ដូណាល់ ត្រាំ ជាប្រធានាធិបតីអាមេរិក ជាឱកាសពង្រឹងសហភាពអឺរ៉ុប ?
ចុះផ្សាយនៅថ្ងៃ៖
ស្តាប់ - ០៤:០៥
លទ្ធផលនៃការបោះឆ្នោតបានបង្ហាញថា លោក ដូណាល់ ត្រាំ នឹងក្លាយជាប្រធានាធិបតីអាមេរិក ទី ៤៥ ចាប់ពីថ្ងៃទី ២០មករា សម្រាប់រយៈពេលបួនឆ្នាំ។ លទ្ធផលផ្ទុយពីការស្ទង់មតិ និងព្យាករណ៍បានរញ្ជួយពិភពលោកទាំងមូល។ បើតាមកម្មវិធីនយោបាយរបស់លោក និងប្រសិនបើលោកប្រធានាធិបតីអនុវត្តតាមមែន នោះគឺប្រៀបដូចជាកំពុងកាច់ចង្កូតអាមេរិកចូលរបត់ថ្មី ខុសស្រឡះនឹងអាមេរិកនាពេលបច្ចុប្បន្ន។ ប៉ុន្តែទោះជាយ៉ាងដូច្នេះក្តី ក៏ខាងអឺរ៉ុប ហាក់ដូចជាមានលាក់គំនួចមួយចង់ឃើញលោកដូណាល់ ត្រាំ ក្លាយជាមេដឹកនាំអាមេរិកដែរ ? ហេតុអ្វី ? តើអឺរ៉ុបសង្ឃឹមអាចទាញផលអ្វីបានខ្លះ ពីអាមេរិករបស់លោកត្រាំ ?
គ្មានបទពិសោធន៍ មិនធ្លាប់ប្រលូកក្នុងតួនាទីនយោបាយ មាននិស្ស័យពីកំណើតជាអ្នកជំនួញ សំដីក្អេងក្អាង មាត់ឆៅ ចរិតឆេវឆាវ ផ្លាស់ប្តូរលឿន នេះហើយអ្វីដែលគេអាចបរិយាយដោយខ្លី ថានរណាជា ដូណាល់ ត្រាំ។ ហេតុដូច្នេះហើយបានជាពិភពលោកទាំងមូល ជាទូទៅ ហាក់មានការព្រួយបារម្ភ មិនទុកចិត្ត ចង់ឃើញជោគជ័យរបស់លោក ដូណាល់ ត្រាំ បានក្លាយជាប្រធានាធិបតីសហរដ្ឋអាមេរិក។ ព្រោះមិនដឹងថាតើលោកដូណាល់ ត្រាំ នឹងអាចដឹកនាំប្រទេសទៅទិសណា បើនយោបាយការបរទេសក៏មិនច្បាស់លាស់ ពាណិជ្ជកម្មអន្តរជាតិក៏ស្ថិតនៅលើភ្លើង បញ្ហាបរិស្ថានក៏លែងប្រាកដប្រជា ដោយលោកគំរាមចង់វិលប្រើថាមពលរំពឹងទាំងស្រុងលើធ្យូងថ្ម ...
តែទោះជាយ៉ាងដូច្នេះក្តី ជាមានល្បាយអារម្មណ៍ភ្ញាក់ផ្អើលផង និងខកចិត្តផង ក៏ដោយក៏អឺរ៉ុប បានប្រកាសត្រៀមខ្លួនជាស្រេចនឹងធ្វើការជាមួយអាមេរិក និងអញ្ជើញលោកដូណាល់ ត្រាំ មកចូលរួមជំនួបកំពូលអឺរ៉ុបអាមេរិក នៅពេលហុចឱ្យ។ តាមការពិតទៅ អឺរ៉ុបក៏បានត្រៀមលក្ខណៈដែរ ! អឺរ៉ុបមានលាក់គំនួចមួយថាប្រសិនបើលោកដូណាល់ត្រាំ ក្លាយប្រធានាធិបតីអាមេរិកមែន ក៏មិនជាអីឡើយ។ វាមិនមែនជាមហន្តរាយសម្រាប់សហភាពអឺរ៉ុបឡើយ តែអាចជាផលល្អទៅវិញទេ ព្រោះមានហេតុផលច្រើន ៖
មានអឺរ៉ុបមិនតិចទេ ជាពិសេសអាល្លឺម៉ង់ និងបារាំង មិនពេញចិត្តនឹងកិច្ចព្រមព្រៀងពាណិជ្ជកម្មអឺរ៉ុប-អាមេរិក និងកិច្ចព្រមព្រៀងផ្តោះប្តូរពាណិជ្ជកម្មសេរីផ្សេងៗទៀត។ កិច្ចព្រមព្រៀងនេះនឹងត្រូវចុះហត្ថលេខានៅឆ្នាំក្រោយ ហើយបើចង់ប្រឆាំង គ្មានមធ្យោបាយអ្វីប្រសើរជាងការជាប់ឆ្នោតរបស់លោក ដូណាល់ ត្រាំឡើយ ព្រោះគាត់មាននយោបាយបិទទ្វារ ការពារតែប្រយោជន៍អាមេរិកខ្លួនឯង មិនត្រូវការខ្វល់ខ្វាយពាក់ព័ន្ធជាមួយអឺរ៉ុបច្រើនទេ ទាំងខាងនយោបាយ និងសេដ្ឋកិច្ច។ ប្រសាសន៍លោក ត្រាំ នៅពេលឃើញប្រជាពលរដ្ឋអង់គ្លេសបោះឆ្នោតប្រជាមតិចាកចេញពីអឺរ៉ុប បញ្ជាក់បានថាអឺរ៉ុបគ្មានក្នុងក្រសែភ្នែកលោកទេ។
អាមេរិកបានតួនាទីយ៉ាងសំខាន់ក្នុងការស្ថាបនាអឺរ៉ុប តាំងពីក្រោយសង្គ្រាមលោកលើកទីពីរមក តែជាមួយលោកត្រាំ អឺរ៉ុបត្រូវប្រឹងខ្លួនឯង ដោយកុំគិតចាំជំនួយពីសហរដ្ឋអាមេរិកទៀត។ នេះជាឱកាសល្អ សម្រាប់សហភាពអឺរ៉ុប បើចង់ក្លាយខ្លួនជាមហាអំណាច មានឯករាជ្យ ដាច់ពីសហរដ្ឋអាមេរិក និងរុស្ស៊ី។ ក្រែងគម្រោងនេះអឺរ៉ុបចង់បាន រដ្ឋសហព័ន្ធមួយតាំងពីយូរមកហើយ តែត្រូវពន្យារពេល ដោយសារតែការលូកដៃរបស់អាមេរិក ក្នុងអំឡុងសង្គ្រាមត្រជាក់នោះអី ?!
ដំណាក់កាលទីពីរ អាមេរិករបស់លោកត្រាំ អាចនឹងកាត់បន្ថយសកម្មភាពក្នុងអង្គការអូតង់។ បច្ចុប្បន្ននេះ អាមេរិកតំណាងឱ្យ៧៥%នៃចំណាយរបស់អូតង់ បើអាមេរិកដកខ្លួនចេញ អឺរ៉ុបគ្មានអ្វីយកមកបំពេញហិបឡើយ។ ការដកខ្លួនចេញពីអូតង់របស់អាមេរិក ពិតជាផលវិបាកដ៏ឡូស៊ិកមួយនាំអឺរ៉ុបឱ្យរំលេចឡើងនូវកិច្ចសហប្រតិបត្តិការយោធា ក្នុងរង្វង់ប្រទេសជាសមាជិកសហភាពអឺរ៉ុបតែមួយ។ ជាពិសេសក្នុងបរិបទនៃទំនាក់ទំនងតានតឹងរវាងអឺរ៉ុបនិងរុស្ស៊ីស្រាប់ផង អឺរ៉ុបពិតជាមិនអាចធ្វេសប្រហែសបានឡើយ។ សមាជិកអឺរ៉ុបត្រូវតែប្រឹងសហការគ្នាផ្នែកយោធា ឬអាចរុញឱ្យសម្រេចកិច្ចសហប្រតិបត្តការយោធាទ្វេភាគី ឧទាហរណ៍បារាំងនិងបារាំង និងសម្រេចសក្តានុពលបង្កើតស្ថាប័នយោធាអឺរ៉ុបផងក៏ថាបាន។ កង្វះខាតចំណុចមួយ បានរំខានអឺរ៉ុបមិនឱ្យក្លាយជាមហាអំណាចយោធាទីពីរនៅលើពិភពលោកបាន។ សង្ឃឹមថាការភ្ញាក់ផ្អើលនឹងលទ្ធផលឆ្នោតអាមេរិកថ្ងៃទី ៨ វិច្ឆិកា អាចចាក់ដល់ចង្កេះមេដឹកនាំអឺរ៉ុប ឱ្យភ្ញាក់គិតគូរ ស្ថាបនាអឺរ៉ុបមួយមានទាំងស្ថាប័នរដ្ឋបាល និងយោធា។
អ្នកឯកទេសនិងជំនាញ ហ៊ានសន្និដ្ឋានបែបនេះ ក៏ព្រោះបានសម្គាល់ឃើញអឺរ៉ុបផ្តើមយល់ ថាពីភាពចាំបាច់ខ្លាំងឡើងនៃការបង្កើតយោធាអឺរ៉ុបរួម តាំងពីវិបត្តិគំរាមកំហែងភេរវកម្ម និងដំណើរចាកចេញពីអឺរ៉ុបរបស់អង់គ្លេស។
ជោគជ័យរបស់ត្រាំ ក៏ញុះញង់ឱ្យអឺរ៉ុបគិតគូរធ្វើទំនើបកម្មអាវុធយុទ្ធភ័ណ្ឌ ដោយស្វែងរកការអាវុធ ផលិតនៅអឺរ៉ុប។ បើដូច្នេះមែននោះវាពិតជាប្រពៃណាស់សម្រាប់ក្រុមហ៊ុនអឺរ៉ុបទាំងឡាយកាន់តែមានសុខភាពល្អ និងទីផ្សារការងារក៏អាចរីកឡើងនៅលើទ្វីបដ៏ចំណាស់មួយនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ