស្រី Condoleeza Rice និងថ្មីៗចុងក្រោយនាថ្ងៃចន្ទ ទី១០ តុលា គឺលោក Paul Ryan ដែលជាប្រធានរដ្ឋសភា។ លោក Paul Ryan ដែលជាឥស្សរជនម្នាក់មានទម្ងន់នៅក្នុងគណបក្សសាធារណរដ្ឋបានប្រកាសក្លែងៗថា លោកនឹងឈប់ការពារ ឬមួយក៏ឈប់ធ្វើយុទ្ធនាការឲ្យលោកដូណាល់ ត្រាំទៀតឡើយ ឬនិយាយបែបម្យ៉ាងទៀត លោកផ្តាច់ការទាក់ទងទាំងស្រុងជាមួយលោកត្រាំ។
បើគេមើលមួយភ្លែតទៅឃើញថា វាហាក់ដូចចម្លែកខ្លាំងណាស់ដែលថ្នាក់ដឹកនាំគណបក្សសាធារណរដ្ឋបានផ្តើមដោះដៃចោលបេក្ខជនដូណាល់ ត្រាំដែលពួគគេបានគាំទ្រតាំងពីដំបូង ពោលតាំងពីនាសមាជបក្សក្នុងការជ្រើសរើសបេក្ខជនប្រធានាធិបតីតំណាងឲ្យបក្ស។ ធ្ងន់ធ្ងរជាងនេះ ការឈប់គាំទ្រលោកត្រាំរបស់ពួកគេបានធ្វើឡើង ចំពេលដែលលោកត្រាំកំពុងចាញ់ប្រៀបលោកស្រីគ្លីនតុនដែលជាបេក្ខជនគូប្រជែងមកពីគណបក្សសាធារណរដ្ឋ។ លទ្ធផលស្ទង់មតិធ្វើឡើងរួមគ្នាដោយទូរទស្សន៍ NBC និងកាសែត Wall Street Journal ចេញផ្សាយនាថ្ងៃចន្ទ ទី១០ តុលាឲ្យដឹងថា លោកស្រីគ្លីនតុនទទួលបានសម្លេងគាំទ្រលើសលោកត្រាំដល់ទៅ ១១%។
តែបើគេមើលឲ្យបានស៊ីជ្រៅបន្តិចទៅឃើញថា ជម្រើសរត់ចោលលោកត្រាំរបស់មន្រ្តីជាន់ខ្ពស់ក្នុងបក្សមកពីពួកគេមិនអាចបន្តទ្រាំមើល ទ្រាំស្តាប់ និងទ្រាំឮពាក្យសម្តីរបស់លោកត្រាំទាក់ទងនឹងបញ្ហាសង្គមដែលពេលខ្លះ បានបង្កឲ្យមានរឿងអាស្រូវជាហូរហែ។ ចុងក្រោយថ្មីៗនេះ គឺការបែកធ្លាយខ្សែអាត់វីដេអូថតក្នុងឆ្នាំ ២០០៥ ដែលលោកត្រាំមានចរិត និងបានប្រើសម្តីគ្រោតគ្រាតមើលងាយស្រ្តីភេទ។ ក្នុងរឿងអាស្រូវមួយនេះ ក៏ដូចជារឿងអាស្រូវមួយចំនួនមុនៗដែរ លោកត្រាំតែងតែបានចេញមុខសុំទោស។ តែការសុំទោសរបស់ត្រាំពិតជាមិនអាចបិទបាំង និងលៀងកំហុសរបស់លោកបានទេ។
គណបក្សសាធារណរដ្ឋកំពុងជួបវិបត្តិផ្ទៃក្នុង
គណបក្សសាធារណរដ្ឋមិនមែនខ្លាចបាត់បង់តែកៅអីប្រធានាធិបតីនៅសេតវិមានមួយប៉ុណ្ណោះទេ តែក៏បារម្ភពីការបាត់បង់អសនៈនៅក្នុងសភា និងព្រឹទ្ធសភាផងដែរ។ សូមជម្រាបជូនថានៅថ្ងៃទី៨ វិច្ឆិកាខាងមុខ ក្រៅពីបោះឆ្នោតជ្រើសរើសរូបប្រធានាធិបតីថ្មី ពលរដ្ឋអាមេរិកក៏ត្រូវបោះឆ្នោតជ្រើសរើសតំណាងរាស្រ្តថ្មីសម្រាប់អាណត្តិ ២ឆ្នាំ និងបោះឆ្នោតជ្រើសរើសសមាជិកព្រឹទ្ធសភាថ្មីចំនួន ១ភាគ៣ សម្រាប់អាណត្តិ ៦ឆ្នាំដែរ។ ឃើញថា នេះមិនមែនជារឿងលេងសើចទេ ហើយល្បែងនយោបាយដែលលោកត្រាំកំពុងលេងពេលនេះត្រូវបានថ្នាក់ដឹកនាំបក្សសាធារណរដ្ឋភាគច្រើនមើលឃើញថា កំពុងរុញគណបក្សឲ្យធ្លាក់ក្នុងជ្រោះមរណៈ។
បើគេជឿលើលទ្ធផលនៃការស្ទង់មតិនៅផ្ទៃក្នុងគណបក្សសាធារណរដ្ឋដែលមិនផ្សាយជាសាធារណៈឲ្យដឹងថា នាការបោះឆ្នោតខាងមុខ គណបក្សគូប្រជែង គឺគណបក្សប្រជាធិបតេយ្យមិនត្រឹមតែដណ្តើមបានកៅអីប្រធានាធិបតីប៉ុណ្ណោះទេ តែអាចនឹងទទួលបានសម្លេងភាគច្រើននៅក្នុងសភា និងព្រឹទ្ធសភាទៀតផង និយាយឲ្យស្រួលយល់ គណបក្សប្រជាធិបតេយ្យអាចនឹងក្តោបយកទាំងអំណាចប្រធានាធិបតី អំណាចសភា និងអំណាចព្រឹទ្ធសភា។ លោក Paul Ryan ដែលទើបដោះដៃចោលលោកត្រាំបានផ្តល់អនុសាសន៍ដល់សមាជិកសភា និងសមាជិកព្រឹទ្ធសភាផ្សេងទៀតក្នុងបក្សសាធារណរដ្ឋយ៉ាងសាមញ្ញថាអស់លោកបន្តធ្វើយុទ្ធនាការតាមលទ្ធភាពដើម្បីប្រយោជន៍ខ្លួនឯង។
តាមរយៈពាក្យសម្តីរបស់លោក Paul Ryan របៀបនេះនាំឲ្យគេយល់បានភ្លាមថា គណបក្សសាធារណរដ្ឋកំពុងជួបវិបត្តិផ្ទៃក្នុង និងកំពុងឆ្លងកាត់ព្យុះភ្លៀងមួយដែលគ្រប់គ្នាលែងខ្វល់ពីរឿងជួយស្រោចស្រង់ជោគវាសនារបស់លោកដូណាល់ ត្រាំទៀតឡើយ តែត្រូវគិតគូរពីប្រយោជន៍ផ្ទាល់ខ្លួន ពោលធ្វើយ៉ាងណា កុំឲ្យបាត់បង់អសនៈរបស់ខ្លួននៅក្នុងសភា និងនៅក្នុងព្រឹទ្ធសភា។
លោកដូណាំ ត្រាំប្តេជ្ញាតស៊ូរហូតដល់ទឹកចុងក្រោយ
ទោះបីជាមានថ្នាក់ដឹកនាំជាច្រើនបានរត់ចោលលោកត្រាំក៏ដោយ ក៏គណបក្សសាធារណរដ្ឋគ្មានជម្រើសអ្វីផ្សេង ក្រៅពីបន្តជូនដំណើរ និងគាំទ្រលោកត្រាំឲ្យដល់ទីបញ្ចប់ដែរ។ រឿងប្តូរបេក្ខជនប្រធានាធិបតីរបស់គណបក្សនេះ ឬគណបក្សនោះនៅកណ្តាលទីមិនមានចែងនៅក្នុងច្បាប់អាមេរិកទេ តែវាអាស្រ័យលើច្បាប់របស់គណបក្សនីមួយៗ។ គណបក្សសាធារណរដ្ឋមាននិតិវិធីក្នុងការប្តូរបេក្ខជន ប្រសិនបើរូបបេក្ខជននោះស្លាប់ ឬលាលែង។
នៅក្នុងករណីនេះ គណបក្សត្រូវកោះឲ្យមានសមាជថ្មីដើម្បីជ្រើសរើសបេក្ខជនថ្មី។ ក៏ប៉ុន្តែ ការអនុវត្តនីតិវិធីរបៀបនេះមិនមែនជារឿងងាយស្រួលទេ។ ម្យ៉ាងទៀត គេមិនដឹងថា តើគណបក្សអាចបង្ខំឲ្យបេក្ខជនម្នាក់កំពុងបង្ករឿងអាស្រូវ និងកំពុងបន្តយុទ្ធនាការឃោសនាយ៉ាងសកម្មចុះចេញបានដែរ ឬអត់?។ តែលោកត្រាំបានបញ្ជាក់រួចហើយថា លោកនឹងបន្តការតស៊ូតាមរបៀបលោករហូតដល់ទឹកចុងក្រោយ។ ឃើញថា គណបក្សសាធារណរដ្ឋត្រូវបង្ខំចិត្តទ្រាំរស់ជាមួយលោកត្រាំរហូតដល់ថ្ងៃបោះឆ្នោត ទី៨ វិច្ឆិកា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ