លោកដូណាល់ ត្រាំ ជាប្រធានាធិបតីអាមេរិក ៖ តើអាចមានផលវិបាកអ្វីខ្លះ ?
លោក ដូណាល់ ត្រាំ បានក្លាយជាប្រធានាធិបតីអាមេរិក ដោយបានឈ្នះឆ្នោតនៅយប់ថ្ងៃទី ៨ វិច្ឆិកា ! ចាប់ពីថ្ងៃទី២០ មករា ២០១៧ ថ្ងៃចូលកាន់តំណែងប្រធានាធិបតីជាផ្លូវការ លោក ដូណាល់ ត្រាំ ត្រូវចាប់ផ្តើមការងារ ដោយដាក់ឱ្យដំណើរការនូវរាល់សំណើទាំងឡាយដែលលោកបានសន្យានាពេលឃោសនាបោះឆ្នោត។ កម្មវិធីនយោបាយខ្លះ មានលក្ខណៈហួសពីការពិត ដែលនឹងអាចផ្តល់ផលវិបាកមិនប្រាកដប្រជាដល់សហរដ្ឋអាមេរិក និងពិភពលោក។ នេះជាសំណើសំខាន់ៗដែលលោកដូណាល់ត្រាំ ត្រូវប្រឈមនឹងភាពជាក់ស្តែង
ចុះផ្សាយនៅថ្ងៃ៖
បណ្តេញជនអន្តោប្រវេសន៍ខុសច្បាប់ពីសហរដ្ឋអាមេរិក
គ្រាន់តែបានប្រកាសខ្លួនជាបេក្ខជនប្រធានាធិបតីភ្លាម លោកបានបញ្ចេញសំណើដ៏រន្ធត់មួយ គឺការដេញអន្តោប្រវេសន៍១១លាននាក់ចេញពីសហរដ្ឋ។ លោកបានបញ្ជាក់ជំហរនេះ និងមិនធ្វើការប្តូរផ្លាស់ឡើយ ព្រោះអន្តោប្រវេសន៍ខុសច្បាប់ធ្វើអាមេរិកខាតបង់២០០ពាន់លានដុល្លារក្នុងមួយឆ្នាំៗ និងចង់សង់ជញ្ជាំងខណ្ឌចែកជាមួយប្រទេសម៉ិចស៊ិកទៀត ដើម្បីទប់លំហូរអន្តោប្រវេសន៍។ ប៉ុន្តែប្រតិបត្តិការនេះ ត្រូវការចំណាយធំខ្លាំងទាំងកម្លាំងមនុស្ស ទាំងថវិកា និងត្រូវរងសម្ពាធមនុស្សធម៌ សិទ្ធិមនុស្សដែលធ្វើឱ្យខូចរូបភាពសហរដ្ឋអាមេរិកខ្លាំង។ បើតាមវិបសៃត៍ Buzzfeed លោកដូណាល់ ត្រាំបានខ្សិបប្រាប់អ្នកកាសែតNew York Times ថានឹងបោះបង់សំណើនេះនៅពេលជាប់ឆ្នោត។
ហាមមិនឱ្យអ្នកកាន់សាសនាអ៊ីស្លាមចូលអាមេរិក
តើលោកដូណាល់ ត្រាំ អាចសម្រេចហាមមិនឱ្យអ្នកកាន់សាសនាអ៊ីស្លាមចូលជាន់ទឹកដីអាមេរិកទេដូចសន្យាបានឬ ?! ថ្វីបើអាមេរិកធ្លាប់ដាក់បម្រាមលើក្រុមមនុស្សចំនួនដូចជាចិន ឬជប៉ុន នៅឆ្នាំ១៩៤៣បានសម្រេចមែន តែកាលណោះដោយផ្អែកលើសញ្ជាតិ។ ក្រៅបរិបទសង្គ្រាម និងដោយផ្អែកលើច្បាប់រដ្ឋធម្មនុញ្ញ និងច្បាប់អន្តរជាតិ ហាមឃាត់មនុស្សព្រោះសាសនាមិនអាចធ្វើទៅរួចបានឡើយ។
បញ្ចុះពន្ធដារ
ចំពោះការកាត់បន្ថយពន្ធដារ ដែលលោកមានជាជំហរជាអ្នកសេរីនិយមបំផុតនោះ ក៏ទំនងជានឹងពិបាកសម្រេចបានដែរ។ លោកចង់កំរិតការបង់ពន្ធត្រឹម២០% មិនមែន៤០%ដូចពេលនេះទេ មានន័យថា អ្នកមានខ្លាំង(១%)នឹងអាចចំណេញបាន២៧ម៉ឺនក្នុងមួយឆ្នាំ ឯអ្នកក្របំផុត(២០%) អាចសន្សំបានតែ១២៨ដុល្លារប៉ុណ្ណោះក្នុងមួយឆ្នាំ។ សំណើនេះនឹងធ្វើឱ្យអាមេរិកកើនបំណុលដល់ទៅ១៤០% បើប្រៀបនឹងនយោបាយលោកអូបាម៉ា ដែលមានត្រឹម៨៦%។
សើរើទំនាក់ទំនងជាមួយចិន
ដោយមានអំណួតអំណាងខាងរកស៊ី លោកដូណាល់ត្រាំ ប្រកាសចង់ចរចាឡើងវិញ លើគ្រប់កិច្ចព្រមព្រៀងពាណិជ្ជកម្មជាមួយដៃគូនៅលើពិភពលោក មួយម្តងៗ និងពិសេសជាមួយចិន។ ប៉ុន្តែជាសំណើដែលអាចផ្ទុយនឹងច្បាប់ពាណិជ្ជកម្មពិភពលោក និងអាចនាំឱ្យប៉េកាំងធ្វើការប្តឹងផ្តល់ផង។
ទាក់ទងនឹងការប្រយុទ្ធប្រឆាំងនឹងភេរវនិយម និងអង្គការរដ្ឋអ៊ីស្លាម លោក ដូណាល់ ត្រាំ ចង់បើកម្លាំងយោធាប្រឆាំងនឹងសមាជិកក្រុមគ្រួសារទាហានអាស៊ីសតែម្តង យុទ្ធសាស្រ្តនេះ បើប្រធានាធិបតីត្រាំ ធ្វើមែន នោះគឺជាឧក្រិដ្ឋកម្មសង្គ្រាមហើយ។
Obamacare
ជាចុងក្រោយ អាមេរិកជាមួយនឹងប្រធានាធិបតី ដូណាល់ ត្រាំ បានប៉ងលុបចោលរាល់ក្រិត្យប្រធានាធិបតី ជាពិសេសក្រិត្យទាក់ទងនឹងការធានារ៉ាប់រងសុខភាព ព្រោះលោកមហាសេដ្ឋីយល់ថាថ្លៃជ្រុល។ ប៉ុន្តែសួរតើរដ្ឋបាលលោកអាចមានសមត្ថភាពប៉ុណ្ណាក្នុងការដាក់វិស័យនេះឱ្យមានការប្រកួតប្រជែង ដើម្បីបានថោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ